جۇما, 23 اقپان 2024
بۇگىنگى ساتيرا 1143 1 پىكىر 9 قاراشا, 2023 ساعات 13:03

پرەزيدەنتتەر ءشاي ءىشىپ كەتتى...

سۇللىكتەي قارا «دجيپتەر» تۋرا ءبىزدىڭ مىج–تىج شاپكى سياقتى جاپىرەيگەن ءۇيىمىزدىڭ الدىنا توقتاي قالىستى.

اۋزىمىزعا ايۋ كىرىپ كەتەيىن دەپ تۇرعانىمىزدا، ماسساعان، ءوزىمىزدىڭ پرەزيدەنت كەلە جاتىر! قاسىندا وزبەكستان، تۇرىكمەنستان، ازەربايجان، ءتىپتى، كورشى تۇركيا پرەزيدەنتى... – تۇگى جوق سورلىبايوۆتىڭ ءۇيى وسى ما؟ – دەپ سۇرادى ءوزىمىزدىڭ پرەزيدەنت. – ي–يا... – دەدىم مەن مىڭگىرلەپ. – ءبىز قىدىرىپ كەلىپ تۇرمىز! – ۇيگە كىرىڭىزدەر، جوعارىلاتىڭىزدار! – دەپ ايەلىم قالبالاقتاي جۇگىرىپ، ۇيگە كىرىپ كەتتى. ءسۇرىنىپ، قابىنىپ ءجۇرىپ، تورگە جىرتىق-جاماۋ كورپە جايدى. داستارحان جايىپ، قۇرت شاشتى، باۋىرساقتان ءۇيدى. تىسىڭە جابىسىپ قالاتىن ارزان كامپيتتەردەن قويدى.

نە كەرەك، تابان استىندا تىرناعىمىزعا دەيىن دىرىلدەپ، ابىگەرگە تۇستىك. ەندى قايتەيىك، ۇيىمىزگە شاقىرساڭ دا، شاتىناساڭ دا كەلتىرە المايتىن پرەزيدەنتتەر كەلىپ وتىر عوي! كورشىلەرىمىز پرەزيدەنتتەردى كورگىسى كەلىپ، كەلگىسى كەلىپ ەدى، وق قاعارلار ءبىر ادىم جولاتپادى. – كەشىرىڭىز، قاراپايىم حالىقتىڭ ۇيلەرىنە قىدىرىپ كەلگىمىز كەلدى. جاعدايلارىڭىزدى بىلگىمىز كەلدى، – دەدى ءوزىمىزدىڭ پرەزيدەنت. – جاعداي وسى. كۇنىمىز قاراڭ، پەنسياعا كەلگەندە ۇكىمەت ساراڭ، – دەپ كەلە جاتىر ەدىم، ايەلىم سانىمنان وڭدىرماي شىمشىپ الدى... سوسىن مەن ىرجالاقتاپ: – دەي سالعىم كەلمەيدى... – دەدىم. – جاعدايىڭىز قالاي؟ – دەدى تۇركيا پرەزيدەنتى ءشاي ءىشىپ جاتىپ. – قالاي بولسا، سولا... – دەي بەردىم مەن. سوسىن: – جاڭا قازاقستان دەپ قويامىز، بىراق سول باياعى جارتاس... – دەپ قويدىم.

ايەلىم سانىمنان تاعى شىمشىپ قالدى. ەرىپ كەلگەن وبلىس اكىمى: – جارتاستاردى وزگەرتۋگە بولمايدى. تابيعاتتى ايالاۋىمىز كەرەك، – دەدى. – ا، يا، قۇرت سورىپ وتىرىڭىزدار... قارا كوجەگە ەت تابا الماي، ۇياتتى بولىپ وتىرمىز. سويا سالاتىن تەنتەك تەكەمىز دە جوق... – دەدى ايەلىم. – ۇرتى باردىڭ، قۇرتى بار، جاقسى ەكەن، – دەپ تامساندى تۇركيا پرەزيدەنتى. – «جوق، جوق» دەگەنمىز جاراسپاس، قازاقستان تەمىر جولىنىڭ ۆاگوندارىندا تاراقاندارىمىز وتە كوپ، شۇكىر، – دەپ قالدىم مەن. ايەلىم سانىمنان وڭدىرماي شىمشىعانى. جىم بولدىم.

– ويپىرماي-ءا؟ ءبىزدىڭ ەلدە ۆاگوندار زاماناۋي، – دەدى وزبەكستان پرەزيدەنتى ماقتانىپ. – قتج جەمقورلىققا بەلشەسىنەن باتقان، سسسر كەزىندەگى ەسكى ۆاگوندار، ۆوكزال، ستانتسيالارداعى الاياقتىق، بيلەتتەردى قولدان جوق قىلىپ، اسىرا ساتۋشىلىق، – دەپ كەلە جاتىر ەدىم، ايەلىم تاعى دا سانىمنان...  اۋىرىپ كەتتى تەگى. پرەزيدەنتىمىز بلوكنوتىنا بىردەڭەلەردى ءتۇرتىپ الىپ جاتتى. شاماسى، قتج باسشىلارىنىڭ «ماسكاسىن» شەشەتىن بولدى!

سودان نە كەرەك، پرەزيدەنتتەر ءشاي ءىشىپ، پرەزيدەنتىمىز، باتا بەرىپ، ورىندارىنان تۇرىپ كەتتى. تۋ، زەينەتاقى العان كۇنى كەلگەندە عوي! داستارحانىم قاراپايىم بولىپ، ۇيالىپ قالدىق... پرەزيدەنتتەر كەتكەن سوڭ، شالبارىمدى شەشىپ قاراسام، سانىمنىڭ كوگەرمەگەن جەرى جوق. پىستە ماي جاعىپ قويدىم. سانىم-اي، سانىم...

مۇحتار شەرىم

Abai.kz

1 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1542
ءالىپبي

لاتىن جايى

بيجومارت قاپالبەك 1602