سەيسەنبى, 28 مامىر 2024
Abai.kz 15 جىل! 937 14 پىكىر 15 ءساۋىر, 2024 ساعات 13:11

بۇگىن «Abai.kz» اقپاراتتىق پورتالىنىڭ تۋعان كۇنى!

«Abai.kz» اقپاراتتىق پورتالىنىڭ دوكتريناسى: «ءبىز، قازاقتىڭ ءبىر توپ جاس ساياساتكەرلەرى، عالىمدارى مەن جۋرناليستەرى، كەڭ بايتاق وتانىندا باسىم ۇلتقا اينالعان قازاق جۇرتىنا ارناپ «Abai.kz» اقپاراتتىق پورتالىن اشىپ، ەلىنىڭ بۇگىنى مەن بولاشاعىن ويلاعان ازاماتتاردىڭ بارلىعىن وسى رەسۋرستىڭ اينالاسىنا بىرىگىپ، ەركىن وي مەن پاراساتتى پىكىر ايتۋعا شاقىرامىز»، - دەپ باستالادى.

2009 جىلى 15 ساۋىردە اقپارات كەڭىستىگىنە شىققان «Abai.kz» اقپاراتتىق پورتالى وسى كۇندەرى راسىمەن-اق، ەلىنىڭ بۇگىنى مەن بولاشاعىن ويلاعان ازاماتتاردىڭ ايبارلى مىنبەرىنە، ەركىن پىكىرلى الاڭىنا اينالدى.

ءسوز بوستاندىعى، وي ازاتتىعى دەموكراتيالىق قوعامنىڭ ەڭ باستى قۇندىلىعى بولعانىمەن، ءباسپاسوز سالاسىنداعى جۋرناليستەردىڭ ەرىك-جىگەرى، تاباندىلىعى بولماسا، ول قۇندىلىقتىڭ قوعامنان ورىن تابۋى بەيمۇمكىن.

«Abai.kz» اقپاراتتىق پورتالى ەلىمىزدە ءسوز بوستاندىعىنىڭ بەرىك ورنىعۋىنا ۇلكەن ۇلەس قوستى، كۇن تارتىبىندە تۇرعان كۇردەلى ماسەلەلەردىڭ جاپپاي تالقىلانۋىنا جول اشتى. الايدا پورتال جالعان اقپارات تاراتىپ، جەڭىل سەنساتسيانىڭ جەتەگىنە ەرىپ، تانىمال بولۋعا ۇمتىلعان جوق. قاشاندا بايىپتى، بايسالدى ۇستانىمىنان تايماي وقىرمان اۋديتورياسىنىڭ سەنىمىنە يە بولدى. سايت بۇگىندە ەلىمىزدەگى مىقتى ساياساتكەرلەردىڭ، مادەنيەت پەن ونەر قايراتكەرلەرىنىڭ، ۇكىمەتتەگى جاۋاپتى تۇلعالار مەن پارلامەنت دەپۋتاتتارىنىڭ ويىن بىلدىرەتىن باستى الاڭعا اينالعان.

«Abai.kz» اقپاراتتىق پورتالى 2013 جىلى حالىقارالىق «Awards» سىيلىعىن الىپ، قازاقستانداعى ەڭ ۇزدىك قازاق ءتىلدى اقپاراتتىق سايت اتاندى. بۇدان بولەك، قر پرەمەر-ءمينيسترىنىڭ، قر مادەنيەت جانە سپورت ءمينيسترىنىڭ، قر اقپارات جانە كوممۋنيكاتسيالار ءمينيسترىنىڭ، قر ىشكى ىستەر ءمينيسترىنىڭ «العىس حاتتارىمەن»، وزگە دە رەسپۋبليكالىق جانە حالىقارالىق سىيلىقتارمەن ماراپاتتالعان.

«Abai.kz» اقپاراتتىق پورتالى ۇلتتىڭ مۇرات-ماقساتىنا سەرگەك قاراپ، كولدەنەڭ ماسەلەنىڭ قاندايىنا بولماسىن دەر كەزىندە ءۇن قاتىپ كەلەدى. سوندىقتان بولار، مەملەكەتتىك، ۇلتتىق مۇددە كۇن تارتىبىنە شىعا قالعان كەزدە وقىرمان كوپتەگەن باسىلىمنىڭ ىشىنەن «Abai.kz-تە» جاريالاناتىن ماقالالارعا جۇگىنەدى. «Abai.kz» پورتالىندا  قاشاندا قىزۋ پىكىرتالاس، شىنايى تالقى قوعامدىق پىكىردىڭ قازانىندا قايناپ، وزەكتى ماسەلەلەر كوتەرىلىپ، ءار سالانىڭ ماماندارى ءوزارا كەڭەس قۇرىپ جاتادى.

«Abai.kz» اقپاراتتىق پورتالىندا جاريالانعان ماقالالاردىڭ ەلدىڭ تالقىسىنا ءتۇسىپ، قازاقستان پرەزيدەنتى مەن قۇزىرەتتى ورگانداردىڭ نازارىنا ىلىگىپ، ماسەلەنىڭ وڭىنان شەشىلىپ جاتاتىنى وسىنىڭ ايعاعى.

Abai.kz اقپاراتتىق پورتالى 2017 جىلى يميدجدىك برەندىن، سايتتىڭ جالپى ديزاينىن تولىق جاڭالادى. قازاقستاندىق «New Ideas Solution» LLC IT كومپانياسىنىڭ ماماندارى سايتتىڭ موبيلدىك نۇسقاسىن جاسادى.

بۇدان بولەك، سايت ماتەريالدارى «Facebook»، «Instagram»، «ۆكونتاكتە» الەۋمەتتىك جەلىلەرىندەگى «Abai.kz» رەسمي پاراقشالارىندا قوسىمشا جاريالانىپ تۇرادى.

سايتتىڭ نەگىزگى بەتىندە «جاڭالىقتار»، «ساياسات»، «قوعام»، «بيلىك»، «ەكونوميكا»، «ايماق»، «الەۋمەت» جانە «Abai.tv» ايدارلارى ورنالاسقان. مۇندا سايتتاعى ساياسي، ەكونوميكالىق، قوعامدىق، الەۋمەتتىك ماقالالار مەن كۇندەلىكتى جاڭالىقتار ال، «ايماق» ايدارىندا قازاقستاننىڭ وڭىرلەرىندەگى جاڭالىقتار جاريالانىپ تۇرادى.

«Abai.tv» پاراقشاسىندا ەل ىشىندەگى جانە حالىقارالىق ماڭىزدى اقپاراتتاردىڭ بەينە نۇسقاسى مەن تاريحي، ادەبي تانىمدىق روليكتەر ۇزبەي جاريالانىپ كەلەدى.

بۇدان بولەك قازاقتىڭ ويشىل اقىنى اباي قۇنانبايۇلىنىڭ ادەبي مۇراسىنىڭ تولىق نۇسقاسى، ابايتانۋعا قاتىستى بارلىق عىلىمي شىعارمالار، ەستەلىكتەر، قازاقتىڭ ارعى-بەرگى قالامگەرلەرىنىڭ ۇزدىك تۋىندىلارى، الاش ارداگەرلەرىنىڭ ۇلت مۇددەسى جولىنداعى ساياسي كۇرەسكە تولى ءومىربايان دەرەكتەرى وسى «Abai.kz» اقپاراتتىق پورتالىنىڭ باي مۇراعات قورىندا جاتىر.

«Abai.kz» اقپاراتتىق پورتالىنداعى كورىلىم سانى 2 ملن. 200 مىڭنان اسادى. بۇل – پورتالىمىزدا جاريالانعان ماقالالاردىڭ وقىلىمدى ەكەنىنىڭ ءسوزسىز ايعاعى.

تاۋلىگىنە ورتا ەسەپپەن 30 مىڭعا جۋىق وقىرماندى قامتيتىن پورتال قازاقستان اۋماعىندا عانا ەمەس، اقش، انگليا، فرانتسيا، جاپونيا قىتاي، موڭعوليا، مالايازيا، سينگاپۋر، تۇركيا، رەسەي سەكىلدى الەمنىڭ ۇلكەن مەملەكەتتەرىنەن دە ءوز وقىرمانىن تاپقان.

«Abai.kz» اقپاراتتىق پورتالىنىڭ تۋعان كۇنىمەن، 15 جىلدىعىمەن بارشا وقىرمان قاۋىمدى قۇتتىقتايمىز!

Abai.kz

14 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2392
ادەبيەت

«سولاي ەمەس پە؟»

عابباس قابىشۇلى 2721
قوعام

دوس كوپ پە، دۇشپان كوپ پە؟

ءابدىراشيت باكىرۇلى 3110
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1792