پرەزيدەنت بايدەننىڭ الدىندا 4 جىل اق ءۇيدى باسقارعان ترامپ «امەريكانى تاعى دا قۇدىرەتتەندىرۋ» ۇرانىمەن كەلگەنى بەلگىلى.

ول كەزىندە ناتو-نى، بۇۇ مەن ددس ۇيىمىن امەريكاعا «ماسىل» بولىپ وتىر دەپ ايىپتاپ، ولاردان شىعاتىنىن مالىمدەگەن ەدى. امەريكاداعى بيىلعى پرەزيدەنت سايلاۋىندا ترامپ بايدەنگە تاعى دا بىردەن-ءبىر قارسىلاس بولايىن دەپ وتىر.

«قايتا سايلانسام كەزىندە قىتايعا قارسى باستاعان «ساۋدا سوعىسىن» اقىرىنا دەيىن جەتكىزىپ، قىتايمەن ەكونوميكالىق بايلانىستى ءبىر جولاتا ۇزەمىن»، - دەپ وتىرعان ترامپتىڭ سايلاۋ الدى باعدارلاماسىنان ەۋروپادا ءىش تارتىپ وتىر ەكەن.

امەركانىڭ «ساياسي حابارلار» سايتىنىڭ جازۋىنشا، ەۋروپانىڭ دۇرلىگۋىنە ەۋرووداقتىڭ اسكەري ءوندىرىسىن دامىتۋعا 100 ميلليارد ەۋرو ءبولۋ كەرەك ەكەنىن ايتقان ەۋروكەڭەستىڭ ىشكى ساۋدا كوميتەتىندەگى لاۋازىمدى تۇلعانىڭ ترامپتىڭ 2020 جىلعى «داۆوس» ەكونوميكالىق فورۋمىندا ەۋروكەڭەس توراعاسىنا: «مىنانى ءبىلىپ قويىڭدار، ەۋروپا شابۋىلعا ۇشىراسا ءبىز ماڭگى كومەكتەسپەيمىز، قولداۋ دا بىلدىرمەيمىز. ناتو ءولدى، ءبىز ودان شىعامىز. سەندەر اسكەري ۇيىمعا مىندەتتى قارجىنى اۋدارمادىڭدار، بىزگە 400 ميلليارد دوللار قارىزسىڭدار» دەپ ايتقان ءسوزىن ەل ەسىنە سالعانى سەبەپ بولعان ەكەن.

وعان بىردەن جاۋاپ قاتقان بايدەننىڭ سايلاۋ كوميسياسىنىڭ باسشىسى: «ترامپتىڭ سايلاۋعا تۇسۋگە لايىق ەمەس ەكەنى وسىدان-اق بەلگىلى. ونىڭ ءبۇل ءسوزى امەريكانىڭ قاۋىپسىزدىگى مەن الەمدىك بەدەلىنە نۇقسان كەلتىرەدى» دەگەن. سايلاۋشىلارمەن كەزدەسۋدەن قولى بوساماي جۇرگەن ترامپ بۇل داۋعا بايلانىستى: «ناتو-عا كومەك بەرۋدى ولاردىڭ كەلەشەكتە بىزگە ۇستانعان پوزيتسياسى شەشەدى» دەگەن.

ەۋروپا باسىلىمدارى «ترامپ بيلىككە كەلسە ۋكرايناعا كومەكتى توقتاتىپ، گەوساياسي جاعدايدى قيىنداتادى، اقش ەكونوميكاسىن قورعاۋ شارالارىن كۇشەيتىپ، وزدەرىنە باسىمدىق بەرەدى» دەپ جارىسا جازىپ جاتىر ەكەن.
امەريكاداعى سوڭعى مالىمەتتەر بويىنشا بايدەن مەن ترامپتىڭ سايلاۋشىلار اراسىنداعى قولداۋ كورسەتكىشى قارايلاس بولىپ، 48 پايىزدان يەلەنگەن.

Abai.kz