8 ماۋسىمدا اباي وبلىسىنداعى «سەمەي ورمانى» مەملەكەتتىك ورمان تابيعي رەزەرۆاتى اۋماعىندا شىققان الاپات ءورت قازىر 60 مىڭ گەكتارعا جەتتى. ءورت ءسوندىرۋ جۇمىستارى ءالى جالعاسىپ جاتىر.

شەتىن وقيعانىڭ حرونولوگياسى:

(سۋرەت قر تجم سايتىنان الىندى)

* مەملەكەت باسشىسىنىڭ جارلىعىمەن توتەنشە جاعدايلار ءمينيسترى يۋري ۆيكتوروۆيچ يلين قىزمەتىنەن بوساتىلدى. پرەزيدەنت جارلىعىندا ەندىگى ەكس-ءمينيستردىڭ ناقتى اباي وبلىسىنداعى ورتكە بايلانىستى قىزمەتتەن الىنعانى تۋرالى جازىلماعان.

* ۇكىمەتتە قر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن كەڭەستە اباي وبلىسىنداعى ءىرى تابيعي ءورتتى جويۋ شارالارى تالقىلاندى.

(سۋرەت: primeminister.kz)

* قازىرگى كەزدە اباي وبلىسىنداعى ءورتتىڭ جالپى اۋدانى 60 مىڭ گا-دان اسادى.

* ءورتتى سوندىرۋگە 800-گە جۋىق ادام، 190 تەحنيكا جانە 8 تىكۇشاق تارتىلعان.

* تجم دەرەكتەرىنە ساي، ءورت تاليتسا، كاشتاك، بارىشەۆكا، ۋسپەنكا، پودنەبەسنوە جانە كامىشەنكا ەلدى مەكەندەرىنە قاراي ءۇش باعىتتا تارالىپ جاتىر.

* ازاماتتار ءۇشىن ۋاقىتشا ورنالاستىرۋ ورىندارى جابدىقتالدى.

* 10 ماۋسىم تاڭعى ساعات 4-تە ءورت ورنىنا قاراعاندى مەن الماتى وبلىستارىنان اباي وبلىسىنا 52859 جانە 28237 اسكەري بولىمدەرىنىڭ قىزمەتكەرلەرى اتتاندى.

(سۋرەت اقوردادان الىندى)

*اباي وبلىسىنداعى الاپات ورتكە بايلانىستى مەملەكەت باسشىسى قاسىم-جومارت توقاەۆتىڭ 11-13 ماۋسىم كۇندەرى ۆەتنامعا جوسپارلانعان رەسمي ساپارى كەيىنگە شەگەرىلدى. ونىڭ ورنىنا پرەزيدەنت اباي وبلىسىنا بارادى.

* اباي وبلىسىنداعى ورتكە بايلانىستى جەدەل جەلى اشىلدى.

«اباي وبلىسىنداعى تابيعي ورتكە بايلانىستى جەدەل جەلى اشىلىپ، تجم جانە تجد پسيحولوگتارىنىڭ جۇمىسى ۇيىمداستىرىلدى: 8 7172 53 32 84, 8 722 235 38 31»، - دەپ جازىلعان ەكولوگيا جانە تابيعي رەسۋرستار مينيسترلىگى حابارلاماسىندا.

* 9 ماۋسىمدا الاپات ءورتتى سوندىرۋگە جەتىسۋ وبلىستىق توتەنشە جاعدايلار دەپارتامەنتىنىڭ قىزمەتكەرلەرى دە اتتاندى. توپ قۇرامىندا 20 ءورت ءسوندىرۋشى، 8 قۇتقارۋشى مەن 10 تەحنيكا بار.

* ءورت ءسوندىرۋ جۇمىستارى كەزىندە 3 قىزمەتكەر قازا تاپتى

*14 مامانمەن بايلانىس ءۇزىلدى. ولاردىڭ ءبارى قازا تاپتى دەگەن جالعان اقپارات شىقتى.

«الەۋمەتتىك جەلىلەر مەن مەسسەندجەرلەردە ءورت كەزىندە جوعالىپ كەتكەن ورمانشىلىقتىڭ بارلىق 14 قىزمەتكەرى ءولى تابىلدى دەگەن اقپارات تارالا باستادى. بۇل اقپارات شىندىققا جاناسپايدى. قر توتەنشە جاعدايلار مينيسترلىگى راستاعان رەسمي دەرەكتەرگە سايكەس، ورمان شارۋاشىلىعىندا قازا تاپقان ءۇش قىزمەتكەر عانا تابىلدى. تەك رەسمي اقپارات كوزدەرىنە سەنۋىڭىزدى سۇرايمىز»، - دەلىنگەن اكىمدىك مالىمەتىندە.

* 9 ماۋسىم ساعات 19:00-دەگى جاعداي بويىنشا اباي وبلىسىنىڭ بورودۋليحا اۋدانىنداعى ورمان ءورتىن سوندىرۋگە ءتۇرلى ۆەدومستۆولاردىڭ 786 قىزمەتكەرى، 187 تەحنيكا مەن 9 تىكۇشاق جۇمىلدىرىلدى.

«ساعات 18:00-دەن باستاپ بورودۋليحاداعى وستروۆسكي اتىنداعى مەكتەپ پەن كوللەدج عيماراتتارىندا ەكى ەۆاكۋاتسيا پۋنكتى ۇيىمداستىرىلدى»، - دەلىنگەن اباي وبلىسى اكىمدىگىنىڭ Telegram ارناسىندا جاريالانعان حابارلامادا.

* 9 ماۋسىم كەشكە سەمەيدە ورمان ورتىنە بايلانىستى قالا اكىمى نۇربول نۇرساعاتوۆتىڭ شەشىمىمەن توتەنشە جاعداي جاريالاندى.

* اباي وبلىسىنداعى ءورتتىڭ سەبەپشىسى – نايزاعاي. اباي وبلىسى اكىمىنىڭ ورىنباسارى ديميتري گاريكوۆ:

«8 ماۋسىم كۇنى ساعات 12:03-تە سەمەي قالاسىنان 25 شاقىرىمداي قاشىقتىقتاعى باتپاەۆ ورمان شارۋاشىلىعىنىڭ 66 كۆارتالىندا ءورت شىققانى تۋرالى حابار ءتۇستى. ءورت نايزاعايدىڭ 2 رەت سوعۋىنان شىققان. ءورتتى تەز ارادا اۋىزدىقتاۋ مۇمكىن بولمادى، وعان سەبەپ «سەمەي ورمانى» مەمەلەكەتتىك ورمان تابيعي رەزەرۆاتى تەحنيكاسى بيىك قۇم توبەلەرى ورنالاسقان ايماققا جەتە المادى. ءورت ورمان شارۋاشىلىعى ورنالاسقان جەردەن قاشىقتىعى 11 شاقىرىمدى السا، تەحنيكا جەتكەنشە ءورت اۋماعى 20 گەكتاردى قۇرادى. جوعارى تەمپەراتۋرا مەن قاتتى جەلدىڭ سالدارىنان ءورت ەكى ساعاتتىڭ ىشىندە 200 گەكتار اۋماقتى شارپىدى، - دەدى.

Abai.kz