جەكسەنبى, 23 ماۋسىم 2024
جاڭالىقتار 4039 0 پىكىر 5 شىلدە, 2015 ساعات 23:11

نازارباەۆ - تۇرىك بىرلىگىنىڭ ۇيىتقىسى

بۇگىن، استانا قالاسىندا تۇرىك اكادەمياسىنىڭ كەزەكتى كەزدەسۋى ءوتتى. كەزدەسۋگە تۇرىك مەملەكەتتەرىنەن عالىمدار كەلدى. استانا كۇنى قارساڭىندا ارنايى ساپارمەن كەلگەن تۇركيانىڭ ەكس-پرەزيدەنتى ابدۋللا گۇل دە اكادەميا جينالىسىنا قاتىستى. ول ءوز سوزىندە وسىنداي اكادەميانىڭ قۇرىلۋىنا ۇيىتقى بولعان قازاقستان پرەزيدەنتىنە العىسىن ءبىلدىرىپ:

«نۇرسۇلتان نازارباەۆ - تۇركى ينتەگراتسياسى مەن بىرلىگىنىڭ ۇيىتقىسى. تۇركى كەڭەسىنىڭ قۇرىلۋىنا، وسى يدەيالاردىڭ جۇزەگە اسىرىلۋىنا، اسىرەسە، پرەزيدەنت نۇرسۇلتان نازارباەۆتىڭ سىڭىرگەن ەڭبەگى زور بولدى دەپ ايتا الامىن.»، - دەدى.

بۇل تۋرالى حالىقارالىق تۇركى اكادەمياسىنىڭ ءباسپاسوز قىزمەتى حابارلادى.  

«ودان كەيىن تۇركى كەڭەسىنىڭ اياسىندا  تۇركپا سياقتى ينستيتۋتتاردى قۇردىق. سونىڭ ىشىندە پرەزيدەنت نۇرسۇلتان نازارباەۆتىڭ ۇلكەن ءمان بەرگەن ينستيتۋتى  - تۇركى اكادەمياسى. ونىڭ بۇل يدەياسىن مەن دە قولداپ، استانانىڭ تورىندە، وسىنداي ادەمى عيماراتتا اكادەميانى اشتىق. استانادا ورنالاسقانىمەن بۇل اكادەميانىڭ جۇمىسى بۇگىندە كۇللى تۇركى دۇنيەسىن قامتىپ وتىر. قىسقا عانا ۋاقىتتا كوپتەگەن ماڭىزدى ءىس-شارالار وتكىزدىڭىزدەر»، - دەپ اتاپ ءوتتى ابدۋللا گۇل.

ونىڭ ايتۋىنشا، تۇرىك تەكتى حالىقتار ادامزاتتىڭ دامۋىنا ولشەۋسىز ۇلەس قوسىپ، باعا جەتپەس مۇرالار قالدىرعان. ولاردى تۇگەندەۋ، الەم جۇرتشىلىعىنا پاش ەتۋ وسى اكادەميانىڭ جۇمىسى ارقىلى مۇمكىن بولىپ وتىر.

استاناعا ساپارلاپ كەلگەن ابدۋللا گۇل مىرزا بۇگىن حالىقارالىق تۇركى اكادەمياسىنا كەلىپ، تۇركى دۇنيەسىندەگى عىلىم مەن ءبىلىم سالاسىن ۇيلەستىرۋشى ۇيىمنىڭ جۇمىسىمەن تانىستى.

كەزدەسۋگە بەلگىلى عالىمدار، مەملەكەت جانە قوعام قايراتكەرلەرى مىرزاتاي جولداسبەكوۆ، ءادىل احمەتوۆ، سەيىت قاسقاباسوۆ، ساۋىتبەك ابدراحمانوۆ، ەرلان سىدىقوۆ، عاريفوللا ەسىم، شاكىر يبراەۆ جانە باسقا بىرقاتار زيالى قاۋىم وكىلدەرى قاتىسىپ، ءوز پىكىرلەرىمەن ءبولىستى.

 

اباي-اقپارات

0 پىكىر