سارسەنبى, 21 اقپان 2024
بيلىك 1317 1 پىكىر 24 قاراشا, 2023 ساعات 13:25

ءماجىلىس سپيكەرى: ادىلەتتى قازاقستان – اڭىز ەمەس

ەلىمىزدە جۇرگىزىلىپ جاتقان رەفورمالارعا نەگىزدەلگەن «ادىلەتتى قازاقستان» دەگەنىمىز نە؟ ءماجىلىس توراعاسى ەرلان قوشانوۆ «كازاحستانسكايا پراۆدا» گازەتىنە پرەزيدەنت قاسىم-جومارت توقاەۆتىڭ ۇلىقتاۋ ءراسىمىنىڭ ءبىر جىلدىعىنا وراي بەرگەن سۇحباتىندا ويلارىمەن ءبولىستى.

– ادىلەتتى قازاقستان – قيالي ماقسات ەمەس. پرەزيدەنت بۇل تۋرالى ايتقاندا، بولاشاقتىڭ بەينەسىن كورەگەندىكپەن كورسەتىپ بەردى. ول – ازاماتتار تۇرعىلىقتى نەمەسە شىققان جەرىنە قاراماستان، ساپالى الەۋمەتتىك ينفراقۇرىلىمعا بىردەي قول جەتكىزە الاتىن ەل. ءتارتىپ پەن زاڭ ۇستەمدىگى سالتانات قۇراتىن مەملەكەت. ادامنىڭ كەدەي نەمەسە باي بولۋىنا قاراماستان، تەڭ مۇمكىندىكتەردى قامتاماسىز ەتەتىن، بارلىق ازاماتتىڭ ءوسۋى مەن ءوزىن-ءوزى دامىتۋىنا قاجەتتى جاعداي جاسالعان جەر، – دەدى ەرلان قوشانوۆ.

ءماجىلىس توراعاسى مەملەكەت ءوز ازاماتتارىنىڭ لايىقتى ءومىر ءسۇرۋى مەن ادال ەڭبەك ەتۋى ءۇشىن جاعداي جاساۋى قاجەتتىگىن، بىراق بۇل رەسۋرستاردى ءبولۋ دەگەندى بىلدىرمەيتىنىنە باسا نازار اۋداردى.

– ءار ەلدىڭ رەسۋرسى شەكتەۋلى. بىراق بارىنە تەڭ جاعداي جاساۋ – ءبىزدىڭ باستى ءارى تىكەلەي ماقساتىمىز. بالالاردىڭ بارلىق جەردە جوعارى ساپالى ءبىلىم الۋى، مەديتسينانىڭ تەحنولوگيالىق تۇرعىدا دامىعان جانە بارىنە قولجەتىمدى بولۋى، كاسىپكەرلەر ءبىر قۇقىقتىق الاڭدا بولۋى جانە ارتىق پايدا تابۋ ماقساتىمەن ەشكىمگە زاڭنامالىق نەمەسە اكىمشىلىك ارتىقشىلىقتار بەرىلمەۋى ءۇشىن بىرقاتار سالاداعى تەڭسىزدىكتى جويۋىمىز كەرەك. مىنە، وسىنداي قوعامدى ءادىل دەپ اتاۋعا بولادى، – دەيدى توراعا.

ءماجىلىس سپيكەرى بيىلدان باستاپ جەمقورلاردىڭ اقشاسىنا مەكتەپ سالۋ وسىنداي ادىلدىكتىڭ ۇلگىسى دەپ اتادى. ونىڭ پىكىرىنشە، بۇل الەۋمەتتىك ادىلدىكتى قالپىنا كەلتىرۋ تۋرالى پرەزيدەنت تۇجىرىمداماسىن جۇزەگە اسىرۋعا بىردەن-ءبىر سەپتىگىن تيگىزەدى.

 – ويتكەنى بيۋدجەتتى جىمقىرعاندار بالالارىمىز بەن كەلەر ۇرپاقتان ۇرلاپ وتىر. ءبىزدىڭ مىندەتىمىز – ونى ۇرپاققا قايتارۋ. جاڭا بۋىن باسەكەگە قابىلەتتى، بىلىكتى بولىپ ءوسۋى ءۇشىن بارلىعىن جاسايمىز. بۇگىندە بۇل ماقساتقا 150 ملرد تەڭگە ءتۇسىپ، ەل اۋماعىندا 70 مەكتەپتىڭ قۇرىلىسى ءجۇرىپ جاتىر. دەپۋتاتتار وسى مەكتەپتەردىڭ زاماناۋي، جايلى، ءبىلىم بەرۋگە جانە جاڭا ءبىلىم بەرۋ تەحنولوگيالارىن قولدانۋعا قابىلەتتى بولۋىن قاداعالايدى، – دەدى ە.قوشانوۆ.

سونداي-اق وسىنداي مىسال رەتىندە ءماجىلىس سپيكەرى پرەزيدەنتتىڭ «ۇلتتىق قور بالالارعا» باعدارلاماسىن، جىلۋ ەلەكتر ستانتسيالارى مەن ينجەنەرلىك جەلىلەردى جاڭعىرتۋ، جايلى مەكتەپتەر، اۋرۋحانالار مەن جولدار سالۋدى اتاپ ءوتتى.

– بۇگىندە ۇكىمەت بيۋدجەت پەن ينۆەستيتسيانى جوسپارلاۋداعى ولقىلىقتاردىڭ ورنىن تولتىرۋ ءۇشىن كوپ جۇمىس اتقارىپ جاتىر. جىلدار بويى ءتيىستى كوڭىل بولىنبەگەن ماسەلەلەردى قولعا الدىق. جانە بۇل ادەمى مەگاجوبالار مەن ءزاۋلىم عيماراتتار ەمەس، ادامداردىڭ كۇندەلىكتى ءال-اۋقاتىنا تىكەلەي بايلانىستى ومىرلىك ماڭىزدى نىساندار، – دەلىنگەن سۇحباتتا.

ەرلان قوشانوۆ اۋىل تۇرعىندارىنىڭ تابىسىن ارتتىرۋعا باعىتتالعان «اۋىل اماناتى» باعدارلاماسى دا ادىلەتتىڭ ۇلگىسى ەكەنىن ايتتى.

– «2025 جىلعا دەيىن پرەزيدەنتتىڭ سايلاۋالدى باعدارلاماسىنا سايكەس ءبىز قازاقستاندىقتاردى 100 پايىز اۋىز سۋمەن قامتاماسىز ەتۋىمىز كەرەك. اۋىلدىق جەرلەردە 700 مەديتسينالىق مەكەمە سالۋ جوسپارلاندى. ال بۇل – اتقارىلىپ جاتقان ىستەردىڭ ءبىر بولىگى عانا، – دەدى ءماجىلىس توراعاسى.

Abai.kz

1 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1512
ءالىپبي

لاتىن جايى

بيجومارت قاپالبەك 1559