قر مادەنيەت جانە سپورت مينيسترلىگى ەۋروپا قازاقتارىنىڭ كىشى قۇرىلتايىن وتكىزەدى، - دەپ حابارلايدى اباي-اقپارات مينيسترلىكتىڭ ءباسپاسوز قىزمەتىنە سىلتەمە جاساپ.

"قر مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتى قازاقستان رەسپۋبليكاسىندا تىلدەردى دامىتۋ مەن قولدانۋدىڭ مەملەكەتتىك باعدارلاماسىنا سايكەس ەل تاۋەلسىزدىگىنىڭ 25 جىلدىعى اياسىندا ەۋروپا قازاقتارىنىڭ كىشى قۇرىلتايىن ۇيىمداستىرۋدا" دەپ جازىلعان حابارلامادا.

كەزەكتى قۇرىلتاي ستامبۋل قالاسىندا ۇستىمىزدەگى جىلدىڭ 8-10 شىلدە ارالىعىندا وتكىزىلىپ جاتىر.

قۇرىلتايدىڭ ماقساتى – ەۋروپا قازاقتارىمەن بايلانىس ورناتۋ، شەتەلدەردەگى قازاقتاردىڭ انا ءتىلىن مەڭگەرۋى مەن مادەنيەتىن ساقتاۋى ءۇشىن ادىستەمەلىك، ۇيىمداستىرۋشىلىق قولداۋ كورسەتۋ بولىپ تابىلادى.

قۇرىلتاي جۇمىسىنا قازاقستاننان دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى ت.ماماشەۆ، تىلدەردى دامىتۋ جانە قوعامدىق-ساياسي جۇمىس كوميتەتى توراعاسىنىڭ ورىنباسارى ع.مەلدەشوۆ، قر پارلامەنتى ءماجىلىسىنىڭ دەپۋتاتى س. ابدراحمانوۆ، و.اسانعازىقىزى، ءا.اسقار جانە ت.ب. مادەنيەت قايراتكەرلەرى بار 20 دەلەگات قاتىسىپ جاتىر.

سونىمەن قاتار ەۋروپا ەلدەرىنەن قازاق دياسپوراسى وكىلدەرى شاقىرىلدى.

قۇرىلتاي اياسىندا سالتاناتتى جيىن، دوڭگەلەك ۇستەل، ءتىل سايىسى، زۇقا باتىر اتىنداعى قازاق ۇلتتىق ويىندارى سايىسى جانە كونتسەرتتىك باعدارلاما وتكىزىلۋ جوسپارلانىپ وتىر.

اباي-اقپارات