قيىرداعى قازاق وپپوزيتسياسى سىرتقا كەتكەن اكتيۆتەردى قايتارۋ ماسەلەسىن مىقتاپ قولعا الماق.

نازارباەۆ كلانىمەن جالاڭ قولمەن كۇرەسۋ قاۋىپتى. بۇعان ۋاشينگتوننىڭ پارمەنى مەن دەمەۋى قاجەت.

DALA INSIDE-قا جەتكەن اقپار بويىنشا قازاقستاننىڭ ەكس-پرەمەرى، شيرەك عاسىر بويىنا قيىر قونىپ، شەت جايلاپ جۇرگەن اكەجان ماعجانۇلى مامىردىڭ ورتاسىندا اقش استاناسىنا جول تارتادى.

اق ۇيدەگى ىقپالدى تۇلعالارمەن جۇزدەسۋدى جوسپارلاپ وتىرعان قاجىگەلدين نازارباەۆتىڭ توڭىرەگى، سونىڭ ىشىندە ەكس-پرەزيدەنتتىڭ كۇيەۋبالاسى تيمۋر قۇلىباەۆقا سانكتسيا سالۋدى تاباندى تۇردە تالاپ ەتپەك.

اتالعان تىزىمدە اتىشۋلى «مايشەكە»، الەكساندر ماشكەۆيچ تە بار.

قولدى بولعان اكتيۆتەردى قايتارۋ قورىن (KIAR) قۇرعان قاجىگەلدين مىقتى لوببيستكە مۇحتاج. بۇل ىسكە كونگرەستىڭ نازارىن اۋدارۋ وڭاي بولمايدى.

اكەجاننىڭ كومانداسى ۋاشينتونداعى ساياسي ورتادا اجەپتاۋىر سالماعى بار جوزەف سلاۆيكتىڭ تامىرىن باسىپ كورمەك.

سلاۆيك Scribe Strategies & Advisors لوببيستىك كومپانياسىنىڭ جەتەكشىسى.
قاجىگەلدينمەن بۇعان دەيىن دە كونتاكت ورناتقان.

ەكس-پرەمەردىڭ 2021 جىلدىڭ جەلتوقسانىنداعى ۋاشينگتون ساپارىنا سلاۆيكتىڭ سەپتىگى تيگەن. سول جولى اكەجان باستاعان قازاق وپپوزيتسياسى كونگرەسس مۇشەلەرىمەن قاۋقىلداسقان بولاتىن.

جوزەفتىڭ قازاقستانمەن بايلانىستى باسقا دا جۇمىسى جەتىپ ارتىلادى.

قازىر ول بولات نازارباەۆقا الدانىپ قالعان يسپان ينۆەستورلارى نەرۆيسا گەراردو ي توررەس مورانانىڭ اكتيۆتەرىن قايتارا الماي مۇرنىنان شانشىلىپ ءجۇر.

جوزەكەڭ اقش-تاعى شەتەل اكتيۆىن قاداعالاۋ كەڭسەسىنە (OFAC) بارىپ بوكەڭنىڭ ۇستىنەن ارىز تۇسىرگەن.

لوندوندا تۇراتىن قاجىگەلدينمەن قازاقستانداعى وپپوزيتسيا وكىلدەرى تۇراقتى بايلانىستا. قاجىگەلديننىڭ "قازاق اكتيۆتەرىن قايتارۋ" (KIAR) قورى مەن بولات ءابىلوۆتىڭ "ەلگە قايتارۋ" ۇيىمى ەتەنە بايلانىستا جۇمىس ىستەيدى. بۋتيانىڭ سەنىمدى ادامى، قارجىگەر ورازالى ەرجانوۆ ءساۋىردىڭ سوڭىندا بريتان استاناسىنا بارىپ، اكەجانمەن اڭگىمە-دۇكەن قۇرعان.

KIAR-عا كومەك قولىن سوزعان قۇرىلىمداردىڭ ىشىندە بريتان ىزكەسەرى، ورتا ازياداعى اۆتوكراتتارعا تيەسىلى شەتەلدىك اكتيۆتى تىمىسكىلەپ جۇرەتىن ستيۆەنوم فيتتسدجون بار.

فيتتسدجوننىڭ Ventham Consulting كومپانياسى قاجىگەلدينگە نازارباەۆتىڭ قۇپيا كاپيتالى تۋرالى مالىمەت جىبەرىپ تۇرادى. ارينە، تەگىن ەمەس.

اكەجان مىرزانىڭ ايتۋىنشا نازارباەۆ اۋلەتىنىڭ ەل كوزىنەن تاسا، استىرتىن الىپ شىققان اكتيۆىنىڭ قۇنى 100 ملرد دوللاردان اسىپ جىعىلادى.

Abai.kz