قازاقستاننىڭ ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆكە قاتىستى تاعى دا تىڭ دەرەك شىقتى. ءماسىموۆ پەن ونىڭ وتباسى مۇشەلەرىندە ۆەنگريا ازاماتتىعى بولعان. مۇنى ۆەنگريا پرەمەر-ءمينيسترى ۆيكتور وربان راستاپ وتىر.

قاڭتار وقياعاسىنان كەيىن ۇقك قازاقستان رەسپۋبليكاسى قىلمىستىق كودەكسىنىڭ 175-بابى 1-تارماعىمەن، «مەملەكەتكە ساتقىندىق» فاكتىسى بويىنشا سوتقا دەيىنگى تەرگەۋ باستاعان. وسى كۇنى اتالعان قىلمىستى جاسادى دەگەن كۇدىكپەن ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆ جانە وزگە دە تۇلعالار ۇستالىپ، ۋاقىتشا تەرگەۋ يزولياتورىنا قامالعان بولاتىن. تاياۋدا باس پروكۋراتۋرا ۇلتتىق قاۋىپسىزدىك كوميتەتىنىڭ بۇرىنعى باسشىلارىنا قاتىستى قىلمىستىق ءىستى زەردەلەۋ ناتيجەسى بويىنشا تەرگەۋ ورگانىنىڭ ايىپتاۋ اكتىسىن بەكىتتى.

قىلمىستىق ءىس استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا جولداندى.

ايىپتالۋشىلار ك.ق. ءماسىموۆ (ۇقك بۇرىنعى توراعاسى) جانە ا.ت. سادىقۇلوۆ (ۇقك توراعاسىنىڭ بۇرىنعى ورىنباسارى) مەملەكەتكە وپاسىزدىق جاساۋ (قك 175-بابىنىڭ 1-بولىگى), بيلىكتى كۇشپەن باسىپ الۋ (قك 179-بابىنىڭ 3-بولىگى), اۋىر زارداپتارعا اكەپ سوققان بيلىك پەن لاۋازىمدىق وكىلەتتىگىن وزىنە جانە باسقالارعا پايدا مەن ارتىقشىلىقتار الۋ ماقساتىندا اسىرا پايدالانۋ (قك 362-بابى 4-بولىگىنىڭ 3-تارماعى) تۋرالى باپتار بويىنشا سوتقا بەرىلدى.

د.ە. ەرعوجين (ۇقك توراعاسىنىڭ بۇرىنعى ورىنباسارى) بيلىكتى كۇشپەن باسىپ العانى (قك 179-بابىنىڭ 3-بولىگى), اۋىر زارداپتارعا اكەپ سوقتىرعان بيلىك پەن لاۋازىمدىق وكىلەتتىكتەردى وزىنە جانە باسقالارعا پايدا مەن ارتىقشىلىقتار الۋ ماقساتىندا اسىرا پايدالانعانى ءۇشىن ايىپتالۋدا (قك 362-بابى 4-بولىگىنىڭ 3-تارماعى).

م.س. وسيپوۆكە (ۇقك توراعاسىنىڭ بۇرىنعى ورىنباسارى), د.م. اكيپوۆقا (ۇقك دەپارتامەنت باستىعىنىڭ بۇرىنعى ورىنباسارى) جانە ن.ك. بەكمۋراتقا (ۇقك-نىڭ بۇرىنعى باسقارما باستىعى) قىلمىستىق كودەكستىڭ 362-بابىنىڭ ءارتۇرلى بولىكتەرى بويىنشا ايىپ تاعىلعان.

قىلمىستىق ءىس «وتە قۇپيا» بەلگىسىمەن تەرگەلگەن جانە سوتتا دا وسى تارتىپتە قارالادى.

بۇدان بۇرىن بۇۇ-نىڭ جۇمىس توبى ءماسىموۆ ىسىنە قاتىستى ۇندەۋ جولداپ، وعان اراشا ءتۇستى.

«قازاق ۇكىمەتىن كارىم ءماسىموۆتىڭ نەگىزسىز قاماۋدا وتىرعانىنا بايلانىستى ىستەردى تاۋەلسىز تەرگەۋشىلەردىڭ جۇرگىزۋىن قامتاماسىز ەتۋگە جانە ونىڭ قۇقىقتارىنىڭ بۇزىلۋىنا جاۋاپتى ادامداردى ءتيىستى شارالار قابىلداۋعا شاقىرامىز»، – دەپ جازىلعان بۇۇ-نىڭ سەبەپسىز قاماۋلار بويىنشا جۇمىس توبىنىڭ مالىمدەمەسىندە.

باس پروكۋروردىڭ ورىنباسارى اسەت شىنداليەۆ بۇۇ-دان رەسمي تۇردە ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ماسىموۆكە قاتىستى حابارلاما تۇسپەگەنىن مالىمدەدى.

«ول حابارلامانى ءوز باسىم جەلىلەردەن كوردىم. بىراق ونداي جۇمىس رەكومەنداتسيالارىن (بۇۇ-نىڭ) ءالى كورگەن جوقپىن. باس پروكۋراتۋراعا رەسمي تۇردە تۇسكەن كەزدە ول بويىنشا جۇمىس جاسالادى. ناتيجەسىندە شەشىم قابىلدانادى»، - دەگەن بولاتىن ول.

Abai.kz