سۋ تاسقىنى قاۋىپىنە بايلانىستى قوستانايدا توتەنشە جاعداي رەجيمى جاريالاندى. وڭىرگە قازاقستاننىڭ تج ءمينيسترى شىڭعىس ءارىنوۆ باردى.

قوستاناي اكىمى مارات جۇندىباەۆ سۋ تاسقىنىنا بايلانىستى تج رەجيمىن جاريالادى. تاسقىن سۋدىڭ شارىقتاۋ كەزەڭى بۇگىن بولادى دەپ بولجانعان.

«ويتكەنى توبىل وزەنىنىڭ دەڭگەيى كوتەرىلىپ كەلەدى. قاراتومار سۋ قويمسىنان سۋ جىبەرۋ سەكۋندىنا 2640 تەكشە مەترگە دەيىن ۇلعايتىلدى. قاراتوماردان شىققان سۋ تۇستەن كەيىن بىزگە جەتەدى. ياعني، بۇل – قالانىڭ ماڭىنان سەكۋندىنا شامامەن 3 جارىم مىڭ تەكشە مەتر سۋ اعىپ وتەدى دەگەن ءسوز. 2000 جىلى قاراتومار سەكۋندىنا 1700 تەكشە مەتر سۋ جىبەرگەن. ال بۇگىن سۋ اعىنى سەكۋندىنا 4 مىڭ تەكشە مەترگە دەيىن جەتۋى ابدەن مۇمكىن»، - دەدى قوستاناي قالاسىنىڭ اكىمى مارات جۇندىباەۆ.

قالا اكىمى توتەنشە جاعدايدىڭ وسى قاۋىپتىڭ الدىن الۋ ءۇشىن ەنگىزىلىپ جاتقانىن ايتتى. قوستانايدا 1000-نان استام ادامدى قابىلداي الاتىن 20 شاقتى ەۆاپۋنكت دايىندالعان.

Abai.kz