ء«ا.نۇرماحانوۆ اتىنداعى وبلىستىق وليمپيادا رەزەرۆىن دايارلايتىن سپورت مەكتەبىنىڭ» تۇلەگى ديدار حامزانى جەرلەستەرى ريو وليمپياداسىنا شىعارىپ سالۋ ءراسىمىن وتكىزدى. اتالعان مەكتەپتىڭ ۇيىتقى بولۋىمەن «تۇركىستان احمەت اياسساۋي» مەشىتىندە وتكەن شاراعا قالاداعى يگى جاقسىلار مەن سپورت جاناشىرلارى جانە ءدىن وكىلدەرى جينالدى.

وسى كەزدەسۋ بارىسىندا 19 جاستاعى دزيۋ-دو كۇرەسىنىڭ شەبەرى، جاس باتىر بەكزات ساتتارحانوۆتان كەيىن اراعا 16 جىل سالىپ وليمپيادا ويىندارىنا قاتىسقالى وتىرعان ديدار پالۋانعا تۇركىستاندىقتار ساتتىلىكتەر تىلەدى. وسىلايشا ىستىق ىقىلاستارىن جەتكىزگەن كوپشىلىك اراسىندا بەكزادا بەكزاتتىڭ اكەسى سەيىلحان ساتتارحانوۆ «مەنىڭ ۇلىم سيدنەي وليمپياداسىنا اتتانعاندا ۇستازى بەرگەن قۇران كىتاپتى وقي الماسا دا جانىنان تاستاماي، اقتىق ويىنعا شىعار الدىندا ەرماحان اعاسى ەكەۋى قاسيەتتى كىتاپتى كوكىرەكتەرىنە قىسىپ نيەت ەتكەن ەكەن. ەندەشە ديدار بالاما دا بەكزاتىمنىڭ جەڭىسىن تىلەيمىن. سول ءۇشىن جانىڭا سەرىك بولسىن دەپ، مىنا قۇران كىتابىن ارنايى الىپ كەلدىم»، دەپ باتاسىن بەردى. سونىمەن قاتار، قالانىڭ باس يمامى ومار ەلەۋۇلى باستاعان ءدىن وكىلدەرى جاماعاتپەن بىرگە وتكەن ءار نامازدا دۇعا تىلەيتىنىن جەتكىزىپ، قۇران باعىشتادى. جانە دە قالا اكىمىنىڭ ورىنباسارى د.تاڭىربەرگەنوۆ اكىمدىك اتىنان پالۋانعا شاپان جاۋىپ، سىي-سىياپات جاسادى.

ايتا كەتەرلىگى، بارشا جەرلەستەرىنە شەكسىز العىسىن ايتقان ديداردىڭ جەكە باپكەرى ءارى اسقار تاۋ اكەسى مارات فايزيەۆ ۇلىنىڭ ءدۇبىرلى دودادان جۇلدەمەن ورالۋىنا مۇمكىندىگى بار ەكەندىگىن جەتكىزدى.

ايتا كەتەيىك، الەمدەگى 73 كەلىدەگى ەڭ تاڭداۋلى 22 دزيۋ-دوشى قاتىساتىن وليمپياداعا ديدار ءبىر قادام جەتپەي قالعان بولاتىن. ياعني 23 ورىندا تۇرعان جاس پالۋاننىڭ الدىندا تۇرعان سپورتشىنىڭ بەلگىلى سەبەپتەرمەن جارىس جولىنان شەتتەتىلىپ، وسىدان 3-4 كۇن بۇرىن عانا شاقىرتۋ العان ديداردىڭ ەندىگى ءۇمىتى جەڭىس.

دزيۋدودان قازاقستان ەرلەر قۇراماسى تەك ءۇش جولداماعا يەلەنسە، ەندى ولاردىڭ سانى تاعى تولىقتى. ديدار حامزا ريودا 8 تامىز كۇنى تاتاميگە شىعادى.

Abai.kz