سەنبى, 28 قاڭتار 2023
ارىپتەستىڭ اڭگىمەسى 1143 3 پىكىر 18 قازان, 2022 ساعات 12:43

پرەزيدەنت بولعىم كەلەدى...

مىنە، پرەزيدەنت سايلاۋىنىڭ ەكىنشى كەزەڭى باستالىپ، بۇل دودا بارعان سايىن قىزا تۇسۋدە. ودان ۇمىتكەر ءبىراز كانديداتتار ىرىكتەلىپ، دامەلىلەردىڭ دەلەبەلەرى قوزىپ وتىر. قولىم بوس بولعاسىن با، مەنىڭ دە كوڭىلىم الابۇرتىپ، ۇيدە وتىرىپ، تاقىمىمدى باسامىن. نەگە؟  ويتكەنى، «سايلاۋدان اركىمنىڭ دە بار تالاسى» دەگەندەي، مۇمكىن مەن دە وسى جارىسقا قوسىلا كەتىپ، باعىمدا ساناعانىم ماقۇل ما ەدى دەگەن كۇپىرلى وي كەلەدى. وتكەندە «اكىم بولعىم كەلەدى» دەپ ماقالا جازىپ، ىشكى جامان ويىمدى وسى پورتالداعى قالىڭ وقىرمانعا ءبىلدىرىپ تە قويعام. ەندى «قۇلاساڭ ناردان قۇلا» دەگەندەي، وسى تاققا تالاسۋدان بەكەر شەت قالعان ەكەنمىن دەپ، ءوزىمدى-ءوزىم جۇندەي ءتۇتىپ جۇرگەن جايىم بار. سوندىقتان ەندى نە سەبەپتى «پرەزيدەنت بولعىم كەلەدى» دەپ، قاعازعا ءتۇرتىپ قويعانىمنىڭ سەبەبىن تۇسىندىرسەم دەيمىن. ويتكەنى ەل قامىن جالعىز عانا توقاەۆ ويلامايتىن شىعار، مەنى دە وسى وي مازالايدى. اۋ، مەن دە وسى ەلدىڭ ماڭدايىنا بىتكەن ساناۋلى ازاماتىنىڭ ءبىرى ەمەسپىن بە؟ كىم مەنەن ونداي قۇقىقتى تارتىپ الادى؟

دەي تۇرسام دا ماعان كەيىنگى كەزدەرى كوڭىلىمدى الاي-دۇلەي ەتەتىن ءبىر ءتۇرلى ويلار كەلىپ ءجۇر. سونىڭ ەڭ اۋىرى، ءبىزدىڭ ەلدە كىم پرەزيدەنت بولسا دا، ەكىنشى نازارباەۆقا اينالىپ كەتە مە دەگەن قاۋىپ. مۇنى نەگە ايتىپ وتىرمىن. بار ماسەلە ءبىزدىڭ قازاقتىعىمىزدا، ياعني، قالىپتاسقان تۋىسقاندىق اسىل سەزىمدە. ءبىر كەزدەرى ءبىزدى تالاي قيىندىقتان الىپ شىققان بۇل قاسيەت قازىر بيلىك باسىنا كەلگەندەردىڭ قاسىرەتىنە اينالعان سەكىلدى. ماسەلەن، مەن پرەزيدەنت بولسام، قاپتاعان تۋىسىمنان قالاي سىرت اينالامىن؟ جايلى ورىندىققا جايعاسقاننان كەيىن الدىمەن قۇدام، سوسىن ناعاشى-جيەن، سوسىن جەزدەم مەن بولەم كەلىپ، بۇيىمتايىن ايتىپ، بالالارىن جىلى-جۇمساققا جاقىنداتىپ جىبەرۋىن قولقالاپ تۇرسا، قالاي بەتىن قايتارامىن؟ مۇنىڭ سىرتىندا اكەمنىڭ اعاسى مەن ىنىلەرىنىڭ جاقىن-جۋىقتارىن ءتىپتى دە ءسوز ەتىپ وتىرعان جوقپىن. شىنىنا جۇگىنسەك، مەن ولارعا: «سەندەر ماعان مۇنداي وتىنىشپەن كەلمەڭدەر. ولار وزدەرىنىڭ اقىلى مەن ەڭبەكتەرىنىڭ ارقاسىندا ءوسسىن» دەپ، ايتا المايتىنىم حاق. اتام قازاق «ءبىر ادام تاققا مىنسە، قىرىق ادام اتقا مىنەدى» دەگەندى بەكەر ايتتى دەيمىسىڭ؟.. ويباي-اۋ، اناۋ سىعاننىڭ توبىرىنداي قاپتاعان قىرىق ادامعا جىلى-جۇمساقتى قايدان تاۋىپ بەرەمىن؟ جوق، ارينە، نيەت بولسا، ءبارىن دە يتاياققا جاقىنداتۋ قيىن ەمەس. قازاقستاننىڭ بايلىعى جەتەدى عوي. وتىز جىل بويى بيلىكتە بولعان نازارباەۆتىڭ تۋىستارىنىڭ سانىن كىم ەسەپتى؟.. مۇمكىن، مەنىڭ تۋىستارىمىنىڭ سانىنان دا اسىپ كەتەر.

وسى ارادا كەيبىر بىلگىشتەر ماعان: «اۋ، ەلدىڭ پرەزيدەنتىنىڭ تۋعان-تۋىستارى لاۋازىمدى قىزمەتكە جىبرىلمەسىن» دەگەن زاڭ بار ەمەس پە؟ سول تۇرعاندا نەگە قورقاسىڭ» دەپ، ەنتىگىمدى باسۋعا تىرىسۋى بەك مۇمكىن. اڭقاۋ قازاعىم-اي. ول زاڭ ەرتەڭ قاعاز كۇيىندە قالادى. بىرىنشىدەن، كەلەسى پرەزيدەنتتىڭ ول زاڭدى وزگەرتىپ جىبەرمەسىنە ەشكىم دە كەپىلدىك بەرە المايدى. ەكىنشىدەن، ول زاڭ تەك قانا ونىڭ ءوز كىندىگىنەن تاراعان بالالارىن عانا قامتيدى. ال ناعاشى-جيەن، قۇدا-قۇداعي، كۇيەۋ بالا مەن بولە، بالدىز بەن قايناعا دەگەندەر بۇل قاسيەتتى تىزىمگە ەنبەيدى. اناۋ وركەنيەتتى ەلدەردە ولار تۋىس بولىپ سانالمايتىن شىعار. ال بىزدەگى جاعدايدى وزدەرىڭ بىلەسىڭدەر عوي. ەندەشە، بۇل ماسەلەنى جىلى جاۋىپ قويالىق.

ءجا، جارايدى، تۇپتەپ كەلگەندە قارا ورمانداي تۋىستارىم، ارينە، ازىرشە ۇندەمەس. الايدا كۇنى ەرتەڭ، 7 جىلدان سوڭ ورنىمنان تۇسكەسىن، سىرت اينالعانى بىلاي تۇرسىن، ەلدەن قاڭعىتىپ جىبەرمەي مە؟ ماعان مۇنداي پەرسپەكتيۆا كەرەك پە؟ سىزدەر قالاي ويلايسىزدار؟

جايبەرگەن بولاتوۆ

Abai.kz

3 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3113
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1900