بۇگىن مەملەكەت باسشىسى قاسىم-جومارت توقاەۆ "راقىمشىلىق جاساۋ تۋرالى" قازاقستان رەسپۋبليكاسىنىڭ زاڭىنا قول قويدى. جاقىن ارادا زاڭ ءماتىنى باسپاسوزگە جاريالانباق.

پرەزيدەنت جانىنداعى قسزي باس عىلىمي قىزمەتكەرى جاننا كارىموۆانىڭ ايتۋىنشا، راقىمشىلىق جاسالعان ازاماتتاردىڭ جاقىندارىنا جاڭا زاڭنىڭ ەش اسەرى جوق.

«مەملەكەت باسشىسى راقىمشىلىق تۋرالى زاڭنىڭ قابىلداناتىنىن جاريالاعاننان كەيىن كوپشىلىك اراسىندا «راقىمشىلىققا ىلىنگەندەردىڭ تۋىستارى مەن جاقىندارىنا قانداي دا ءبىر كەلەڭسىز سالداردى كۇتۋ كەرەك پە؟» دەگەن سۇراق ءجيى ەستىلە باستادى. بۇل ارادا ايتا كەتەرلىك جايت، قولدانىستاعى زاڭناماعا سايكەس راقىمشىلىققا ىلىنگەندەردىڭ جاقىن تۋىستارى ەشقانداي جاۋاپكەرشىلىككە تارتىلمايدى. راقىمشىلىققا ۇشىراعانداردىڭ تۋىستارى مەن جاقىندارىنا قاتىستى ەشقانداي زاڭدىق شەكتەۋلەر جوق. ماسەلەن، قۇقىق بۇزۋشىلارعا راقىمشىلىق جاساۋ ولاردىڭ بالالارىنىڭ بولاشاقتا مەملەكەتتىك نەمەسە اسكەري قىزمەتكە بارۋىنا ەش كەدەرگى بولا المايدى»، - دەپ ءتۇسىندىردى ساراپشى.

سونىمەن قاتار ول اۋىر قىلمىس جاساعانداردى راقىمشىلىققا ىلىنەدى دەگەن پىكىردى جوققا شىعاردى.

«سونداي-اق بىرنەشە قايتارا رەتسيديۆيست اۋىر قىلمىسكەرلەر راقىمشىلىققا ىلىگەدى دەگەن پىكىر دە شىندىقپەن جاناسپايدى. مەملەكەتكە وپاسىزدىق جاساعاندىعى ءۇشىن، جاپپاي تارتىپسىزدىكتەر ۇيىمداستىردى دەپ ايىپتالعان سوتتالۋشىلار، سونداي-اق قىلمىستىق كودەكستىڭ 78-بابىندا كوزدەلگەن وزگە دە قىلمىستاردى – كامەلەتكە تولماعاندارعا جىنىستىق تيىسپەۋشىلىككە قارسى، تەرروريستىك، ەكسترەميستىك قىلمىستار مەن ازاپتاۋلار جاساعاندارعا، قىلمىستاردىڭ قايتالانۋى نەمەسە قىلمىستاردىڭ قاۋiپتi قايتالانۋى كەزىندە جازا تاعايىندالعان ادامدارعا راقىمشىلىق جاساۋ تۋرالى اكت قولدانىلمايدى. ياعني قىلمىسكەرلەردىڭ ەڭ قاۋىپتى ساناتتارى قوعامنان شەتتەتىلەدى»، - دەدى جاننا كارىموۆا.

پارلامەنت ءماجىلىسىنىڭ دەپۋتاتى گەننادي شيپوۆسكيح راقىمشىلىق جاساۋ قىلمىستىق جاۋاپكەرشىلىكتەن قۇتقارمايتىنىن ايتتى.

«بۇل زاڭ - جاڭا، ادىلەتتى قازاقستاننىڭ كورىنىسى ەكەنى ءسوزسىز. سونداي-اق قوعام اراسىندا تۇراقتىلىققا بايلانىستى ءتۇرلى ماسەلەلەر ورىن العان ەدى. اتالمىش زاڭ قاڭتار وقيعاسىندا الاڭعا شىعىپ، اراڭداتۋشىلاردىڭ قۇربانى بولىپ، مەملەكەتتىك مەكەمەلەردى قيراتۋعا قاتىسقان ازاماتتارعا قاتىستى. بىراق، بۇل بيلىككە قارسى شىعىپ، زاڭسىز ءىس-ارەكەتتەردى ۇيىمداستىرۋشىلار ءۇشىن نەگىزسىز»،-دەدى ول.

سونداي-اق دەپۋتات بۇل زاڭ ولاردىڭ قىلمىستىق جاۋاپكەرشىلىكتەن قۇتىلۋىنا جول بەرمەيتىنىن ايتتى.

«راقىمشىلىق سوت ۇكىمىنە بايلانىستى جازاسىن ازايتادى، بىراق قىلمىستىق جاۋاپكەرشىلىكتەن الىپ تاستامايدى. جازالانۋشى وقيعا بارىسىندا مەملەكەتكە كەلتىرىلگەن زالالداردىڭ شىعىندارىن تولىق وتەيدى»،-دەيدى دەپۋتات.

بۇل زاڭ نەگىزىندە  اۋىر جانە اسا اۋىر قىلمىس جاساعاندارعا: اۋىر قىلمىستار ءۇشىن سوت تاعايىنداعان مەرزىم تورتتەن ۇشكە، ال اسا اۋىر قىلمىستار ءۇشىن جارتىسىنا قىسقارادى. دەگەنمەن، ازاپتاۋلار جاساعان ادامدار، تەرروريستەر، ەكسترەميستەر، رەتسيديۆيستەر جانە تارتىپسىزدىكتەردى ۇيىمداستىرۋشىلارعا راقىمشىلىق كورسەتىلمەيدى.

Abai.kz