بىلتىر جۇرت بولىپ جۇمىلىپ، «قازاق حاندىعىنىڭ 550 جىلدىعىن» اتاپ وتتىك. 2014 جىلدىڭ اياق شەنىندە مەملەكەت باسشىسى 550 جىلدىقتى مەملەكەت كولەمىندە تويلاۋدى ايتقاندا، مادەنيەت ءمينيسترى ارىستانبەك ءمۇحاماديۇلى پارمەن بەرىپ، بەلگىلى رەجيسسەر رۇستەم ابدىراشوۆكە  «قازاق ەلى» دەپ اتالاتىن كوپ سەريالى كينو-ەپوپەيا ءتۇسىرۋدى تاپسىرعان ەدى.

اۋەلدە تاريحي كينو-ەپوپەيا كوپ سەريالى بولعانىمەن، كەيىن قاتال اعايلار قاراجاتتى قىسا-قىسا، اقىرىندا 18 سەريا تۇسىرىلەتىن بولدى. ءاۋ دەگەندە فيلم 2015 جىلى كورەرمەن نازارىنا ۇسىنىلۋى كەرەك-ءتىن. وكىنىشكە وراي، بەلگىلى-بەلگىسىز سەبەپتەرى بار، سارىلا كۇتكەن سەريالىمىز بيىل دا دايىن بولماي شىقتى. 

"قازاق ەلى" نەگە كەشىگىپ جاتىر، ءبىر سۇراپ ءبىلىپ قويايىقشى دەپ ءفيلمنىڭ رەجيسسەرى  رۇستەم جاراسقانۇلىنا حابارلاستىق.

-رۇستەم جاراسقىنۇلى، قازاق حاندىعىنىڭ 550 جىلدىعىنا ارنالعان (2015 جىلى ءوتىپ كەتسەدە) «قازاق ەلى» فيلمىنە قاتىستى ءبىزدىڭ بىرەر ساۋالىمىز بار ەدى.

-جاقسى، تىڭداپ تۇرمىن.

-ءفيلمنىڭ ترەيلەرىن كوردىك. جاقسى. ەندى ءفيلمنىڭ ءوزىن قاشان كورەمىز؟ حاندىقتىڭ تويىنا ارناپ ءتۇسىرىلۋى ءتيىس فيلم تۋرالى ەشكىم-ەشتەڭە دەمەيدى عوي. سوعان قاراعاندا...

-فيلم ءتۇسىرىلىپ بولدى. قازىر مەن مونتاجدا وتىرمىن. فيلم مونتاجدالىپ بولعان سوڭ، كورەرمەنگە ۇسىنىلاتىن بولادى.

-نەشىنشى سەريانى مونتاجداپ وتىرسىزدار؟

-مەن ەندى ول جاعىن ايتا المايمىن عوي. جالپى ءفيلمنىڭ 10 سەرياسى ءتۇسىرىلىپ ءبىتتى. ءبىز بارلىق سەريانى پاراللەلدى مونتاجدايمىز.  ونىڭ ۇستىنە «قازاقفيلمنىڭ» دەكوراتسيالارىنىڭ جەتكىزىلىكسىزدىگىنە بايلانىستى جاڭاعى 10 سەريانىڭ ىشىندە كەيبىر دەتالدارى ءتۇسىرىلىپ بىتكەن جوق. ولاردى ءتۇسىرۋ كەرەك ءالى. جۇمىسى كوپ ونىڭ.

-سوندا فيلم قاشان دايىن بولادى؟

-ەگەر اقشا ءبولىنىپ، قارجىلىق قولداۋ تابىلاتىن بولسا، وسى جىلدىڭ اياعىنا تامان بىتىرەمىز. قازىردىڭ وزىندە بىزگە اقشا بەرمەسە دە، جۇمىس جاساپ جاتىرمىز عوي. ال ەگەر قولداۋ بولىپ جاتسا، ارينە، ەرتەرەك بىتىرەمىز.

ايسۇلۋ تۇرسىنباەۆا

Abai.kz