قازان ايىنىڭ 13-شىندە اتىشۋلى «اداسقاندار» ءفيلمىنىڭ تۇسىرىلىمىندە بولعان ەدىك. ءفيلمنىڭ رەجيسەرى – ماسكەۋلىك مامان شوتا گاميسونيا. باستى رولدەردە التىناي جولدىباەۆا مەن مۇرات جۇماباەۆ.  ءفيلمنىڭ تۇپكى ماعىناسى مەن ماقساتى، ءتۇسىرىلىم بارىسى تۋرالى «31» ارنانىڭ اتقارۋشى پروديۋسەرى اسەل تويانوۆا بايانداپ بەردى. بۇل «31» ارنا مەن مەملەكەتتىڭ بىرلەسكەن جوباسى. ءفيلىمنىڭ قىسقاشا مازمۇنى مىناداي.

ۋاقىت پورتالى ىسكە قوسىلىپ، قازىرگى زاماندا ءومىر ءسۇرىپ جاتقان بىرنەشە قازاقستاندىقتار  بەس ءجۇز جىل بۇرىنعى قازاق حاندىعىنا ءوتىپ كەتەدى. كەيىپكەرلەر ءوز ومىرلەرىنە ۇيرەنىپ قالعاندىقتان، ول جەردەن قاشىپ شىعۋ ءۇشىن تالاي ارەكەتتەنەدى. 

بەلگىلى فيزيك، فيزيكا-ماتەماتيكا عىلىمىنىڭ دوكتورى تالاس سەركەباەۆ ۋاقىت پورتالىن جۇزەگە اسىرۋ ءۇشىن بىرنەشە جىلدان بەرى اينالىسىپ كەلەدى. پورتال ارالداعى قاراقۇم دەگەن جەردە بولادى. تالاس سول جەردە ارنايى اپپاراتتىڭ كومەگىمەن زەرتتەۋ جۇرگىزەدى.

ءتۇن بولادى. عىلىمي زەرتتەۋ جۇمىستارى كەزىندە تالاسقا تانىمال ءانشى ايدانا (التىناي جولدىباەۆا) جانە ونىڭ پروديۋسەرى الىشەر، وققاعارى مۇحيت كەزدەسەدى. ولار ايدانانىڭ بەينەبايانىن تۇسىرەمىز دەپ اداسىپ كەتەدى.

ايتپاقشى، كەلگەن قوناقتار تالاسقا كەدەرگى كەلتىرەدى. ايدانا جانە ونىڭ قاسىنداعىلارى ۇيىنە قايتا ورالۋعا وقتالعانىمەن، ولاردىڭ ماشيناسى قۇمعا باتىپ قالادى. مۇحيت گازدى قاتتى باسىپ ىسكە قوسۋدى كوزدەيدى.

وسى ۋاقىتتا تالاستىڭ اپپاراتى تەرەڭ جەر استىنان پايدا بولعان تەربىلىستى وزىنە قابىلداپ الادى. تالاس مۇحيتقا گازدى باسۋىن توقتاتۋدى سۇرايدى. ايتپەسە ماشينانىڭ قوزعالتقىشى جەر استىنداعى قوزعالىسقا اسەر ەتۋ مۇمكىن دەگەن بولجام ايتادى. الايدا، مۇحيت ونى ەستىمەيدى، ءتىپتى تىڭدامايدى دا. ودان سايىن گازدى باسادى. تالاستىڭ ايتقانى بولىپ، ماشينانىڭ قوزعالتقىشى اسەر ەتىپ، جەر استىنان شۇڭقىر پايدا بولادى. ءسويتىپ، ول شۇڭقىر ايدانانىڭ كومانداسى جانە تالاستىڭ اپپاراتىمەن بىرگە وزگە زامانعا وتكىزىپ جىبەرەدى. 

گۇلدەن ابدىباقىت

اباي-اقپارات