ۋكراينا پرەزيدەنتى زەلەنسكي وتكەن سەنبى، جەكسەنبى، دۇيسەنبى كۇندەرى ەۋروپانىڭ جەتەكشى ءتورت ەلىندە قىسقا مەرزىمدە ساپاردا بولدى. ناتيجەسى اۋىز تولتىرىپ ايتارلىقتاي. ميللياردتاپ كومەك بەرگەن مەملەكەت باسشىلارىن ايتپاعاندا، ريم پاپاسىنىڭ ءوزى ۋكراينانىڭ تىلەۋىن تىلەپ وتىرعانىن جەتكىزدى.

ونىمەن سالىستىرعاندا ءبىر جىل بۇرىن عانا «الەمنىڭ ءنومىرى ەكىنشى اسكەري دەرجاۆاسى» دەپ اسپەتتەلگەن رەسەي پرەزيدەنتى ءپۋتيننىڭ كۇنى نەشىك؟! بىلتىر دا ەل ارالاپ، قىدىرعانى شامالى. ساياساتتانۋشىلار «رەسەيدىڭ ارتقى اۋلاسى» سانايتىن ورتا ازيادا عانا بولدى. وندا دا بەرەكە تاپپاي قايتتى. سامارقان سامميتىندە ءۇندىستان ۇكىمەتباسى مودە: «قازىر سوعىستىڭ زامانى ەمەس»، - دەپ بەتىنە ايتسا، استانا سامميتىندە تاجىكستان پرەزيدەنتى راحمانوۆ: «سەن بىزگە كەڭەس كەزىندەگىدەي قاراۋدى قوي»، - دەپ زاماننىڭ وزگەرگەنىن ەسىنە سالدى.

جاڭا جىلدان بەرى ەلدەن قارىس قادىم اتتاپ شىقپادى. اتتاپ شىعۋ بىلاي تۇرسىن، حالقارالىق گااگا سوتى «سوعىس قىلمىسكەرى» دەپ تانىپ، شارتسىز تۇتقىنداۋعا ۇكىم شىعاردى.

جەتىم قىزدىڭ تويىنداي بولىپ وتكەن ءپۋتيننىڭ كەزەكتى «9 مامىر» اسكەري پارادى دا كەڭەس زامانىنىڭ كەلمەسكە كەتكەنىن، قۇندىلىقتاردىڭ وزگەرگەنىن، دەرجاۆا ويىنىنىڭ اقىرلاسقانىن انىق كورسەتتى. كەزىندە فاشيزمگە قارسى تىزە قوسا سوعىسقان 14 رەسپۋبليكانىڭ جارتىسىنىڭ وكىلى عانا قاتىستى. ونىڭ الدىندا ماسكەۋگە قىتاي باسشىسى ساپارلاي كەلىپ كەتكەن ەدى. ول ساپار پۋتين كۇتكەندەي ءوزىنىڭ جەڭىسى ەمەس، قىتاي باسشىسىنىڭ پايداسىنا جازىلدى. كرەمل قوجايىنى ءپۋتيننىڭ بىلتىردان بەرگى سىرتقى ءورىسى وسىمەن عانا شەكتەلىپ تۇر.

ءپۋتيننىڭ جالعىزدىعى بىلتىر ۋكرايناعا اتالمىش «ارناۋلى وپەراتسياسىن» باستاعاندا ەلدەن ەرەكشە كوزگە تۇسكەن. ءوزىنىڭ قولباسشىلارىمەن، فرانتسيا پرەزيدەنتى ماكرونمەن كەزىككەندە ەكى باسى ارقان بويى ۇستەل قويعانىنان-اق بىردەن ايقىن بايقالعان. ونى ساتىپ كەتىپ، شەتەلگە باس ساۋعالاعاندار ونىڭ وقشاۋلانىپ، ەشكىمگە سەنبەيتىن بولعان ۋاقىتىن كورونا ۆيرۋستىڭ تارالۋىمەن بايلانىستىرادى. ءبىر رەت اۋىرىپ تۇرعان سوڭ ورىس باسشىسى ادامداردان بويىن اۋلاق ۇستاۋ قاعيداسىن بەرىك ۇستانعان. ونىڭ وسى وزگەلەرمەن بايلانىستا ارالىق ۇستاۋى، ورتادان وقشاۋلانۋى، انىعىندا جالعىزدىعى ولشەۋسىز سالدارعا كىرىپتار ەتكەن. جۇيەدەن وسى جولعى سوعىستا دا وڭباي جەڭىلۋىنە اكەلىپ سوققان. زەلەنسكي سياقتى ەل اراسىندا جۇرمەگەن سوڭ ناقتى فاكتىمەن ساناسا الماي، كوزى كولەگەيلەنىپ، اقيقي شىندىقتان الشاق، ءبىر جاقتى، جەكە دارا شەشىمدەر قابىلداۋمەن بولعان. قازىردە ءوز الەمىنەن شىققىسى كەلىپ تۇرعان جوق سياقتى. سىرتقى جانە ىشكى سەبەپتەردە وعان جار بەرەيىن دەپ تۇرعان جوق.

ۋكراينا تارابى شىعىس وڭتۇستىكتى قويىپ، سولتۇستىگىندەگى رەسەيدىڭ ءۇش وبلىسىن نىساناعا الا باستادى. ورىس اسكەرى جاۋلاپ العان ءتورت وبلىستا داۋالدار تۇرعىزىپ، جەر قازىپ، مىقتى بەكىنىس ورناتىپ العانى بەلگىلى. سونى بەس ساۋساعىنداي بىلگەن ۋكراين ستراتەگتەرى سولتۇستىكتەن شەپ اشىپ، پارتيزاندىق ۇرىس سالىپ، ونسىزدا سارقىلۋعا اينالعان رەسەيدىڭ اسكەري الەۋەتىن ءبىر جولاتا قۇرتپاقشى.

قىزىل الاڭدا وتكەن جەڭىس پارادى پۋتينگە از كەم ۋاقىت بولسا دا ءوزىن وقشاۋ ەمەستەي سەزىندىرگەنىمەن، ونىڭ جالعىزدىعىن ودان ارى ۇدەتەتىن ءتۇرى بار. ءوز جەرىنەن ۋكرايناعا سوعىس اشۋعا رۇقسات بەرگەن ءپۋتيننىڭ ەڭ ادال قولداۋشىسى لۋكاشەنكو ءالى ەس جيماي جاتسا، ورتا ازيا ەلدەرى باسشىلارى ءبىرى قالماي كۇنى ەرتەڭ قىتايعا بارادى. وندا ولاردى قىتايدىڭ ورىستىڭ دا كوز قۇرتىنا اينالعان ساۋدا كەلىسىمدەرى كۇتىپ تۇر.

ەسبول ۇسەنۇلى

Abai.kz