«ماڭگىلىك ەل» ءتارىزدى ماقساتى ايقىن ۇلتتىق يدەيامىزدىڭ بولعانىن ماقتان تۇتۋ كەرەك. بۇل – جالپىقازاقستاندىق يدەيا. BNews.kz پورتالىنىڭ ستۋدياسىندا «ماڭگىلىك ەل» – ءححى عاسىرداعى قازاقستاننىڭ مىزعىماس يدەيالىق تۇعىرى» تاقىرىبىندا وتكەن ونلاين كونفەرەنتسيا بارىسىندا قر مادەنيەت جانە سپورت ءمينيسترى ارىستانبەك مۇحامەديۇلى وسىنداي پىكىرىمەن ءبولىستى، دەپ حابارلايدى BNews.kz.

 «قازىر قازاقستان الەمدى اۋزىنا قاراتىپ وتىر. ولاي دەيتىنىمىز، ەلىمىزدى الەم جۇرتشىلىعى اۋقاتتى، قارقىندى دامۋشى ەل رەتىندە تانۋدا. وسى ورايدا ۇلتتىق بىرلىك يدەياسىنىڭ ماڭىزى زور. ول – ءبىزدىڭ ماقتانىشىمىز، ءبىزدىڭ برەندىمىز. ءتۇرلى كونفەسسيالىق باعىتتاردى ۇستانا وتىرىپ، 130-دان اسا ۇلتتىڭ باسىن ورتاق ماقساتپەن ءبىر شاڭىراق استىنا بىرىكتىرۋ كوپتىڭ قولىنان كەلە بەرمەيتىن بىرەگەي جەتىستىك. وسىعان قاتىستى سىرت كوزدەردىڭ تاڭدانىسىن بايقاپ، بويىمىزدى ىشتەي ماقتانىش سەزىمى بيلەيدى»، - دەيدى مادەنيەت جانە سپورت ءمينيسترى. 

ارىستانبەك مۇحامەديۇلى اتاپ وتكەندەي، «ماڭگىلىك ەل» - ۇلتتىق بىرلىك، قوعامىمىزداعى بەيبىتشىلىك پەن كەلىسىمنىڭ جەمىسى. 

«سونداي-اق وسى يدەيا اياسىندا جالپىعا ورتاق ەڭبەك قوعامىن قالىپتاستىرىپ جاتقانىمىزدى ايتا كەتكەن ءجون.ارينە، ءار قولعا كۇرەك تابىلىپ، اركىم ءوز ەڭبەگىن، وزگەنىڭ ەڭبەگىن باعالاپ جاتسا، بۇل قوعامىمىزدى ودان بەتەر بىرىكتىرە تۇسەدى. ەكىنشىدەن، «ماڭگىلىك ەل» يدەياسى پاتريوتتىق رۋحتى اسقاقتاتا تۇسەدى جانە بۇل ءىستىڭ باسى قاسىندا تۇڭعىش رەت قازاقستاندا قۇرىلعان بىرەگەي ينستيتۋت – قازاقستان حالقى اسسامبلەياسى تۇر»، - دەپ اتاپ ءوتتى ۆەدومستۆو باسشىسى.

ءمينيستردىڭ ايتۋىنشا، ەلىمىزدە قولعا الىنعان سەرپىندى جوبالاردىڭ ءبارى بولاشاققا باعىتتالعان. سونىڭ ارقاسىندا قازاقستاندى بولاشاعىنا نىق سەنىممەن قارايتىن ەل دەپ ايتۋعا بولادى. 

«سوندىقتان ەلىمىزدىڭ ءال-اۋقاتى ەشقاشان سارقىلماسىن دەپ تىلەيمىن. جانە ەلباسىمىزدىڭ دا، ۇكىمەتىمىزدىڭ دە اتقارىپ جاتقان اۋقىمدى جۇمىستارى وسى ماقساتقا باعىتتالعان. ماقساتى ايقىن مەملەكەتتىڭ ىرگەسىن قالاعان ەلباسىمىزعا زور العىس ايتامىن»، - دەدى ا.مۇحامەديۇلى.

Bnews.kz