جاقىندا ۋكراينا قارۋلى كۇشتەرءى العاش رەت مايدان شەبىنەن 1300 شاقىرىم قاشىقتىقتا ورنالاسقان تاتارستانداعى قوس نىسانعا قوس بۇيىردەن سوققى جاسادى. «الابۇعا» ارنايى ەكونوميكالىق ايماعىنداعى يراندىق ۇلگىدەگى «شاحەد» دروندارىن قۇراستىرۋشى زاۋىتقا جانە نيجنەكامسكىدەگى مۇناي وڭدەۋ زاۋىتىنا جاسالعان سوققى تۋرالى پورتالىمىزدا ەگجەي-تەگجەيلى جازعان ەدىك.

«BILD» ساپشىلارىنىڭ پىكىرىنشە، ۋكراينا قارۋلى كۇشتەرىنىڭ ەندىگى كوزدەپ وتىرعان نىسانى – رەسەيدىڭ مۋرمانسك وبلىسىنداعى اسكەري بازالار بولۋى مۇمكىن. اقپارات ءۇشىن: بۇل بازالاردىڭ مايدان شەبىنەن ۇزاقتىعى – 2 مىڭ شاقىرىمعا جۋىقتايدى.

رەسەي پروپوگانداشىلارى تاتارستانعا جاسالعان سوققىنى سىلتاۋراتىپ، ورتالىق ازيا، سونىڭ ىشىندە قازاقستانعا قاتارا ارانداتۋ جاساۋعا قانشا الەكتەنگەن ەدى. «تاتارستانداعى نىساندار ۋكراينا شەكاراسىنان 1300 شاقىرىمعا دەيىن ۇزاق. ۋكراينا دروندارى وسىنشا جەردى ەش كەدەرگىسىز باسىپ ءوتۋى مۇمكىن ەمەس. ال قازاقستاننىڭ سوتۇستىك-باتىسى تاتارستاننان 500 عانا شاقىرىمدا ورنالاسقان»، - دەگەن ارگۋمەنتتەردى ايتقان. بۇعان قر قورعانىس مينيسترلىگى دەرەۋ جاۋاپ بەرىپ، ايتىلعان اقپاراتتىڭ شىندىققا جاناسپايتىنىن مالىمدەگەن.

ال ساراپشىلار تاتارستانداعى دىتتەگەن نىساندارعا ۋكراينا سوققىنى UJ-22 دەيتىن موديفيكاتسيالىقعان ۋكراينالىق دروندارمەن جاساعانىن ايتادى.

«BILD» اقپاراتى بويىنشا، بيىل ۋكراينا ۇزاقتىعى 2000 كم جانە ودان دا الىس نىساندارعا سوققىلاردى ۇدەتە تۇسپەك. ويتكەنى، بيىل ۋكراينا قك ساپىنا 2,5 مىڭ شاقىرىم قاشىقتىققا دەيىن ۇشا الاتىن دروندار پارتيا جەتكىزىلەدى دەپ كۇتىلۋدە.

ال كيەۆتىك «لۋچ» كونسترۋكتورلىق بيۋروسى 3300 شاقىرىمعا دەيىن ۇشاتىن «سوكول-3000» پيلوتسىز ۇشاعىن ازىرلەدى. ساراپشىلار پىكىرىنشە، بۇل دروندار ءدال مۋرمانسكىدەگى نىساندارعا سوققى جاسايتىن بولادى. ال وندا 80-گە جۋىق اسكەري بازا ورنالاسقان. ولاردىڭ قاتارىندا ۋكراينانى اتقىلاپ جاتقان ستراتەگيالىق بومبالاۋشىلار ورنالاسقان «بۇعى» اۋەايلاعى دا بار. بۇل بازالار مايدان شەبىنەن 2000 كم استام قاشىقتىقتا ورنالاسقان.

سوڭعى ۋاقىتتا ۋكراينا قك ستراتەگيالىق اۆياتسيا ورنالاسقان رەسەيلىك اسكەري وبەكتىلەردى جويۋ بويىنشا ءساتتى وپەراتسيالار جۇرگىزۋدە. بۇگىن تۇندە ۋكراينالىق ۇشقىشتار «ەنگەلس» اۋەجايىنا شابۋىل جاسادى، وندا ۋكراينا اۋماعىن قاناتتى زىمىراندارمەن اتۋ ءۇشىن پايدالانىلاتىن تۋ-95 جانە تۋ-22 اۋىر بومبالاۋشىلار بازاسى ورنالاسقان.

سونىمەن قاتار روستوۆ وبلىسىندا ورنالاسقان «موروزوۆسكى» اۋە ايلاعىنا دروندار شابۋىلى ۇيىمداستىرىلىپ، 6 دانا سۋ-24, سۋ-24م، سۋ-34 بومبالاۋشى ۇشاقتارىنىڭ كوزى جويىلدى.

Abai.kz