الماتى وبلىسىنداعى دوستىق بەكەتىنەن قىتاي حالىق رەسپۋبليكاسىنىڭ شەنسي پروۆينتسياسىنا 2 مىڭ توننا وسىمدىك مايى جونەلتىلدى.

ماي تيەگەن كونتەينەرلىك پويىزدىڭ العاشقى جونەلتىلۋ راسىمىنە قازاقستاندىق «Total Impex» كومپانياسى، قىتايلىق «ايتسزيۋي» كومپانياسى جانە الماتىداعى قىتاي كونسۋلدىعىنىڭ وكىلدەرى قاتىستى. دايىن ءونىمدى ەكسپورتتاۋ جونىندە ەكى ەل اراسىندا ءتيىمدى ىنتىماقتاستىق پەن ءوزارا ارەكەتتەستىك ورناتىپ، وسى ءىستىڭ باسى-قاسىندا جۇرگەن «اتامەكەن» ۇلتتىق كاسىپكەرلەر پالاتاسى ۇيىمداستىرۋ جانە تەحنيكالىق ماسەلەلەردى شەشۋگە دە قولداۋ كورسەتتى. بۇدان بىلاي اتالعان دايىن ءونىم 35 ميلليوننان استام تۇرعىنى بار شەنسي پروۆينتسياسىنا تۇراقتى تۇردە جەتكىزىلىپ وتىرماق. قازاقستاندىق «Total Impex» كومپانياسىنىڭ ديرەكتورى داۋرەن تۇراپبەكوۆتىڭ ايتۋىنشا، بۇل پيلوتتىق جوبا ەل ەكونوميكاسىنا جاڭا ينۆەستيتسيالاردى تارتۋعا ۇيىتقى بولادى.

«جوبا لوگيستيكا سالاسىن جاقسارتۋعا مۇمكىندىك بەرەدى جانە  قىتاي بيزنەس-قوعامداستىعى ءۇشىن ۇلگى كورسەتەدى. تۇراقتى جەتكىزىلىم ناتيجەسىندە ەلىمىزگە ينۆەستيتسيالار تارتۋعا جول اشىلادى. وعان قوسا، بيىلعى جىلى سولتۇستىك قازاقستان وبلىسىندا باستاپقى قۋاتتىلىعى  جىلىنا 40-100 مىڭ توننا بولاتىن، ال، كەيىننەن  100-150 مىڭ تونناعا دەيىن جەتەتىن ماي داندەرىن قايتا وڭدەۋ زاۋىتى اشىلادى دەپ جوسپارلانىپ وتىر»، – دەيدى كومپانيا باسشىسى. ونىڭ ايتۋىنشا، بۇل وڭىردە مايلى داقىلداردى ءوسىرۋ فەرمەرلەر ءۇشىن ەكونوميكالىق تۇرعىدان وتە ءتيىمدى بولماق.

«ۇلتتىق كاسىپكەرلەر پالاتاسىنىڭ ارقاسىندا ءبىز قىتايلىقتارمەن سەرىكتەس بولدىق. ەندى ءبىز دايىن ءونىمدى تىكەلەي ساتا الامىز»، – دەپ اتاپ ءوتتى  د.تۇراپبەكوۆ.

كەلىسىم-شارت سوماسى 573 ميلليوننان استام تەڭگەنى قۇرايدى.  قىسقا مەرزىم ارالىعىندا شامامەن 20-40 كونتەينەر جونەلتىلىپ، بولاشاقتا ءونىم تۇرلەرى كوبەيەدى دەپ كۇتىلۋدە. قىتاي نارىعى، اسىرەسە، قازاقستاننان كەلەتىن ۇن ونىمدەرىنە، ءسۇت تاۋارلارى مەن ەتكە قىزىعۋشىلىق تانىتىپ وتىر. مۇنىڭ ءبىر سەبەبى، قازاقستاندىق تاۋارلاردىڭ تابيعي قۇنارلىلىعىنا، ەكولوگيالىق تازالىعىنا بايلانىستى ەكەنى ءسوزسىز.

 Abai.kz