سەيسەنبى, 21 مامىر 2024
بىلگەنگە مارجان 6123 0 پىكىر 14 ماۋسىم, 2016 ساعات 11:56

توقتار اۋباكىروۆ: پارلامەنت دەپۋتاتتارى «ءيا» دەگەن تۇيمەنى باسۋ ءۇشىن عانا جينالعان

قازاقتىڭ تۇڭعىش عارىشكەرى توقتار اۋباكىروۆ بيىل 70-كە تولادى. وسى ورايدا توقتار اۋباكىروۆتىڭ ءار جىلدارى ءباسپاسوز بەتىندە ايتقان وتكىر-وزەكتى وي-پىكىرلەرىن dalanews.kz سايتى تىزبەكتەدى.


ء«وز باسىم كەزدەسە قالعاندا، امانداسۋ تۇرماق، ءتىپتى ۇستەل باسىنا بىرگە وتىرعىم كەلمەيتىن ىقپالدىلاردى، ميلليونەرلەردى بىلەمىن. بۇدان شىعاتىن قورىتىندى: ادامدى اقشاسىنا نەمەسە تامىر-تانىسىنا قاراپ تۇلعانىڭ قاتارىنا قوسۋعا بولمايدى».

«جاستارعا ىلعي دا ايتىپ جۇرەمىن. ومىردە ماقساتىڭ بولۋى كەرەك. الدىڭا ماقسات قويماساڭ، ءومىر بويى اداسىپ وتەسىڭ. بالا كەزدەن-اق كىم بولاتىنىڭدى انىقتا. ءوز باسىم، مۇلدە باسقا ماماندىقتى ءبىتىرىپ، كەيىن مينيستر بولعاندا ءوزى مۇلدە بىلمەيتىن سالانى باسقارىپ وتىراتىن مينيسترلەردى تۇسىنبەيمىن. ۇسىندى ەكەن، كەلىسە سالادى. ولار ول جەردە وتىرماۋى كەرەك.

ودان بۇرىن سەن بۇل جەرگە قالاي كەلدىڭ، قالاي جەتتىڭ، وسى ماڭىزدى. ماقساتىڭا بىرەۋدىڭ جولىن كەسىپ، بىرەۋگە ارامدىق جاساپ جەتسەڭ، ەندەشە ارمانىڭنىڭ قالاي ورىندالعانىن ارتىڭداعى ۇرپاعىنا ايتپاي-اق قويۋىڭا بولادى. ۇيات».

«ەشكىم ۇرى-قارى، قىلمىسكەر نەمەسە الاياق بولىپ تۋمايدى. ەسەيە كەلە تاڭداۋ جاسايدى. ءبارى وسىعان بايلانىستى. ءبىر جولى ەل تانيتىن اسا ىقپالدى ازاماتپەن سوزگە كەلىپ قالدىق.

ول: ء«سىز باتىرسىز. حالىق ءسىزدى جاقسى كورەدى. قولىڭىزدا قانشاما مۇمكىندىك بولا تۇرا، سونى قولدانا بىلمەيسىز. دەمەك، اقىماقسىز. سەبەبى، باس يگىڭىز كەلمەيدى. ال مەن يىلە بىلەمىن، وسى سەبەپتى قازىر ميلليونەر اتانىپ وتىرمىن»، – دەدى.

قازىر ول شىرىگەن باي. وتە ىقپالدى. «مەن بايمىن، دەمەك باسقالارى مەنىڭ الدىمدا قۇرداي جورعالاۋى كەرەك، باس ءيۋى ءتيىس» دەپ سانايدى. نەگە، بىلەسىز بە؟ ويتكەنى ءبىر كەزدەرى ءوزى دە سويتكەن. تابان جالاعان… وزگەلەردى كەمسىتە وتىرا ءبىر كەزدەگى ماسقاراسىنىڭ ورنىن تولتىرعىسى كەلەدى. ال مەن ەشقاشان ەشكىمنىڭ الدىندا باس يگەن ەمەسپىن».

«ادامنىڭ تابيعاتى – ءاردايىم جىلى ورىن ىزدەيدى. مىسالى، ەلدىڭ ءبارى نەگە زاڭگەر بولۋعا قۇمار؟ ويتكەنى وسى ارقىلى قارجى پوليتسياسىنا، پروكۋراتۋراعا ودان قالدى باسقا دا كۇشتىك قۇرىلىمدارعا ورنالاسۋدى ارماندايدى. سەبەبى، قازىرگى كۇنى كۇشتىك قۇرىلىمدار ادامداردىڭ ومىرىنە تۇمسىق تىعۋدا، اسەر ەتۋدە. ءتىپتى، ءبىزدىڭ جەكە ءومىرىمىزدىڭ ءوزىن باقىلاۋعا العان. الگىندەي ادامداردىڭ ارمانى دا بەلگىلى، ولار باسقالاردىڭ ۇستىنەن قاراعىسى، ءامىرىن جۇرگىزگىسى كەلەدى».

«عارىشقا بىردەن ۇشقام جوق. العاشقى ەكى رەتىندە باس تارتتىم. 90-شى جىلدارى كەڭەس ۇكىمەتى قۇلاعاسىن «قازاقتاردىڭ اراسىنان عارىشقا كىم ءبىرىنشى بولىپ ۇشادى؟» دەگەن ماسەلە وتكىر تۇرعان. سول كەزدەرى مەنىڭ كانديداتۋرامدى نۇرسۇلتان نازارباەۆ قولدادى. رازىمىن.

مەنى عارىشقا ۇشىرۋعا دىنمۇحاممەد قوناەۆتىڭ ءوزى مۇددەلى بولاتىن. ول تۇستارى بىزدە كادر تاپشى ەدى. شتاتتاعى بىرنەشە تاجىريبەلى ۇشقىش قايتىس بولعان. وسى سەبەپتى بىردەن كەلىسكەم جوق. الدىمەن جاس ۇشقىشتاردىڭ اراسىنان تاڭداۋ جاسادىق. بىراق، كوپشىلىگى دايىن بولماي شىقتى.

تەك تالعات مۇساباەۆتان عانا جىلت ەتكەن وت كوردىك. ونى عارىشقا ۇشىرۋعا دايىنداي باستادىق، الايدا كاسىبي بىلىگى از بولعاندىقتان بۇل ماقساتىمىز ورىندالمادى. بۇدان كەيىن تاعى دا مەنىڭ كانديداتۋرامدى ۇسىندى. ەكىنشى رەتىندە تاعى باس تارتتىم. سەبەبى، ءوزىم جۇمىس ىستەيتىن ا. ميكويان اتىنداعى تاجىريبەلىك-كونسترۋكتورلىق بيۋرونى تاستاپ كەتكىم كەلمەدى.

ءۇشىنشى رەتىندە پرەزيدەنت نازارباەۆ مەنى جەكە قابىلداۋىنا شاقىردى. «توقتار، حالقىمىز بۇل كۇندى 30 جىل كۇتتى. ءازىر قولىمىزدا تۇرعان عارىشتىق تەحنولوگيانىڭ بارلىعى ءبىراز ۋاقىتتان كەيىن ەشكىمگە كەرەكسىز كۇيىندە قالادى. عارىشقا حالقىڭ ءۇشىن ۇش!» دەدى. كەلىستىم».

ء«ۇش رەت دەپۋتات بولدىم. ءۇش رەتتە دە جولىم بولعان جوق. تاراتىپ جىبەردى. قۇداي بىلەدى، تاعى ءبىر رەت تالپىنىپ كورسەم، تاعى تاراتىپ جىبەرۋى مۇمكىن. ەندەشە ەشكىمگە كەدەرگى كەلتىرمەي-اق قويايىن. مەنسىز-اق جۇمىس ىستەسىن، وتىرسىن. بۇل جەرگە جىلى ورىندى اڭسايتىندار كەلەدى. سەبەبى، مۇندا ەشكىم ەشكىمنىڭ جاعاسىنان المايدى، ەشكىم سەنى سويلەۋگە ماجبۇرلەمەيدى، تەك ء«يا» دەگەن تۇيمەنى باسساڭ جەتىپ جاتىر. ەگەر تاپسىرما جوعارىدان كەلسە بارلىعى ءبىر اۋىزدان: «بولدى، تۇسىندىك، كەلىسەمىز» دەيدى. ەشقانداي تۇزەتۋ ەنگىزبەيدى. شىنىمدى ايتسام، ءسوزىنىڭ سالماعى، وزىندىك پىكىرى جوقتاردىڭ اراسىندا جۇرگىم كەلمەيدى».

ء«بىز بىرتىندەپ قۇلدىراپ بارامىز. انىعىندا، بۇل قۇلدىراۋدىڭ باسى عانا. ازىرگى قۇلدىراۋىمىز باياۋ باستالىپ جاتىر. الەمدىك داعدارىس دەندەي تۇسكەندە نە بولادى؟ ايتۋدىڭ ءوزى قورقىنىشتى.

ءبىز تۇك وندىرمەيتىن ەلمىز. شيكىزاتقا تاۋەلدى ەلدىڭ تاعدىرى بەلگىسىز، بولاشاعى بۇلىڭعىر. الەم ءبىزدىڭ شيكىزاتتان باس تارتقان كۇنى ناعىز قۇلدىراۋ باستالادى. انىعىندا، ءبىز قۇزعا قۇلايمىز. مىنە، سول كەزدە عانا حالىق بيلىكتىڭ وسى ۋاقىتقا دەيىن تۇك بىتىرمەگەنىن انىق ۇعىنادى».

Abai.kz

 

 

 

0 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2197
ادەبيەت

«سولاي ەمەس پە؟»

عابباس قابىشۇلى 2583
قوعام

دوس كوپ پە، دۇشپان كوپ پە؟

ءابدىراشيت باكىرۇلى 2518
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1683