سەيسەنبى, 28 مامىر 2024
اقمىلتىق 1408 12 پىكىر 9 ءساۋىر, 2024 ساعات 20:53

Abai.kz پورتالى ەلىمىزدىڭ سۋ باسقان ايماقتارىنا گۋمانيتارلىق كومەك جىبەردى

بيىل - Abai.kz اقپاراتتىق پورتالىنا 15 جىل. 2009 جىلى 15 ساۋىردە اقپارات كەڭىستىگىنە شىققان Abai.kz اقپاراتتىق پورتالى وسى كۇندەرى ەلىنىڭ بۇگىنى مەن بولاشاعىن ويلاعان ازاماتتاردىڭ ايبارلى مىنبەرىنە، الامان پىكىرلى الاڭىنا اينالدى.

ءبىزدىڭ ۇجىم وسى ءبىر دوڭگەلەك داتاعا ورايلاستىرىپ بىرقاتار ءىس-شارالار جوسپارىن ازىرلەگەن. الايدا توسىننان بولعان تاسقىن سۋ رەسپۋبليكامىزدىڭ ونداعان ءوڭىرىن باسىپ، ەلىمىز توتەنشە جاعدايدى باستان كەشىرۋدە.

مۇنداي الاعاي دا بۇلاعاي ۋاقىتتا Abai.kz اقپاراتتىق پورتالى دا توي-تويلاپ جاتۋدى ءجون سانامادى. ءۇي-جايىن سۋ باسقان اعايىننىڭ مۇڭى – ءبىزدىڭ مۇڭ. «جۇمىلا كوتەرگەن جۇك جەڭىل»، دەگەن. سول سەبەپتى، Abai.kz اقپاراتتىق پورتالىنىڭ ۇجىمى ەلىمىزدىڭ سۋ باسقان ايماقتارىنداعى اعايىنعا گۋمانيتارلىق كومەك جونەلتۋدى ءجون دەپ تاپتى.

سۋرەت: Abai.kz

داۋرەن قۋات،

«اباي-اقپارات» قوعامدىق قورى، «Abai.kz» اقپاراتتىق پورتالىنىڭ پرەزيدەنتى:

– ات اۋىزدىعىمەن سۋ ءىشىپ، ەر ەتىگىمەن سۋ كەشكەن تار زامانعا تاپ بولىپ تۇرمىز. ەلىمىزدىڭ باسىنا قيىن-قىستاۋ كەزەڭ كەلدى. بۇل بىزگە ۇلكەن سىناق بولىپ تۇر. وسىنداي كەزدە قارلىعاشتىڭ قاناتىمەن سۋ سەپكەندەي ءبىر كومەگىمىز، جاردەمىمىز بولسىن دەپ، قارعىن سۋ قاپتاعان ايماقتارعا Abai.kz اقپاراتتىق پورتالىنىڭ ۇجىمى اتىنان ازىق-تۇلىگىمىزدى جىبەرىپ وتىرمىز.

بيىل Abai.kz اقپاراتتىق پورتالىنىڭ 15 جىلدىعى ەدى. وسىعان وراي ءوزىمىزدىڭ ارىپتەستەرىمىزدىڭ، تىلەۋلەس جاقىندارىمىزدىڭ ورتاسىندا وتىرىپ، 15 جىلدىعىمىزدى اتاپ وتەمىز بە دەپ ويلاعانبىز. بىراق، مىناداي جاعدايدا توي تويلاۋعا بولمايدى. 15 جىلدىققا جوسپارلاعان ءىس- شارالارىمىزعا دەگەن قاراجاتقا ازىق-تۇلىك، كەرەك-جاراق الىپ، سۋ جايىلعان ايماقتارداعى ەلگە جىبەرۋدى ءجون كوردىك.

ءبىز مۇنى جارناما ءۇشىن ايتىپ وتىرعان جوقپىز. وقىرمانىمىز، قالىڭ ەلىمىز بولماسا ءبىز كىمگە كەرەكپىز؟ ەلىمىز امان بولسىن! ەل ىرگەسى ءبۇتىن بولسىن! وزگە ارىپتەستەرىمىز ءبىزدىڭ وسى باستامامىزدى ءىلىپ اكەتىپ، ءسوز كومەگىن دە، قول كومەگىن دە بەرەدى دەپ ويلايمىز.

سۋرەت: Abai.kz

نۇرگەلدى ابدىعانيۇلى،

Abai.kz اقپاراتتىق پورتالىنىڭ باس رەداكتورى:

– ەلىمىزدىڭ باتىس، سولتۇستىك، شىعىس ايماقتارىندا قارعىن سۋدان زارداپ شەگىپ جاتقان اعايىنداردىڭ مۇڭى – ءبىزدىڭ مۇڭ. Abai.kz اقپاراتتىق پورتالىنىڭ گۋمانيتارلىق كومەگى ەلىمىزدىڭ باتىس ايماعىنا جونەلتىلگەلى وتىر.

ءبىز ءوزىمىزدىڭ 60 وتباسىنا ارنالعان گۋمانيتارلىق كومەگىمىزدى الماتى قالاسىندا ورنالاسقان ەرىكتىلەر شتابىنا جەتكىزىپ تاپسىرىپ، سونداعى فرونت-كەڭسە ەرىكتىلەرىنىڭ كومەگىمەن اتىراۋ وبلىسىن بەتكە الىپ بارا جاتقان جۇك كولىگىنە تيەدىك.

سۋ باسقان ايماقتارداعى اعايىننىڭ سۇراۋى جانە ەرىكتىلەر شتابىنىڭ كەڭەسى بويىنشا، گۋمانيتارلىق كومەك رەتىندە ازىق-تۇلىك (الىس جولعا جارامدى), تۇرمىستىق جانە جەكە گيگيەنالىق زاتتار ساتىپ الىندى.

Abai.kz رەسپۋبليكالىق-اقپاراتتىق پورتالى ەل باسىنا تۇسكەن قازىرگىدەي قيىن كەزەڭدەردە ازاماتتىق، قوعامدىق باستامالاردان تىس قالعان ەمەس. بۇل قيىندىقتا دا ەل بولىپ جۇمىلىپ، اپاتتى ەڭسەرۋ ءبىزدىڭ قولىمىزدان كەلەدى. ەلىمىز امان، جۇرتىمىز تىنىش بولسىن!

سۋرەت: Abai.kz

باعدات انارباەۆا،

الماتى قالاسى ەرىكتىلەر شتابىنىڭ جەتەكشىسى:

– بۇگىن جۇك كولىگىنە تيەلگەن گۋمانيتارلىق كومەكتەر اتىراۋ وبلىسىنا جونەلتىلەدى. سونداعى ەرىكتىلەر شتابى وبلىس اۋماعىنا ءبولىپ تاراتادى.

ءبىزدىڭ شتابىمىزدا كۇن سايىن 150-گە جۋىق ەرىكتى جۇمىس جاساپ جاتىر. ودان بولەك بىزگە اسكەري كۋرسانتتار كەلىپ كومەكتەسۋدە. قازىر شتابتىڭ جۇمىسىنا قالامىزدىڭ 20-عا جۋىق قوعامدىق ۇيىمدارى جۇمىلدىرىلعان.

وسى قيىندىق باستالعان ساتتەن باستاپ 10 توننا گۋمانيتارلىق كومەكتى ورالعا جىبەردىك. بۇگىن اۋەتاسىمالى ارقىلى اتىراۋ وبلىسىنا ءبىرىنشى پارتيا گۋمانيتارلىق كومەك جونەلتىلدى. قازىر جۇك كولىگى ارقىلى 30 توننا كومەك جىبەرىلىپ جاتىر. سىزدەردىڭ اماناتتارىڭىز سول جۇك كولىگىنە تيەلىپ، كومەككە ءزارۋ جانداردىڭ قولىنا تيەتىن بولادى.

Abai.kz اقپاراتتىق پورتالىنىڭ گۋمانيتارلىق كومەگى: (فوتوبايان)

 

سۋرەتتەردىڭ اۆتورى: داريعا اسقار

Abai.kz

12 پىكىر

ۇزدىك ماتەريالدار

قۇيىلسىن كوشىڭ

باس گازەت ورالماندارعا نەگە شۇيلىكتى؟

ءالىمجان ءاشىمۇلى 2393
ادەبيەت

«سولاي ەمەس پە؟»

عابباس قابىشۇلى 2721
قوعام

دوس كوپ پە، دۇشپان كوپ پە؟

ءابدىراشيت باكىرۇلى 3110
ەل ءىشى...

ۇلتتىق بىرەگەيلەنۋ: قانداستاردىڭ ءرولى قانداي؟

ءومارالى ادىلبەكۇلى 1792