پاۆلودار وبلىسىنىڭ اكىمى تاعايىندالدى
پاۆلودار وبلىسىنىڭ اكىمى بولىپ اسايىن بايحانوۆ تاعايىندالدى. ول بۇعان دەيىن پاۆلودار قالاسىنىڭ اكىمى بولعان.
اسايىن قۋاندىقۇلى بايحانوۆ 1977 جىلى پاۆلودار وبلىسى باياناۋىل اۋدانىندا دۇنيەگە كەلگەن. 2000 جىلى پاۆلودار ۋنيۆەرسيتەتىن «ەكونوميكا جانە مەنەدجمەنت» ماماندىعى بويىنشا تامامداعان. 2005-2006 جىلدارى European Bank for Reconstruction and Development (EBRD) جانە «ProCredit Holding AG» نەمىس حالىقارالىق بانك حولدينگىنىڭ كورپوراتيۆتىك كۆاليفيكاتسيا ارتتىرۋ ورتالىعىندا ءبىلىمىن جەتىلدىرگەن. 2017 جىلى م.ۆ. لومونوسوۆ ات. ماسكەۋ مەملەكەتتىك ۋنيۆەرسيتەتىندە «ستراتەگيالىق مەنەدجمەنت جانە كاسىپكەرلىك» بويىنشا مۆا دارەجەسىن الدى.
ەڭبەك جولىن 2000 جىلى بانك سەكتورىندا ەۋروپا قايتا قۇرۋ جانە دامۋ بانكىنىڭ (EBRD) ءوفيسى قازاقستاندا جۇزەگە اسىرعان قازاقستاننىڭ شاعىن بيزنەسى باعدارلاماسى بويىنشا باستاعان.
2003 جىلدان 2007 جىلعا دەيىن «ProCredit Holding AG» نەمىس حالىقارالىق بانك حولدينگىندە بىرقاتار باسشىلىق لاۋازىمدارىندا قىزمەت اتقارعان. كيەۆ قالاسىنداعى «پروكرەديت ۋكراينا» جاو-نىڭ اتقارۋشى ديرەكتورى بولعان. 2007 جىلى ا. بايحانوۆ قازاقستانعا «نۇربانك» اق باسقارما باسشىسى ورىنباسارى قىزمەتىنە ورالىپ، بانكتىڭ فيليالدىق جەلىسىن كەڭەيتۋ، اگرارلى سالا مەن شاعىن جانە ورتا بيزنەستى نەسيەلەۋ باعىتتارى بويىنشا جۇمىس ىستەگەن.
2009-2015 جىلدار ارالىعىندا جەكە سەكتورعا اۋىسىپ، اۋىلشارۋاشىلىعى سالاسىندا كاسىپكەرلىكپەن اينالىسقان.
2015-2020 جىلدار «كازاگرو» ۇلتتىق باسقارما حولدينگى» اق توبىنداعى «كازاگروونىم» اق كۆازيمەملەكەتتىك كومپانياسىنىڭ باسقارما باسشىسىنىڭ ورىنباسارى بولدى.
2020 جىلعى ناۋرىزدان باستاپ پاۆلودار وبلىسى اكىمىنىڭ ورىنباسارى، 2021 جىلعى 19 شىلدەدە پاۆلودار قالاسىنىڭ اكىمى بولىپ تاعايىندالعان.
Abai.kz
