جەكسەنبى, 23 ماۋسىم 2024
تۇلعا 1142 5 پىكىر 22 ءساۋىر, 2024 ساعات 16:26

قازاقتىڭ ۇلى عالىمى – قانىش ساتباەۆ

سۋرەت: e-history.kz

بيىل قازاق دالاسىنىڭ ۇلى پەرزەنتى قانىش يمانتايۇلى ساتباەۆتىڭ تۋعانىنا 125 جىل تولىپ وتىر.

قانىش ساتباەۆ – الگەبرادان مەكتەپ وقۋلىعىنىڭ العاشقى قۇراستىرۋشىسى، تۇڭعىش كاسىبي تاۋ-كەن ينجەنەرى، عالىم-گەولوگ، قازاقستان عىلىم اكادەمياسىنىڭ نەگىزىن قالاۋشى جانە تۇڭعىش پرەزيدەنتى، قازاقستانداعى العاشقى مەملەكەتتىك سىيلىقتىڭ لاۋرەاتى، ەلىمىزدەگى عىلىمنىڭ نەگىزىن سالۋشىلاردىڭ ءبىرى، مەملەكەت جانە قوعام قايراتكەرى.

ونىڭ ەسىمى ءوزى ۇزاق جىلدار جەتەكشىلىك ەتكەن قر ۇلتتىق عىلىم اكادەمياسىنىڭ گەولوگيالىق عىلىمدار ينستيتۋتىنا، الماتى، بالقاش، سەمەي ت.ب. قالالارداعى كوشەلەرگە، كىشى پلانەتاعا بەرىلگەن. قانىش يمانتايۇلىنىڭ قۇرمەتىنە جوڭعار الاتاۋى، جوتاسىنداعى مۇزدىق پەن شىڭ، قاراتاۋداعى ۆانادي كەن ورنى رۋدالارىندا تابىلعان “ساتباەۆيت” مينەرالى “اكادەميك ساتباەۆ” گلاديولۋس گۇلى اتالعان.جەزقازعان كەن-مەتاللۋرگيا كومبيناتىن، قاراعاندى مەن بالقاش مەتاللۋرگيا زاۋىتتارىن، ەرتىس-قاراعاندى ارناسىن سالۋ، ماڭعىستاۋ، مۇعالجار، تورعاي وڭىرلەرىنىڭ تابيعي بايلىقتارىن انىقتاۋ جونىندە زەرتتەۋ جۇمىستارىن ۇيىمداستىرۋ، رەسپۋبليكامىزدىڭ ءىرى مينەرالدىق شيكىزات قورلارىن – كەندى التايدى، قاراتاۋ ءفوسفوريتىن قوستاناي مەن جەزقازعان – ۇلىتاۋ وڭىرلەرىندەگى تەمىر، مارگانەتس، ت.ب. كوپتەگەن كەن ورىندارىن يگەرۋ ساتباەۆ ەسىمىمەن تىعىز بايلانىستى.

اكادەميك قانىش ساتباەۆتىڭ باعا جەتپەس ۇلەسى – عىلىمي مادەنيەت پەن عىلىمدا مەتودولوگيالىق ادىستەردى ورناتۋى. سوندىقتان دا ۇلى عالىمنىڭ ەسىمى قازاق حالقىنىڭ تاريحىندا التىن ارىپپەن جازىلعان. حالقىمىزدىڭ رۋحاني ومىرىندەگى ەرەكشە ۇلى تۇلعا قانىش ساتباەۆتىڭ ەسىمى حالقىنىڭ جانىندا ماڭگى ساقتالماق.

قانىش يمانتايۇلى ىسكە اسىرعان ىرگەلى جوبالار ەلىمىزدىڭ ەكونوميكالىق جاعدايىنا كۇنى بۇگىنگە دەيىن وڭ ىقپال ەتۋدە جانە ماڭىزى ەشقاشان جويىلماق ەمەس.

باعلان تاشيموۆ

Abai.kz

5 پىكىر