قاراشا ايىنىڭ 1-ءى كۇنى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ءى رەسپۋبليكالىق جاستار تەاترلارى فەستيۆالىنىڭ اشىلۋ سالتاناتى ءوتتى. اتالمىش ۇجىم بۇل فەستيۆالدى تەاتر الەمىندەگى جاس رەجيسسەرلەردىڭ جەتىستىكتەرىن ناسيحاتتاپ، ولاردىڭ كاسىبي الەۋەتىن ارتتىرۋ ماقساتىندا قر مادەنيەت جانە اقپارات مينيسترلىگىنىڭ قولداۋىمەن ۇيىمداستىرىپ وتىر.

سالتاناتتى شارانىڭ شىمىلدىعى قر مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ سوزىمەن اشىلدى. ونى مادەنيەت جانە اقپارات مينيسترلىگى مادەنيەت كوميتەتىنىڭ تەاتر ونەرى باسقارماسىنىڭ باسشىسى التىنگۇل جاقسىلىققىزى وقىپ بەردى.

«بارشاڭىزدى تالانتتى جاستاردى قولداۋ ماقساتىندا بيىل تۇڭعىش رەت ۇيىمداستىرىلعان ءى رەسپۋبليكالىق جاستار تەاترلارى فەستيۆالىنىڭ اشىلۋىمەن شىن جۇرەكتەن قۇتتىقتايمىن. ۇلت مادەنيەتى – حالىق ءومىرىنىڭ ايناسى. مادەنيەت پەن رۋحانيات كوشىنىڭ العا جىلجۋ جولىندا تالانتىمەن تالماي ەڭبەكتەنىپ، ايانباي قىزمەت ەتىپ جاتقان ۇجىمدار مەن جاستارىمىز جەتكىلىكتى. ولاردى قولداۋ ءبىزدىڭ باستى مىندەتتەرىمىزدىڭ ءبىرى ەكەنى بەلگىلى. بۇگىن ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىنىڭ قاسيەتتى قاراشاڭىراعىندا باستالعان بۇل فەستيۆال – سونداي يگى شارالاردىڭ جالعاسى. اسقاق الاتاۋ باۋرايىنداعى الماتى جۇرتشىلىعى ءبىر اپتاعا جۋىق ءار جانرداعى ساحنالىق كوركەم تۋىندىلارعا، سونداي-اق، تاڭداۋلى جاس رەجيسسەرلەردىڭ ەرەكشە سۋرەتكەرلىك قولتاڭباسىنا كۋا بولارىنا سەنەمىز. سىزدەردى تەاتر فەستيۆالىنىڭ اشىلۋىمەن تاعى دا قۇتتىقتاي وتىرىپ، قاتىسۋشى رەجيسسەرلەر مەن تەاتر ۇجىمدارىنا شىعارماشىلىق تابىس پەن جارقىن جەتىستىكتەر تىلەيمىن»، – دەلىنگەن قۇتتىقتاۋ-سوزدە.

تۇڭعىش رەت وتكىزىلىپ جاتقان فەستيۆالگە قاتىسۋ ءۇشىن ەلىمىزدىڭ تۇكپىر-تۇكپىرىندەگى 30-عا تارتا تەاتر ءوتىنىم جىبەرگەن ەكەن. ىرىكتەۋ ناتيجەسىندە 8 تەاتردىڭ ەڭ وزىق دەپ تانىلعان 8 سپەكتاكلى ساراپتاۋ ساتىسىنان ءوتىپ، فەستيۆالگە جولداما العان. مارەدەن كورىنگەن 8 سپەكتاكلدىڭ رەجيسسەرلەرى:  م.اۋەزوۆ اتىنداعى قازاق ۇلتتىق دراما تەاترىنىڭ رەجيسسەرى ءاريداش وسپانباەۆا، «ماسا» ستۋدەنتتىك تەاترىنىڭ اكتەرى، رەجيسسەرى الىبەك ومىربەكۇلى، ت.احتانوۆ اتىنداعى اقتوبە وبلىستىق دراما تەاترىنىڭ رەجيسسەرى مەيرام حابيبۋللين، ماسكەۋ قالاسىنداعى ە.ۆاحتانگوۆ اتىنداعى مەملەكەتتىك اكادەميالىق تەاتر مەن مۋزىكا جانە پوەزيا تەاترىنىڭ رەجيسسەرى گۇلناز بالپەيىسوۆا، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ اكتەرى، رەجيسسەر شاعۋان ۇمبەتقاليەۆ، «توتالنىي تەاتر» تەاترلىق كومپانياسىنىڭ رەجيسسەرى انتون زايتسەۆ، رەسپۋبليكالىق مەملەكەتتىك كورەيا اكادەمياسى مۋزىكالىق كومەديا تەاترىنىڭ رەجيسسەرى اننا تسوي، استانا قالاسى اكىمدىگىنىڭ «جاستار» تەاترىنىڭ اكتەرى، رەجيسسەر شىڭعىس جاقىپباي.

شارا بارىسىندا تەاتر ونەرىنىڭ ارداگەرلەرى مەن قايراتكەرلەرى فەستيۆالگە جولداما العان سەگىز رەجيسسەرگە العىس حات پەن 1 ميلليون تەڭگەنىڭ سەرتيفيكاتىن تابىس ەتتى.

Abai.kz