ەكۆاردوردا جەرگىلىكتى قىلمىس توبىنىڭ ليدەرىنىڭ تۇرمەدەن قاشىپ كەتۋى سەبەبىنەن ەلدە قاقتىعىسىس پايدا بولىپ، ونداعان ادام قازا تاپتى. قازا بولعاندار اراسىندا پوليتسەيلەر دە بار. بۇل تۋرالى ەكۆاردور پرەزيدەنتى دانيەل نوبوا مالىمدەدى.

ەلدە دۇربەلەڭ ورىن الىپ، بيلىك بۇلىكتى اسكەر كۇشىمەن باسۋدى قولعا الدى. ەل اۋماعىندا توتەنشە جاعداي جاريالاندى.

ەلدىڭ قارۋلى كۇشتەرىنىڭ قولباسشىسى حايمە ۆەلا بۇيرىقتا كورسەتىلگەن ءار تەررورلىق توپتىڭ اسكەريلەردىڭ نىسانىندا ەكەندىگىن، سونداي-اق ەكۆادور استاناسى كيتودا تانكىلەر قويىلعانىن مالىمدەدى. نوبوا ءوز بۇيرىعىندا بۇلىككە جاۋاپتى 21 توپتى كورسەتىپ، ولاردىڭ كوزىن جويۋدى تاپسىرعان.

ال پوليتسيا قازىرگى تاڭدا تارتىپسىزدىككە قاتىسقان 20 شاقتى ادامدى ۇستاعان.

9 قاڭتار كۇنى بەتپەردە جامىلعان بىرنەشە توپ ادام گۋاياكيل قالاسىنداعى «TC Televisión» تەلەارناسىنىڭ كەڭسەسىنە قارۋمەن باسىپ كىرىپ، بىرنەشە ءجۋرناليستى كەپىلگە العان. جاعداي 15 مينۋت بويى تىكەلەي ەفيردە تاراتىلىپ، كادردا تىپتەن اتىس داۋىسى دا ەستىلگەن.

ارتىنشا ەلدىڭ ارنايى قىزمەتى تەلەارنانى قورشعاۋعا الىپ، شابۋىلداۋشىلاردى ۇستاعان. «Associated Press» اگەنتتىگىنىڭ جازۋىنشا، ولاردان قارۋلار مەن جارىلعىش زاتتار تاركىلەگەن.

بۇعان دەيىن دە اتالمىش قارۋلى توپ گۋاياكيل قالاسىنداعى پوليتسيا بولىمشەلەرىنە، مەكتەپتەر مەن ۋنيۆەرسيتەتتەرگە شابۋىلداپ، پوليتسەيلەر مەن تۇرمە قىزمەتكەرلەرىن ۇرىپ جاتقان ۆيدەولاردى دا تاراتقان.

ارتىنشا تەررورلىق دەپ تانىلعان «Los Choneros» بانديتتىك توبىنىڭ ليدەرى ادولفو ماسياس ۆيليامار تۇرمەدەن قاشىپ كەتكەن. ەلدەگى توتەنشە جاعدايعا بايلانىستى ەل پرەزيدەنتى نوبوا كومەندانتتىق ساعات ەنگىزدى.

قازىرگى ۋاقىتتا ەكۆادوردا قازاقستاننىڭ جەتى ازاماتى كونسۋلدىق ەسەپتە تۇر. ولاردىڭ بارلىعى امان-ەسەن. قازاقستان سىرتقى ىستەر مينيسترلىگى: «ەكۆادورداعى تارتىپسىزدىكتەن زارداپ شەككەندەر جوق»، - دەپ مالىمدەدى.

«ولاردان باسقا، بۇل ەلگە تۋريستەر رەتىندە كەلگەن ءۇش ادامنان تۇراتىن وتباسى بار. كونسۋل ارقايسىسىنا قوڭىراۋ شالىپ، قاۋىپسىزدىك شارالارى تۋرالى نۇسقاۋ بەردى جانە ولارمەن ۇنەمى بايلانىستا بولدى. قر ازاماتتارىنىڭ ەشقايسىسى زارداپ شەككەن جوق»، - دەدى قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

داريعا ەرجانقىزى

Abai.kz