دۇيسەنبى, 24 قاڭتار 2022
جاڭالىقتار 2909 0 پىكىر 3 ناۋرىز, 2016 ساعات 09:14

ارقانكەرگەن. انانىڭ ارىزى كەرى قايتتى

بۇگىن استانانىڭ سارىارقا اۋداندىق سوتى تاتيانا رەيدىڭ تالاپ-ارىزىن قاناعاتتاندىرۋدان باس تارتتى.

پاۆلودار وبلىسىندا تۇراتىن زەينەتكەر بالاسى دەنيس رەيدى ولتىرگەنى ءۇشىن مورالدىق وتەماقى رەتىندە 370 ميلليون تەڭگە ءوندىرىپ بەرۋدى سۇراعان. اناسى بالاسىنىڭ قازاسىنا مەملەكەتتىك ورگانداردى كىنالايدى.

تاتيانا رەيدىڭ ادۆوكاتى سەرىك سارسەنوۆ شەكاراشىلار ولتىرىلگەن اتىس قارۋى ۇلكەن قاۋىپ توندىرگەن ءارى مەملەكەت مۇلكى بولعاندىقتان، كىنالى يا كىناسىز ەكەنىنە قاراماستان، ازاماتتىق-قۇقىقتىق جاۋاپكەرشىلىك مەملەكەتكە جۇكتەلەدى دەپ سانايدى.

- اقىرى چەلاحتى كىنالى ەتىپ شىعاردى، بىراق لاۋازىمدى تۇلعالاردىڭ ايىبى جايلى ماسەلە قوزعالعان دا، تەكسەرىلگەن دە جوق. 14 اسكەري مەرت بولعانى ءۇشىن مەملەكەتتىڭ ەشبىر لاۋازىمدى تۇلعاسى جاۋاپقا تارتىلعان جوق، – دەيدى سەرىك سارسەنوۆ.

ادۆوكاتتىڭ مالىمدەۋىنشە، اناسى دەنيس رەيدىڭ قازاسىن كوتەرە الماي قانت ديابەتىنە شالدىققان، ياعني مورالدىق زيان شەككەن. تاتيانا رەي – زەينەتكەر، جالعىز تۇرادى. ۇلكەن بالاسى ءوز وتباسىمەن بولەك تۇرادى.

2012 جىلدىڭ مامىرىندا قازاقستان-قىتاي شەكاراسىنداعى ورتەنىپ كەتكەن زاستاۆادان 14 شەكاراشى مەن قورىقشىنىڭ ءمايىتى تابىلعان. دەنيس رەي مەن تاعى ءبىر شەكاراشى مەيىرحان يمەنوۆتىڭ ءمايىت قالدىقتارى تابىلماي، ەكەۋىن رەسمي تۇردە حابارسىز جوعالىپ كەتتى دەپ جاريالاعان. ءتىرى قالعان جالعىز شەكاراشى ۆلاديسلاۆ چەلاحقا "ارقانكەرگەن" زاستاۆاسىندا جاپپاي كىسى ءولتىردى دەگەن ايىپپەن ءومىر بويى تۇرمەدە وتىرۋ جازاسى كەسىلگەن.

ەكى جىلدان كەيىن ۇلتتىق قاۋىپسىزدىك كوميتەتىنىڭ (ۇقك) شەكارا اسكەرلەرىنە قاراستى №2484 اسكەري ءبولىمنىڭ اسكەري قىزمەتشىسى دەنيس رەي ۋسپەنسك سوتى شەشىمىمەن قازا تاپقان دەپ تانىلعان.

اباي-اقپارات

0 پىكىر