جۇما, 1 شىلدە 2022
قوعام 4785 1 پىكىر 28 جەلتوقسان, 2015 ساعات 14:18

بيلىكتەگى پەنسيونەرلەر جاستارعا سەنبەيدى

جۋىردا مەملەكەت باسشىسى "مەملەكەتتىك قىزمەت" تۋرالى زاڭعا ۆەتو قويعانى تۋرالى قازاقستاندىق باق جارىسا جازدى.  ەل پرەزيدەنتى: «25 جىل بويى ساياسات ساحناسىندا جۇرگەن شەندىلەرمەن قوشتاسۋىمىز» كەرەك دەدى.

ءيا، ەلباسى وسى جولى زەينەتكە شىقسا دا، جىلى ورنىن بوساتقىسى كەلمەيتىن، جاسى كەلگەن ساياسي تۇلعالاردى ساياسي قىزمەتتەن بوساتۋدى ۇسىنعاندا، شيرەك عاسىردان بەرى تانىس شەنەۋنىكتەردىڭ بىرسىپىراسىمەن قوشتاساتىن بولدىق دەپ ەك. ء بىزدىڭ توپشىلاۋىمىز بويىنشا، پرەزيدەنتتىڭ پارمەنىمەن بىرقاتار اكىمدەر مەن پارلامەنتتىڭ قوس پالاتاسىنداعى دەپۋتاتتار ءوز مانداتتارىن تاپسىرىپ، كەلەسى سايلاۋعا قاتىسپاۋى كەرەك سياقتى ەدى.

ارينە،  مەملەكەتتىك  قىزمەتپەن بىرگە تۋعان ادام جوق. قىزمەتكە ۇرپاقتار تولقىنى اۋىسىپ كەلىپ جاتادى. الايدا، زەينەتكە شىعار جاسىندا كرەسلودان تۇسپەي، تاۋەلسىزدىكتىڭ العاشقى كۇندەرىنەن بەرى پرەزيدەنت نازارباەۆپەن بىرگە كەلە جاتقان ادامدار كوپ-اق. كەشە ءبارى قىلشىلداعان جاس ەدى. ۋاقىت وتە شاۋ تارتتى، جاستارى ۇلعايدى. بىراق  سونىڭ كوبى، جوعارىدا كورىپ وتىرسىزدار، ءماجىلىس پەن سەناتتان ورىن تاۋىپ العان.

ەستەرىڭىزدە بولسا، abai.kz پورتالى ءبىرىنشى بولىپ، قالشىلداعان قارت شەنەۋنىكتەردىڭ ءتىزىمىن ۇسىنعان ەدى (http://abai.kz/post/view?id=5549).

دەسە دە، پرەزيدەنتتىڭ پارمەنىمەن، وتكەن اپتانىڭ اياعىندا بىرقاتار شەنەۋنىكتەر جىلى ورىندارىن ساقتاپ قالاتىن بولىپ شەشىلدى.

بىلاي قاراساڭىز قازاقستانداعى زاڭ شىعارۋشى ورگان زەينەتكەرلەردى دەمالىس ورنى نەمەسە «قارتتار ءۇيى» سەكىلدى. ەندى ولاردىڭ ورنىنا ءسوز جوق جاس بۋىن كەلۋى ءتيىس ەدى. پرەزيدەنت نازارباەۆتىڭ ءوزى: «قازىر مەن جالعىزبىن. سەندەر مەنىڭ ىعىمداسىڭدار. سوندىقتان مەنىڭ بەلبەۋىمنەن مىقتاپ ۇستاڭدار. ەرتەڭ سەندەرگە قيىن بولادى»، - دەپ ەدى. پرەزيدەنت وسى سوزىمەن جانىنا سەرىك بولىپ جۇرگەن، بىرقاتار زامانداستارىن ساياسي قىزمەتتە ساقتاپ قالعىسى كەلەتىنىن اڭعارتسا كەرەك.

جاقىندا پرەزيدەنت مىرزا بىرقاتار شەنەۋنىككە زەينەت جاسىندا ساياسي قىزمەتتەرىن جالعاستىرۋعا رۇقسات بەردى. ەلباسىنىڭ ەرەكشە نازارىنا ىلىنگەندەر كىمدەر دەيسىزدەر عوي. مەملەكەت باسشىسىنىڭ جارلىعىمەن «قازاقستاننىڭ مەملەكەتتىك قىزمەتى تۋرالى» زاڭىنا سايكەس، زەينەتكەرلىك جاسقا تولعان كەلەسى مەملەكەتتىك ساياسي قىزمەتشىلەردىڭ وكىلەتتىكتەرى ۇزارتىلادى. ولار:

  1. قازاقستاننىڭ ەنەرگەتيكا ءمينيسترى ۆلاديمير شكولنيكتىڭ — 2016 جىلعى 31 جەلتوقسانعا دەيىن.
  2. اقمولا وبلىسىنىڭ اكىمى سەرگەي كۋلاگيننىڭ — 2018 جىلعى 31 جەلتوقسانعا دەيىن.
  3. الماتى وبلىسىنىڭ اكىمى اماندىق باتالوۆتىڭ  — 2020 جىلعى 22 قاراشعا دەيىن.
  4. اتىراۋ وبلىسىنىڭ اكىمى باقتىقوجا ىزمۇحامبەتوۆتىڭ — 2016 جىلعى 1 قىركۇيەككە دەيىن.
  5. قازاقستاننىڭ اۋعانستان يسلام رەسپۋبليكاسىنداعى توتەنشە جانە وكىلەتتى ەلشىسى ءومىرتاي ءبىتىموۆتىڭ — 2018 جىلعى 31 جەلتوقسانعا دەيىن.
  6. قازاقستاننىڭ فرانتسياداعى توتەنشە جانە وكىلەتتى ەلشىسى نۇرلان دانەنوۆتىڭ  وكىلەتتىلىگى 2018 جىلعى 31 جەلتوقسانعا دەيىن ۇزارتىلدى.

سونىمەن قاتار، قازاقستان پرەزيدەنتى نۇرسۇلتان ءابىشۇلى – ءوزىنىڭ ەڭ سەنىمدى سەرىكتەرىنىڭ ءبىرى – قازاقستاننىڭ ۇلتتىق قاۋىپسىزدىك كوميتەتىنىڭ توراعاسى – نۇرتاي ابىقاەۆتى قىزمەتىنەن بوساتتى. ابىقاەۆتىڭ كوميتەتىنە سۋ جاڭا كادر كەلدى. ول - سامات ساتىبالدىۇلى ءابىش. نازارباەۆ اۋلەتىنەن شىققان سامات ساتىبالدىۇلى قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى بولىپ تاعايىندالدى.  

جوق، ابىقاەۆ قىزمەتسىز قالعان جوق. مەملەكەت باسشىسىنىڭ وكىمىمەن، ەكس-توراعا ەندى پارلامەنت سەناتىنىڭ دەپۋتاتى بولىپ تاعايىندالدى.

ءتۇيىن: شيرەك عاسىردان بەرى اتتان تۇسپەي كەلە جاتقان شەنەۋنىكتەردىڭ شاۋ تارتىپ جاتسا دا، مايلى كرەسلودان ايىرىلماق ءتۇرى جوق. ەلباسىنىڭ ەرەكشە نازارىنا ىلىنگەن «پەنسيونەرلەر» ەل تىزگىنىن ۇستاپ، ساياسي جۇيەمىز تولىق گەرونتوكراتياعا اينالعانى جاسىرىن ەمەس. ءيا، سول – اقساقالداردىڭ  بيلىك  جۇرگىزۋ  ءپرينتسيپى. 

وسى تۇستا مۇحاڭنىڭ(مۇحتار شاحان)  «12-3=؟» دەگەن ولەڭى ەسىمە تۇسەدى. ءدال بۇگىنگى كورىنىستى سۋرەتتەيدى.

ال، برەجنەۆ بيلىك جۇرگىزگەن كەڭەستىڭ كەر كەزەڭىندە، ماڭايىنا وڭشەڭ قالشىلداعان قارتتاردى جيناپ الىپ، جاستار اربانىڭ بەسىنشى دوڭعالاعىنا اينالعان ەدى عوي. كانى؟ سول قوعام نە ۇتتى؟ كۇيرەپ، ءبىتتى.

راس، ولار تاجىربيەلى، اككى، وڭ مەن سولىن بايىپپەن اڭعارادى. ساياساتتا ۇزاق جىلدار بويى كەلە جاتىر. دەگەنمەن، قاريالار بيلىگى – كونستيتۋتسيادا ايتىلعان دەموكراتتىقتان الىستاپ، ءوز ماقساتىنا  جەتۋ  ءۇشىن  ادامدارعا  جالعان  ۋادە بەرگىش، دەرەكتەردى  بۇرمالاعىش  جانە  جەل ءسوز، جالعان جارنامانىڭ ىعىنا جىعىلعىش ءھام باسشىعا جاعىنعىش – دەماگوگتارعا اينالىپ كەتكەنى دە شىندىق.

پەنسيونەرلەر قاپتاعان پارلامەنتتە پارمەن جوق. بۇل دەگەنىڭىز بارىپ تۇرعان – دەسپوتيا!

جوعارى بيلىك جاستارعا سەنبەيدى مە، سوندا؟ ايتپەگەندە، اقىل ورەسى ابىقاەۆتان كەم ەمەس، كۋلاگين مەن شكولنيكتەردى ون وراپ اكەتەتىن قانشاما جاس ساياساتكەرلەر تاسادى ءجۇر؟ سولاردىڭ كوبىسىن، مەمەكەت ءوزى ارنايى «بولاشاق» باعدارلاماسىمەن شەتەلدەردە وقىتىپ، شەبەرلىكتەر شىڭداتىپ، دايىنداعان ەدى عوي. ول ءۇشىن دە، قازىنادان قىرۋار قارجى بولىنگەن. سول ماماندار قايدا؟ بۇل دا ءبىر جالقى سۇراق، دوعال دەرەك. ءبىز  قانشا ايتساق تا، قارت ساياساتكەرلەردىڭ قاڭقۋىن ءالى ءبىراز تىڭدايتىن بولدىق. شيرەك عاسىر بويى بيلىكتە جۇرگەن قاريالار اتتان تۇسپەيمىز دەيدى. بۇندايدا، ۇيرەنگەن جاۋ اتىسپاققا جاقسى دەمەي مە؟! ۇيرەنىپ قالعانبىز...

نۇرگەلدى ابدىعانيۇلى

Abai.kz

1 پىكىر

ۇزدىك ماتەريالدار

اقمىلتىق

«قيالشىلدار كلۋبى»

ءامىرجان قوسان 394
انىق-قانىعى

كىمنىڭ كىم ەكەنىن بىلە ءجۇرسىن دەپ...

اۋىت مۇقيبەك 316