ابايدىڭ مەملەكەتتىك قورىق-مۇراجايى قاراعاندى وبلىسى اباي اۋدانى اباي قالاسىنا ارنايى قازاقتىڭ باس اقىنىنىڭ 170 جىلدىق مەرەيتويىنا ارنالعان شارالارعا قاتىسۋ ءۇشىن ات باسىن تىرەدى. ۇلى اقىننىڭ ەسىمى بەرىلگەن كەنشىلەر قالاسىندا «الەم تانىعان كەمەڭگەر اباي» اتتى مەرەكەلىك شارا اياسىندا اباي قورىق-مۇراجايى 2015 جىلدىڭ 12 تامىزىندا كورمە ۇيىمداستىردى.

كورمە ۇلى تۇلعا، ويشىل-اقىن اباي قۇنانبايۇلىنىڭ ءومىرى مەن شىعارماشىلىعىن، قوعامدىق قىزمەتى جانە اباي ۇرپاقتارى، اقىن شاكىرتتەرىنىڭ مۇراسىن مەرەيتويعا قاتىسۋشى قاۋىمعا تانىستىرۋ، ناسيحاتتاۋ ماقساتىندا دايىندالدى.

كورمەدە اباي 1885 جىلى سەمەيدىڭ ولكەتانۋ مۋزەيىنە تاپسىرعان زاتتار: كىسە بەلبەۋ، شىناياققاپ، تەرى تورسىق، اساتاياق پەن سىبىزعى ورىن الدى. سونىمەن قاتار ءانشى الماعامبەتتىڭ دومبىراسى، كىرشومبال جانە سول زامانداعى تاعى باسقا جادىگەرلەر مەن اقىننىڭ قوعامدىق قىزمەتىن دالەلدەيتىن ارحيۆ دەرەكتەرى ۇسىنىلدى.

كورمەگە كەلگەن زيالى قاۋىم، مەرەكە قوناقتارى مەن جاس ۇرپاق قىزۋشىلىق ءبىلدىرىپ، اباي شىعارماشىلىعى مەن قىزمەتى، اقىن شاكىرتتەرى جونىندە، ۇلى وتان سوعىسىنا قاتىسقان اقىن ۇرپاقتارى تۋرالى مالىمەتتەر مەن فوتوسۋرەتتەر جانە مۇراجايدىڭ عىلىمي-زەرتتەۋ جۇمىستارىن ناسيحاتتايتىن باسپا ونىمدەرى، مۇراجاي بولىمدەرى مەن قىزمەتى تۋرالى اقپاراتتارمەن تانىسىپ تاماشالادى. كورمە بويىنشا ەكسكۋرسيا جۇرگىزىلىپ، سۇراقتارعا جاۋاپ بەرىلدى.

ابايدىڭ 170 جىلدىعىنا ارنالعان شارالاردى ۇيىمداستىرۋشى اباي اۋدانىنىڭ اكىمى س.شايداروۆ اباي مۇراجايىنىڭ مەرەكەگە ات سالىسىپ، كورمە دايىنداعانىنا ريزاشىلىق ءبىلدىرىپ، قورىق-مۇراجايى ديرەكتورى ج.اۋباكىرگە العىس ايتتى.

اباي قورىق-مۇراجايىنىڭ جەتەكشى

عىلىمي قىزمەتكەرى م.مۇحامەدوۆا