قازاقستان رەسپۋبليكاسى تۋريزم جانە سپورت مينيسترلىگىنىڭ حابارلاۋىنشا، فرانتسيا استاناسى پاريجدە الاۋى تۇتاناتىن جازعى وليمپيا ويىندارىنىڭ باستالۋىنا دا ساناۋلى ايلار قالدى. جانكۇيەرلەر تاعاتسىزدانا كۇتكەن ءتورت جىلدىقتىڭ باستى سپورتتىق وقيعاسى بيىل 26 شىلدە مەن 11 تامىز ارالىعىندا وتەدى.

فرانتسيا جەرىندەگى دوداعا الەمنىڭ 205 ەلىنەن 10 مىڭنان استام سپورتشى قاتىسادى دەپ جوسپارلانعان. پاريجدەگى باسەكەدە 32 سپورت تۇرىنەن 329 مەدال جيىنتىعى ساراپقا سالىنادى. قازاقستان ۇلتتىق قۇراماسى سپورتتىڭ 20 تۇرىنەن قاتىسۋدى جوسپارلاپ وتىر.

قازىرگى تاڭدا قازاقستان دەلەگاتسياسىنىڭ قورجىنىندا پاريج وليمپياداسىنىڭ 11 سپورت تۇرىنەن 31 ليتسەنزياسى بار (بوكس (ەرلەر) – 6, نىسانا كوزدەۋ – 5, ساداق اتۋ – 4, سەمسەرلەسۋ – 4, تاس جولداعى ۆەلوسپورت – 3, قازىرگى بەسسايىس – 2, تاەكۆوندو – 2, بوكس (ايەلدەر) – 1, گرەك-ريم كۇرەسى – 1, ەركىن كۇرەس – 1, سپورتتىق گيمناستيكا – 1, باتۋتتاعى گيمناستيكا – 1).

ليتسەنزيا سانىن وڭىرلەر ۇلەسىنە بولەر بولساق، الماتى، شىمكەنت قالالارى مەن جەتىسۋ وبلىسى ۇزدىك ناتيجەمەن كوش باستاپ تۇر. ۇشەۋىنىڭ دە ەنشىسىندە بەس جولدامادان بار. كەيىنگى ورىندارعا شقو (4), استانا قالاسى (3), جامبىل (2), سقو (2), اقمولا (1), قىزىلوردا (1), اباي (1), قاراعاندى (1) جانە تۇركىستان وبلىستارى (1) جايعاسقان. ال قالعان وڭىرلەردە وليمپيادانىڭ بىردە-ءبىر جولداماسى جوق.

ايتا كەتەيىك، وليمپيا ويىندارىنا دەيىن ءالى 50-دەن اسا ليتسەنزيالىق جارىس بار. ونىڭ ىشىندە سپورتشىلارىمىز الەم چەمپيوناتتارى، ازيا چەمپيوناتتارى جانە  رەيتينگتىك تۋرنيرلەرگە قاتىسادى.

Abai.kz