بۇگىن، سان ءتۇرلى اقپاراتتار اعىنىن قاراپ وتىرىپ، ءوزىمدى تاڭ قالدىرعان ءبىر دەرەكتەردى كورىپ، شىنىن ايتقاندا، اڭتارىلىپ قالدىم. مەنى تاڭ قالدىرعان جاڭالىق – ۇلتتىق بانكىنىڭ توراعاسى عالىمجان ءپىرماتوۆ مىرزانىڭ وتكەن جىلعى ينفلياتسيا تۋرالى بەرگەن ماعلۇماتى بولاتىن. باس بانكيردىڭ ايتۋىنشا، 2022 جىلعى ينفلياتسيا 20,3 پايىزدى قۇراپتى. ال ازىق-تۇلىك باعاسىنىڭ ءوسۋى 25,3 پايىزعا جەتكەن كورىنەدى.

سونىڭ الدىندا «ۋكراينا شىندىعى» سايتىن قاراپ شىققان بولاتىنمىن. سونداعى اقپارات ەسىمە ءتۇسىپ، سول سايتقا قايتا ورالدىم. ورالدىم دا، ءوز كوزىمە ءوزىم سەنبەدىم. ۋكراينانىڭ 2022 جىلعى ينفلياتسيا كولەمى – 26,6 پايىز ەكەن! مۇمكىن ەمەس. ايدىڭ، كۇننىڭ امانىندا، ءبىزدىڭ مامىراجاي ەلىمىزدەگى ينفلياتسيا ون ءبىر اي قاندى قىرعىننىڭ ورتاسىندا وتىرعان، جۇزدەگەن زاۋىت-فابريكالارى جەرمەن-جەكسەن بولعان، ەنەرگەتيكا كوزدەرىنىڭ تەڭ جارتىسى ىستەن شىققان، تەرريتورياسىنىڭ بەستەن ءبىرى وككۋپاتسياعا تۇسكەن، ەكونوميكانى مايدان قاجەتتىلىگىنە بەيىمدەۋگە ءماجبۇر بولعان، ميلليونداعان ازاماتتارى شەت ەلگە قونىس اۋدارعان ەلدەگى ينفلياتسيا كولەمىنە جاقىنداپ قالىپتى.

قۇدايعا شۇكىر، بىزدە ءبارى تىنىش. جۇت بولعان جوق، جەر سىلكىنىپ، قالالارىمىز قيراعان جوق، مۇنايىمىز تاۋسىلعان جوق، كەرەك دەسەڭىز، ەگىنىمىز دە بيىل بىتىك شىقتى.  بىراق، نەگە ەكەنى بەلگىسىز، قىمباتشىلىق باسىپ، تىرشىلىك قىسىپ بارادى. نەگە ەكەنى بەلگىسىز، توزاقتىڭ ورتاسىندا تۇرعان ۋكرايناعا دا جەتىپ قالىپپىز. كىم جاۋاپ بەرەدى؟ الدە بۇل دا «مەملەكەتتىك قۇپياعا» جاتادى ما؟

قىسقاسى، ءبارى دە سالىستىرۋدان كورىنەدى ەكەن.

بۇل – «جاڭا قازاقستانننىڭ» العاشقى جانە بۇرىن-سوڭدى بولماعان «جەتىستىگى». اللا قازاققا جەر دە، مال دا، جەر استىنىڭ بايلىعىن دا، اقىلدى دا ەڭبەكقور حالىق تا بەردى. بىراق، سول بايلىقتى يگەرىپ، حالىقتىڭ ىرىسىنا اينالدىراتىن، ەل باسقارۋعا لايىقتى اقىلدى ادامداردى بەرمەپتى.

دوس كوشىم      

Abai.kz