بەيسەنبى, 18 ءساۋىر 2024
انىق-قانىعى 1329 13 پىكىر 19 اقپان, 2024 ساعات 13:32

رەسەيدىڭ شىعىنى: 200 ملرد دوللار جانە 315 مىڭ ادام

سۋرەت: ankasam.org

كرەمل سوعىسقا 200 ميلليارد دوللار جۇمسادى جانە 315 مىڭ ادامىنان ايىرىلدى - پەنتاگون.

رەسەي ارمياسىنىڭ ۋكرايناعا باسىپ كىرۋى ماسكەۋگە 211 ميلليارد دوللار شىعىن اكەلدى. اقش قورعانىس مينيسترلىگىنىڭ جوعارى لاۋازىمدى وكىلىنىڭ ايتۋىنشا، رەسەي ۋكراينامەن ەكى جىلدىق سوعىستا 211 ميلليارد دوللار (19,5 تريلليون رۋبل) جۇمساعان.

رەسەيدىڭ وسى سوعىستا 2026 جىلعا دەيىن قارقىندى ەكونوميكالىق وسىمنەن ايىرىلعانىن ەسكەرسەك، پۋتين سوعىستى باستاماسا، بۇنداي كەلەڭسىز قۇبىلىس ورىن الماس ەدى، وسىلايشا ۋكرايناعا باسىپ كىرۋ رەسەيگە 1,3 تريلليون دوللار شىعىن اكەلدى.

ەگەر كرەمل ۋكرايناعا سوعىس اشپاعاندا رەسەي ەكونوميكاسى 5%-عا ارتۋى مۇمكىن بولاتىن. بىراق قازىر بۇل ەكونوميكالىق ءوسىمنىڭ كەلمەسكە كەتكەنىن Reuters اقپارات اگەنتتىگى پەنتاگوننىڭ جوعارى لاۋازىمدى شەنەۋنىگىنە سىلتەمە جاساپ حابارلادى.

رەسمي مالىمەت بويىنشا، رەسەيدىڭ قازا تاپقاندار مەن جارالانعاندار سانى 315 مىڭ ادامعا جەتكەن. بۇل 2022 جىلدىڭ 24 اقپانىنا دەيىنگى قورعانىس مينيسترلىگىنىڭ قول جەتىمدى بولىپ وتىرعان جەكە قۇرامنىڭ شامامەن 87 %-ىن قۇرايدى.

رەسەي شىعىندارىن سانامالاپ كورسەتسەك: - اسكەرلەردى جابدىقتاۋ: قارۋ-جاراق، بروندى ماشينالار، وق-دارىلەر جانە باسقا دا اسكەري ماتەريالدار ساتىپ الۋ; - اسكەرلەردى ورنالاستىرۋ: اسكەرلەردى تاسىمالداۋعا، اسكەري بازالار مەن لاگەرلەردى قۇرۋعا كەتكەن شىعىندار. - اسكەرلەردى ۇستاۋ: تاماققا، كيىم-كەشەككە، مەديتسينالىق قىزمەتكە جانە ت. ب.

بۇل اقشانىڭ بارلىعىن رەسەيدىڭ ينفراقۇرىلىمى مەن ەكونوميكاسىن دامىتۋعا جۇمساۋعا بولار ەدى، بىراق بۇل قارجى سوعىس قاندى وڭەشىنە جۇتىلىپ كەتتى. رەسەي ارمياسىنىڭ ۋكرايناداعى شىعىنىنىڭ ناقتى سانى بەلگىسىز، ويتكەنى ماسكەۋ بۇل اقپاراتتى قۇپياعا اينالدىردى.

كەرىمسال جۇباتقانوۆ

Abai.kz

13 پىكىر