قازاق كۇرەسىنەن  ۇلت كوشباسشىسى  - قازاقستان رەسپۋبليكاسىنىڭ پرەزيدەنتى ن.ءا. نازارباەۆتىڭ جۇلدەسى ءۇشىن «قازاقستان بارىسى» ءتۋرنيرىنىڭ ءتورتىنشى ماۋسىمىنا ىرىكتەۋ سىنى اياقتالىپ كەلەدى. بۇگىندە ەلىمىزدەگى 14 وبلىستىڭ جارتىسىنان كوبى جەڭىمپازداردى انىقتاپ، فينالدا بەلدەسەتىن بالۋاندار ەسىمىن جاريا ەتتى.

بىلتىر «قازاقستان بارىسى» ءتۋرنيرىنىڭ باس جۇلدەسىن جەڭىپ العان شىعىس قازاقستان وبلىسىنداعى  باسەكە بيىل اسا تارتىستى ءوتتى. وسكەمەندەگى «جەكپە-جەك سارايىنا»  جينالعان بالۋاندار قاتارىندا تاجىريبەلى شالقار جولامانوۆ تا بار ەدى. وتە قىزىقتى وتكەن الىپتار ايقاسىندا قازاق كۇرەسىنەن الەم چەمپيونى مۇحيت تۇرسىنوۆ جەڭىسكە جەتتى. «شىعىس بارىسى» اتانعان مۇحيت فينالدا شالقار جولامانوۆتان باسىم ءتۇستى.  وسىلايشا، ماۋسىم ايىندا وتەتىن «قازاقستان بارىسى» دوداسىنىڭ فينالىندا شىعىس قازاقستان نامىسىن ءۇش بالۋان قورعايدى. ولار: مۇحيت تۇرسىنوۆ، شالقار  جولامانوۆ جانە ايبەك نۇعىماروۆ. 2013 جىلعى «قازاقستان بارىسى» ءتۋرنيرىنىڭ جەڭىمپازى سانالاتىن ايبەك بيىلعى فينالعا ەشقانداي ىرىكتەۋسىز، تىكەلەي جولداما الادى.

مۇحيت تۇرسىنوۆ، «شىعىس بارىسى»:

 - «قازاقستان بارىسىنىڭ» ەكى ماۋسىمىنا قاتىسىپ، جۇلدەسىز قالدىم. ەندىگى ماقساتىم  - بيىلعى سىندا ۇزدىكتەر قاتارىنان كورىنۋ. سول ءۇشىن ايانباي جاتتىعامىن.

شالقار جولامانوۆ، «قازاقستان بارىسىنىڭ» فينالىنا قاتىسۋشى:

 - «قازاقستان بارىسىنا» ىرىكتەۋ سىنىن اسىعا كۇتەمىز. وسى جولى وبلىستا ەكىنشى ورىن السام دا، رەسپۋبليكالىق سىننىڭ فينالىنا قاتىسۋ  قۇقىن يەلەندىم. ازداپ جاراقاتىم بار ەدى، فينالعا دەيىن قۇلان-تازا ايىعامىن دەپ ويلايمىن.

وڭتۇستىك قازاقستان وبلىسىنداعى ىرىكتەۋ سىنىندا جۇمانازار ەرسۇلتانوۆ پەن سابىرجان ءابىلداۇلىنا فينال جولداماسى بۇيىردى. اتالعان ەكى بالۋان بىلتىر «قازاقستان بارىسىنىڭ» فينالدىق باسەكەسىندە باق سىناپ، جۇمانازار  قولا جۇلدەگەر اتانعان بولاتىن.

سولتۇستىك قازاقستان وبلىسىندا رۋستام جۇماەۆقا تەڭ كەلەر ەشكىم جوق. 2012 جىلى «كورەرمەندەر كوزايىمى» جۇلدەسىن يەلەنگەن رۋستاممەن بىرگە، داۋرەن ەسلياموۆ وبلىس نامىسىن قورعايدى.

اتىراۋ وبلىسى دا ءوز ۇزدىكتەرىن انىقتادى. «قازاقستان بارىسىنىڭ» وتكەن ماۋسىمىندا  بەلدەسكەن سۇڭعات زاكارياەۆ بۇل جولى دا توپتان وزدى. سونداي-اق، كۇمىس جۇلدە تاعىنعان بەكبولات سالىقوۆ تا

 فينالدا باق سىنايدى.

ماڭعىستاۋ وبلىسىندا  جاس بالۋان مەيرامبەك جاڭاباي جەڭىمپاز اتانسا، فينالعا بەرىلەتىن ەكىنشى جولداماعا ماناس يمانقۇلوۆ يەلىك ەتتى.

ەستەرىڭىزگە سالا كەتەيىك،  بۇگىنگە دەيىن «قازاقستان بارىسى» جوباسىنىڭ فينالىنا رۋسلان ابدىرازاقوۆ پەن ايبەك سەرىكبايۇلى (قىزىلوردا وبلىسى), ارمان ابەۋوۆ پەن نۇرعالي بايتاراقوۆ (استانا قالاسى), بەيبىت ىستىباەۆ پەن داۋلەتحان جاقىپوۆ (جامبىل وبلىسى), اسىلحان بارمەنوۆ پەن بەكزات احمەتبەكوۆ (قاراعاندى وبلىسى), نۇرسۇلتان يمانعازين مەن رۇستەم بۋرباەۆ (اقتوبە وبلىسى) جانە  دارحان جولامانوۆ پەن باتىرحان جۇنىسوۆتەر (پاۆلودار وبلىسى) جولداما العان بولاتىن.

«قازاقستان بارىسى» جوباسىنىڭ فينالدىق سىنى 29 ماۋسىم كۇنى استاناداعى «سارىارقا» ۆەلوترەگىندە وتەدى.

«قازاقستان بارىسى» قازاق كۇرەسىن دامىتۋ قورىنىڭ ءباسپاسوز قىزمەتى