ادامنىڭ ويلاۋ قابىلەتىن دامىتىپ، تاپقىرلىققا تاربيەلەيتىن ۇلتتىق ويىنىمىز توعىزقۇمالاق – مۇحيتتىڭ ارعى جاعىندا دا تانىمال سپورت ءتۇرى. وسى زياتكەرلىك ويىندى لاتىن امەريكاسىنا العاش وسكار فاحاردو ەسىمدى ازامات تانىستىرعان، - دەپ حابارلايدى 24.kz.

ول توعىزقۇمالاق تۋرالى تۇڭعىش رەت 2005 جىلى بىلگەننەن كەيىن، ونىڭ ەرەجەسىن ينتەرنەت ارقىلى مەڭگەرىپ العان. سوسىن اعاش شەبەرىنە توعىزقۇمالاق تاقتاسىن جاساتىپ تا الىپتى.

2008 جىلى دۇنيەجۇزىلىك توعىزقۇمالاق فەدەراتسياسى قۇرىلعاننان باستاپ وسكار فاحاردو كولۋمبيا اتىنان بىرنەشە حالىقارالىق سايىسقا قاتىسىپ، جۇلدەگەر دە اتاندى.

«بۇل ويىندا مەنى قاتتى قىزىقتىرعانى تۇزدىق ەرەجەسى. قارسىلاستىڭ وتاۋىن يەمدەنىپ الاتىن وسى ءبىر ەرەكشەلىك ويىندى ناعىز ستراتەگيالىق مايدانعا اينالدىرادى. سونداي-اق، ورتالىق ازيا حالىقتارىنىڭ مادەنيەتىمەن تانىسۋدىڭ تىڭ جولى بولعاندىقتان، ءارى جەكە فەدەراتسياسى بار سالماقتى ويىن ءتۇرى بولعان سوڭ قىزىعۋشىلىعىم ارتا بەردى»، - دەيدى توعىزقۇمالاقتان 200-گە جۋىق شاكىرت تاربيەلەگەن وسكار فاحاردو.

توعىزقۇمالاق ويناۋمەن 2019 جىلدان بەرى اينالىساتىن تاعى ءبىر كولۋمبيالىق ازامات حەرمان گونزالەس ويىننىڭ زياتكەرلىك قۇندىلىعىن جوعارى باعالايدى. قوعامدىق كىتاپحاناداعى توعىزقۇمالاق ۇيىرمەسىنە جەتەكشىلىك ەتەتىن ول بۇل ويىندى وقىتۋدىڭ بەلسەندى تاسىلدەرىن قولدانعىسى كەلەتىنىن ايتتى.

«ءداستۇرلى وقىتۋداعىداي كىتاپ، داپتەرمەن شەكتەلمەي، زياتكەرلىكتى دامىتاتىن ويىنداردى باعدارلامالارىمىزعا قوسىپ جاتىرمىز. وزدەرى دە قىزىققان سوڭ مەن ۇيرەتۋدەن جالىققان ەمەسپىن. بۇل ولاردىڭ ويلاۋ قابىلەتىنە پايدالى. شاكىرتتەرىممەن توعىزقۇمالاقتان كولۋمبيا قۇراما كومانداسىنا قوسىلىپ، ءتۇرلى جارىستارعا قاتىسامىز. بالالار جۇلدەمەن ورالىپ ءجۇر. وسكار فاحاردو رەكوردىن جاڭارتار مىقتىلاردى تاربيەلەپ جاتىرمىز», - دەدى ول.

توعىزقۇمالاق فەدەراتسياسى – ۇلتتىق سپورت قاۋىمداستىعىنىڭ سەرىكتەسى. قاۋىمداستىق قۇرامىندا «بايگە»، «كوكپار»، «اۋدارىسپاق»، «تەڭگە ءىلۋ»، «ساداق اتۋ»، «جامبى اتۋ»، «قۇسبەگىلىك»، «اسىق اتۋ»، «JORYQ» ات سپورتى فەدەراتسيالارى بار. قر ۇلتتىق سپورت قاۋىمداستىعىن بەلگىلى كاسىپكەر، مەتسەنات، «Altyn Qyran Foundation» قوعامدىق قورى قامقورشىلىق كەڭەسىنىڭ توراعاسى يسلامبەك سالجانوۆ باسقارادى.

Abai.kz