رەسەيدىڭ ءتۇرلى دەڭگەيدەگى ساياساتكەرلەرى سوڭعى 5-10 جىلدىقتا بۇرىنعى كەڭەس وداعىنىڭ رەسپۋبليكالارىنا قاتىستى يمپەرياليستىك پيعىلداعى مالىمدەمەلەردى جيىلەتتى.

اسىرەسە قازاقستاننىڭ سولتۇستىگىنە قاتىستى رەسەي ساياساتكەرلەرى: «كسرو-دان شىققان مەملەكەتتەر كسرو تاراعان كەزدە ورىستىڭ جەرلەرىنە قارق بولعان! قازاقستاننىڭ سولتۇستىگى رەسەيدىڭ جەرى»، - دەگەن سوزدەردى از ايتقان جوق.

ەندى مىنە، كۇنى كەشە عانا ورىستىڭ جازۋشىسى، كەلەر جىلعى پرەزيدەنت سايلاۋىنداعى «پۋتين كومانداسىنىڭ» وكىلى زاحار پريلەپين: «ۋكراينادان سوڭ وزبەكستاندى جانە باسقا بۇرىنعى كسرو-دان شىققان مەملەكەتتەردى رەسەيگە قوسىپ الۋىمىز كەرەك»، دەپ مالىمدەدى.

بۇعان وزبەكستاننىڭ پارلامەنتى مەن ءتۇرلى دەڭگەيدەگى ساياساتكەرلەرى قاتۋ جاۋاپ بەرىپ جاتىر. وزبەكستاننىڭ سىرتقى ىستەر مينيسترلىگى رەسەيدىڭ وزبەكستانداعى ەلشىسى ولەگ مالگينوۆتى مينيسترلىككە شاقىرىپ، سوگىس ايتقان.

ءبىر كۇن بۇرىن «ادىلەتتى رەسەي – شىندىق ءۇشىن» پارتياسىنىڭ تەڭ توراعاسى زاحار پريلەپين: «بىزگە گاستاربايتەرلەر كەلىپ جاتقان ايماقتاردى قوسىپ الىپ، ادامداردى سول جەرلەردە، مىسالى وزبەكستاندا وقىتۋ كەرەك دەپ ەسەپتەيمىن.

ۋكرايناداعى سوعىستا ىقتيمال جەڭىسكە جەتكەننەن كەيىن، رەسەيگە بۇرىنعى كسرو ايماقتارىن تالاپ ەتۋگە ەشكىم تىيىم سالا المايدى. مەن قالجىڭداپ تۇرعان جوقپىن. ءبىز بۇل تاقىرىپتى كوتەرەمىز. ءوز كەزەگىندە بۇل بىزگە قالاعان ۋاقىتتا «ءبىزدىڭ ەكى ميلليون ازاماتىمىز سىزدەردىڭ ايماقتا جۇرگەندىكتەن، ءبىز بۇل ايماقتى تالاپ ەتسەك بولادى» دەپ ايتا الامىز»، – دەگەن مالىمدەمە جاساعان.

مالىمدەمەگە جاۋاپ رەتىندە وزبەكستاننىڭ ءسىم-ءى رەسەي ەلشىسىن شاقىرىپ، ايتىلعان مالىمدەمەلەردىڭ وزبەكستان مەن رەسەيدىڭ تاريحي دوستىق كەلىسىمىنە كەسىرىن تيگىزۋى مۇمكىن ەكەنىگىن ەسكەرتتى.

رەسەي ەلشىسى ءوز كەزەگىندە: «جازۋشى پريلەپيننىڭ ايتقاندارى كرملدىڭ رەسمي پوزيتسياسى ەمەس»، - دەپ اقتالدى.

داريعا ەرجانقىزى

Abai.kz