الەمدىك اقپارات كوزدەرى تۇركيانىڭ جەرگىلىكتى باسىلىمىنا سىلتەمە جاساپ، رەسەي پرەزيدەنتى ءپۋتيننىڭ اقپاننىڭ 12-قۇنى تۇركياعا رەسمي ساپارمەن باراتىنىن جارىسا جازعان ەدى.

جەكسەنبى كۇنى تۇركيا سىرتقى ىستەر ءمينيسترى حاكان فيدان بۇل اقپاراتتى راستاپ: «بۇل رەتكى كەزدەسۋ ەكى تاراپقا كوپتەگەن تولعاقتى ماسەلەلەردى تالقىلاۋعا جاقسى وراي»، - دەگەن. بىراق ۋاقىتىن ناقتىلاماعان.

ونىڭ مالىمەتىنشە، ساپار بارىسىندا پۋتين مىرزا تۇركيا پرەزيدەنتى ەردوعانمەن كەزدەسىپ، ۋكراينا استىعىن قارا تەڭىز ارقىلى ەكسپورتقا شىعارۋدىڭ جاڭا جولىن تالقىلاماق. تۇركيا ءسىم باسشىسىنىڭ سوزىنشە، «بۇرىنعى استىق ەكسپورت كەلىسىمى بەلگىلى ءبىر نەگىزدە جاسالعان، قازىر ونى جاڭارتۋ قاجەتى تۋىپ تۇر».

ۋكرايناعا قارسى سوعىس باستاعان ەكى جىلدان بەرى كرەمل باسشىسىنىڭ سوعىسقا ناتو-نى ايىپتاۋمەن كەلگەنى بەلگىلى. تۇركيانىڭ اتالمىش اسكەري ۇيىمعا مۇشە ەكەنىن ەسكەرسەك، پۋتين مىرزا باتىسپەن اراسى ۋشىققان ەكى جىلدان بەرى بىرىككەن ناتو اسكەرىنىڭ قورعاۋىنداعى ەلگە العاش اياق باسقالى وتىر.

كانىگى ساياساتكەر ەردوعان مىرزا سوعىس باستالعالى بەرى جاۋلاسقان ەكى سلاۆيان ەلىنىڭ ەكەۋىمەن دە ساياسي، ەكونوميكالىق قاتىناسىن ۇزبەي كەلەدى.

ايتىپ-ايتپاي، حاماس يزرايلگە باسىپ كىرىپ، قاقتىعىس ليۆان، يراق، سيريا، قىزىل تەڭىزدى شارپىپ، اسكەري وپەراتسيالارعا اقش پەن انگليا ارالاسىپ، تاياۋ شىعىستاعى جاعداي ۋشىققاننان كەيىن، پۋتين مىرزانىڭ ءورىسى كەڭەيىپ سالا بەردى.

ودان بۇرىن حالىقارالىق ىزدەۋدەن قورقىپ، الەمدىك باسقوسۋلارعا ونلاين قاتىسىپ كەلسە، ورتا ازيانى ايتپاعاندا، قىتايعا، اراب مەملەكەتتەرىنە بارىپ قايتتى.

ءپۋتيننىڭ الداعى تۇركيا ساپارى ەردوعانعا سىني كوزقاراسپەن قارايتىن ەۋروپالىق ارىپتەستەرىنە ۇناماعانمەن، ناۋرىزداعى سايلاۋدا قايتا اتقا مىنۋدەن ءۇمىتتى كرەمل قوجايىنى ءۇشىن زور جەتىستىك بولعالى تۇر.

ەسبول ۇسەنۇلى

Abai.kz