پاۆلودار وبلىسىنداعى «ەرتىس ورمانى» رەزەرۆاتىندا شىققان ءورت 850 گەكتار اۋماقتى قامتىدى. مۇنى ىشكى ىستەر مينيسترلىگى حابارلادى.

ءورت 15 شىلدەدە شارباقتى اۋدانىنىڭ ستەپنوە جانە باۋىرتال ورمانشىلىقتارىندا ورماننان شىققان. بۇگىن پاۆلودار وبلىسىنىڭ اكىمى اسايىن بايحانوۆ «ەرتىس ورمانى» رەزەرۆاتىنداعى ءورتتىڭ اۋىزدىقتالعانىن مالىمدەدى.

«قۇرمەتتى جەرلەستەر! بۇگىن ساعات 14:00-دە شارباقتى اۋدانىنداعى «ەرتىس ورمانى» رەزەرۆاتى اۋماعىنداعى تابيعي ءورت وقشاۋلاندى. الداعى بىرنەشە كۇندە ءورتتى تولىق ءسوندىرۋ جوسپارلانىپ وتىر. بۇل رەتتە ءورت وشاقتارىن انىقتاپ، ولاردىڭ قايتا تۇتانباۋىن قاداعالاۋ ماڭىزدى. سونىمەن قاتار ءتىلسىز جاۋمەن كۇرەسكە جۇمىلدىرىلعان ءورت سوندىرۋشىلەر مەن ورمانشىلارعا العىس بىلدىرەمىن»، - دەدى اسايىن بايحانوۆ ءوزىنىڭ Instagram پاراقشاسىندا جاريالاعان حابارلاماسىندا.

بۇعان دەيىن ءورتتىڭ رەسەي اۋماعىنا ءوتىپ كەتۋى مۇمكىن ەكەنى جاريالاندى.

«نايزاعاي ءتۇسۋ سالدارىنان پاۆلودار وبلىسىنداعى شارباقتى اۋدانى مەن اققۋلى اۋدانىنداعى دالا ورمانشىلىقتارىندا بىرنەشە ءورت شىقتى. ىستىق، قۇرعاق اۋا-رايى مەن ۇيىتقىعان جەل جاعدايدى ءورشىتىپ بارادى، ءورت 400 گەكتار جەرگە جايىلدى. تجد ءورتتىڭ رەسەي فەدەراتسياسىنىڭ اۋماعىنا ءوتۋ قاۋپى بار ەكەنىن حابارلادى»، – دەپ ءمالىم ەتتى پاۆلودار وبلىسى تج دەپارتامەنتى.

جاعدايدى باقىلاۋعا الۋعا وبلىس اكىمى اسايىن بايحانوۆ پەن توتەنشە جاعدايلار دەپارتامەنتىنىڭ باسشىلىعى ۇشىپ كەتتى.

16 شىلدەدە ءتىلسىز جاۋدىڭ رەسەي تەرريتورياسىنا ءوتۋ قاۋپى سەيىلدى. قازىر اتالعان اۋماققا 100-دەن استام تەحنيكا، 5 تىكۇشاق پەن 300-دەن استام ادام جۇمىلدىرىلعان. ءبىر تاۋلىكتە 22 رەت سۋ توگىلىپ، 66 تەكشە مەتر سۋ جۇمسالعان.

ءورتتى سوندىرۋگە استانا قالاسىنىڭ، قاراعاندى جانە شىعىس قازاقستان وبلىستارىنىڭ تجد كۇشتەرى جۇمىلدىرىلعان.

ءدال سول كۇنى، 15 شىلدەدە قازاقستاننىڭ شىعىسىندا دا ءورت شىقتى. اباي وبلىسى كوكەنتاۋ اۋىلدىق وكرۋگىندەگى تاۋلى ايماقتا قۋراعان ءشوپ ورتەندى. ونىڭ اۋدانى 3 مىڭ گەكتارعا جەتتى. وقيعا ورنىنا توتەنشە جاعدايلار ءمينيسترى سىرىم ءشارىپحانوۆ جەتتى.

شوشقالى كۋرورتىندا ءورت شىعۋىنا بايلانىستى اكىمدىك اباي وبلىسىنىڭ بەسقاراعاي اۋدانىندا توتەنشە جاعداي رەجيمىن ەنگىزدى جانە اۋدان تۇرعىندارىنا شوشقالى كولدەرىنە بارماۋدى ەسكەرتتى.

ءورتتى جويۋعا جەرگىلىكتى اتقارۋشى ورگانداردىڭ، اباي وبلىسى تجد جانە 68303 اسكەري ءبولىمىنىڭ كۇشتەرى مەن قۇرالدارى – بارلىعى 115 ادام جانە 18 تەحنيكا جۇمىلدىرىلدى.

بۇگىن ساعات 07:14 شاماسىندا ءورت باسىلدى.

بۇعان دەيىن اباي وبلىسىنداعى «سەمەي ورمانى» شارۋاشىلىعىندا شىققان ءىرى ءورت ءبىر ايدان اسا ۋاقىت وتكەندە تولىق سوندىرىلگەن بولاتىن. سول ورتتە 15 ادام قازا تاپتى، ءورت اۋدانى 60 مىڭ گەكتارعا جەتتى. 12 ماۋسىم قازاقستاندا قارالى كۇن بولىپ جاريالاندى.

باس پروكۋراتۋرا جۇمىسقا سالعىرتتىق جانە ءورت قاۋىپسىزدىگى تالاپتارىن بۇزۋ فاكتىسى بويىنشا قىلمىستىق ءىستى اشتى.

قاسىم-جومارت توقاەۆ توتەنشە جاعدايلار ءمينيسترى يۋري ءيليندى قىزمەتىنەن الىپ، ونىڭ ورنىنا سىرىم ءشارىپحانوۆتى قويدى.

كەيىنگى ۋاقىتتا قازاقستاندا ورمان ءورتى، قۋراعان ءشوپتىڭ ورتەنۋى كوبەيدى. كۇننىڭ ىستىعىنان، نايزاعايدىڭ تۇسۋىنەن كورسەك تە، ءورتتىڭ دەر كەزىندە وقشاۋلانباي تالاي جاننىڭ ءومىرىن قيعانىنىڭ سەبەپتەرى باسقادا. پرەزيدەنت اباي وبلىسىنا بارعان كەزدە كوپ بىلىقتىڭ بەتى اشىلعان. ورمانشىلاردىڭ جالاقىسىنىڭ ازدىعى، ولارعا قاجەت قۇرال-جابدىق، كولىكتىڭ جەتىسپەيتىندىگى، ءتىپتى راتسيالارى باتارەيامەن جابدىقتالماعاندىعى تۋرالى جەرگىلىكتى تۇرعىندار ايتىپ بەرگەن بولاتىن.

ءبىر جىل بۇرىن عانا شىعىس قازاقستان قۇرامىنان جەكە وبلىس بولىپ شىققان اباي وبلىسىنداعى ادام ءومىرىن جالماعان ءىرى ورتكە جەلى قولدانۋشىلارى بۇرىنعى اكىم دانيال احمەتوۆتى كىنالادى. ويتكەنى ونىڭ باسقارعان ۋاقىتىندا «سەمەي ورمان» شارۋاشىلىعىنا مەملەكەت قاراجات ءبولىپ، يگەرۋگە بەرگەن.

باس پروكۋراتۋرا بۇل ورتكە بايلانىستى تج جونىندەگى ەكس-مينيستر يۋري يلين، ەكولوگيا ءمينيسترى ءزۇلفيا سۇلەيمەنوۆا، سونداي-اق وبلىس اكىمى نۇرلان ۇرانحاەۆ جانە شىعىس قازاقستان وبلىسىنىڭ بۇرىنعى اكىمى دانيال احمەتوۆتەن جاۋاپ الىناتىنىن مالىمدەگەن ەدى.

Abai.kz