كەشە، ياعني قازان ايىنىڭ 16-سى كۇنى، استانادا ستاندارتتاۋ جونىندەگى كەڭەيتىلگەن عىلىمي-تەحنيكالىق كەڭەس ءوتتى.

كەڭەستە قر ۇلتتىق ستاندارتتارىنىڭ جوبالارى قارالدى، ونىڭ ىشىندە دەڭگەيلەر بويىنشا قازاق ءتىلىن مەڭگەرۋدىڭ كوممۋنيكاتيۆتىك تىلدىك قۇزىرەتتىلىكتەرى جونىندەگى جوبالار ماقۇلداندى. بۇل تۋرالى ساۋدا جانە ينتەگراتسيا مينيسترلىگى رەسمي حابارلادى.

وتىرىسقا قر ءماجىلىسى دەپۋتاتى، «اق جول» قدپ توراعاسىنىڭ ورىنباسارى قازىبەك يسا جارىلقاسىنۇلى، سونداي-اق قر ۇلتتىق تەستىلەۋ ورتالىعىنىڭ وكىلى ەرسۇلتانوۆا گۇلنۇر سەرىكبايقىزى قاتىستى.

ستاندارتتىڭ نەگىزگى ماقساتى – قازاق ءتىلىن مەڭگەرۋ دەڭگەيىن بەلگىلەۋ، سودان كەيىن قر ۇلتتىق تەستىلەۋ ورتالىعى تەستىلەۋدى وتكىزىپ، ءتيىستى سەرتيفيكاتتار بەرەدى.

«قازاقستان رەسپۋبليكاسىنداعى تiل تۋرالى» زاڭنىڭ قابىلدانۋىمەن بايلانىستى جوعارىدا اتالعان ازىرلەنگەن ستاندارتتار وتە قاجەت، ويتكەنى ولار جۇمىستى ناقتى رەگلامەنتتەر مەن تالاپتارعا سايكەس كەلتىرەدى»، – دەپ اتاپ ءوتتى ءماجىلىس دەپۋتاتى قازىبەك يسا.

مىندەتتى تەستىلەۋدەن ماگيستراتۋرا مەن دوكتورانتۋراعا تۇسەتىن ستۋدەنتتەر، مەملەكەتتىك اكىمشىلىك قىزمەتتىڭ «ا» ورگانىنىڭ كادر رەزەرۆىنە ەنگىزىلگەن قىزمەتكەرلەر،  «بولاشاق» حالىقارالىق ستيپەندياسىنا ۇمىتكەر تالاپكەرلەر، قر ۇلتتىق قاۋىپسىزدىك كوميتەتىنىڭ اكادەمياسىنا تۇسۋگە ۇمىتكەر ستۋدەنتتەر، «نازارباەۆ زياتكەرلىك مەكتەبىنىڭ» وقىتۋشىلارى وتەدى.

ايتا كەتەيىك، اتالمىش جوبانى قازستاندارت ازىرلەگەن، ال ول 2024-جىلدىڭ 1-قاڭتارىنان باستاپ قولدانىلۋى مۇمكىن.

Abai.kz