ساۋال:

ءبىز جاس وتباسىمىز. «قولجەتىمدى باسپانا -2020» باعدارلاماسىنا قاتىسۋ ءۇشىن نە ىستەۋ كەرەك؟

جاۋاپ:

ەڭ الدىمەن اتالعان باعدارلاما جايلى از-كەم اقپارات. ول مەملەكەت باسشىسىنىڭ 2012 جىلعى 27 قاڭ­تارداعى «الەۋمەتتىك ەكونوميكالىق جاڭ­عىرتۋ - قازاقستان دامۋىنىڭ باستى باعىتى» اتتى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپا­رىنا سايكەس دۇيەگە كەلدى. سول جىلى «قولجەتىمدى باسپانا-2020» باعدارلاماسى بەكىتىلىپ، ول تومەندەگىدەي نەگىزگى باعىتتاردى قامتىدى:

1. جەرگىلىكتى اتقارۋشى ورگاندا كەزەكتە تۇرعان ازاماتتار ءۇشىن تۇرعىن ءۇي سالۋ.

2. قازاقستاننىڭ تۇرعىن ءۇي قۇرىلىس جيناق بانكى جەلىسى بويىنشا:

1) حالىقتىڭ بارلىق ساناتتارى ءۇشىن;

2) جاس وتباسىلار ءۇشىن تۇرعىن ءۇي سالۋ.

3. «قازاقستان يپوتەكالىق كومپانياسى» اكتسيونەرلىك قوعامىنىڭ تۇرعىن ءۇي سالۋى.

وسى باعدارلاما  بويىنشا  جاس  وتبا­سىلارعا  ارنالعان  تۇرعىن ۇيلەردى الۋ ماقساتىندا باعدارلاماعا  قاتىسۋشىلاردى ىرىكتەۋ جانە تۇرعىن ءۇيدى بەرۋ  كەزەكتىلىگىنىڭ ءتارتىبىن جەرگىلىكتى اتقارۋشى ورگان بەلگىلەيدى.

ماسەلەن، تۇرعىن ءۇي قارىزدارىن الۋ ءۇشىن اتالعان باعدارلاماعا قاتىسۋشىلارعا قويىلاتىن نەگىزگى  تالاپتار:

- وتباسىنىڭ قۇرامىنا ەرلى-زايىپتىلار، كامەلەتكە تولماعان جانە ەڭبەككە جارامسىز بالالار، ەرلى-زايىپتىلاردىڭ ەڭبەككە جارامسىز اتا-انالارى قوسىلادى;

- ەرلى-زايىپتىلاردىڭ ەكەۋىنىڭ دە باعدارلاماعا قاتىسۋعا ءوتىنىش بەرىلگەن ەلدى مەكەندە تىركەلۋى;

- سوڭعى 5 جىل ىشىندە ەرلى-زايىپتىلار­دىڭ جانە  ولاردىڭ وتباسى مۇشەلەرىنىڭ تۇرعىن ءۇي جاعدايلارىن قاساقانا تومەندەتۋ فاكتىلەرىنىڭ بولماۋى;

- ءوتىنىش بەرەردىڭ الدىنداعى سوڭعى 6 اي ءۇشىن وتباسىنىڭ اي سايىنعى جيىنتىق تازا تابىسى  (زەينەتاقى اۋدارىمدارىن، جەكە تابىس سالىعىن جانە باسقا دا اۋدارىم­داردى ەسەپتەمەگەندە) مىناداي شەكتە:

ا) ەڭ تومەنگى الماتى، استانا قالالارى ءۇشىن تومەنگى كۇنكورىس دەڭگەيىنىڭ 4 ەسە مول­شەرى، باسقا قالالار ءۇشىن تومەنگى كۇنكورىس دەڭگەيىنىڭ 3 ەسە مولشەرى;

ب) ەڭ جوعارعى-تومەنگى كۇنكورىس دەڭگەيىنىڭ 12 ەسە مولشەرىنەن  ارتىق  ەمەس.

جەرگىلىكتى اتقارۋشى ورگان ءوتىنىشتى قا­بىل­داۋدىڭ باستالعانى تۋرالى حابارلان­دىرۋ بەرگەن كۇننەن باستاپ، بىراق جالعا بەرىلەتىن تۇرعىن ءۇيدىڭ قۇرىلىسى باستالعان كۇننەن باستاپ 3 ايدان كەشىكتىرمەي باعدار­لاماعا قاتىسۋ ءۇشىن وتىنىشتەردى قابىلداۋدى باستايدى جانە جالعا بەرىلەتىن تۇرعىن ءۇيدى ىسكە قوسۋعا 6 اي قالعاندا اياقتايدى.

باعدارلاماعا قاتىسۋ ءۇشىن ۇمىتكەرلەر از بولعان جاعدايدا اتقارۋشى ورگان ءوتىنىشتى قابىلداۋ مەرزىمىن ۇزارتۋعا  قۇقىلى.

باعدارلاماعا قاتىسۋ ءۇشىن ءوتىنىشتى قابىلداعان كەزدە جەرگىلىكتى اتقارۋشى ورگان ءوتىنىش يەلەرىنىڭ جوعارىدا كورسەتىلگەن تالاپتارعا سايكەستىگىنە تەكسەرۋ جۇرگىزەدى.

اباي-اقپارات.