وسك حاتشىسى مۇحتار ەرمان سەنبى كۇنى جيىندا توقاەۆ كانديداتۋراسىنا قاتىستى بارلىق مەملەكەتتىك ورگاننان جاۋاپ العانىن، كانديداتتى سايلاۋعا وتكىزۋگە كەدەرگى كەلتىرەتىن ەشقانداي جايت انىقتالماعانىن ايتتى.
ونىڭ ايتۋىنشا، زاڭناما بويىنشا قازىرگى پرەزيدەنت مەملەكەتتىك ءتىل ەمتيحانىن تاپسىرماسا دا بولادى. سول سەبەپتى توقاەۆ ەندى كەمىندە 118,2 مىڭ قول جيناۋعا كىرىسە بەرسە بولادى.
8 قازاندا وسك "امانات" كاسىپوداقتار دوستاستىعى" ۇسىنعان كانديدات مەيرام قاجىكەننىڭ ءتىل ەمتيحانىنان وتكەنىن دە حابارلادى. وسك-نىڭ حابارلاۋىنشا، ءتىل ەمتيحانى ءۇش كەزەڭنەن تۇرعان: بەلگىلى ءبىر تاقىرىپتا جازباشا تاپسىرما ورىنداۋ، ءماتىن وقۋ جانە بەلگىلى ءبىر تاقىرىپ بويىنشا كوپشىلىك الدىندا كەمىندە 15 مينۋت سويلەۋ.
كانديدات "قازىرگى زامانعى جاھاندىق ماسەلەلەر" تاقىرىبىندا شىعارما جازعان. مۇحتار اۋەزوۆتىڭ "اباي جولى" ەپوپەياسىنان ءۇزىندى وقىپ، "ىرىس الدى – ىنتىماق" اتتى تاقىرىپتا 15 مينۋت ءسوز سويلەگەن.
ەمتيحاننان كەيىن كوميسسيا مۇشەلەرى كانديداتتىڭ ءتىلدى مەڭگەرۋ دەڭگەيىن تالقىلاپ، مەيرام قاجىكەن "مەملەكەتتىك ءتىلدى ەركىن مەڭگەرگەن" دەگەن قورىتىندىعا كەلگەن. وسك ونىڭ دا تالاپقا سايكەس كەلەتىنىن ايتىپ، قول جيناۋعا رۇقسات بەردى.
ءتىل كوميسسياسىنىڭ قۇرامىنا فيلولوگيا، ءتىل ءبىلىمى مەن ادەبيەت سالاسىنداعى عالىمدار: ءادىل احمەتوۆ، عاريفوللا ەسىم، جانقارا دادەباەۆ، گۇلتاس قۇرمانباي، ديحان قامزابەكۇلى، انار فازىلجانوۆا كىرگەن.
ەلدە كەزەكتەن تىس پرەزيدەنت سايلاۋى 20 قاراشادا وتەدى. كانديداتتى ۇسىنۋ 11 قاراشا كەشكە اياقتالادى.
پرەزيدەنت سايلاۋىنا قاتىسۋعا نيەت بىلدىرگەن ۇمىتكەرلەر ازىرگە تومەندەگىدەي:
- جيگۋلي دايراباەۆ – "اۋىل" پارتياسى ۇسىنعان – وسك-عا 6 قازاندا قۇجاتتارىن وتكىزدى - 8 قازاندا ءتىل ەمتيحانىنان ءوتتى;
- قاسىم-جومارت توقاەۆ – 6 قازاندا قۇرىلعان "حالىقتىق كواليتسيا" ۇسىنعان – وسك-عا قۇجاتتارىن 7 قازاندا وتكىزدى – ءتىل ەمتيحانىن تاپسىرمايدى;
- نۇرلان اۋەسباەۆ – جسدپ ۇسىنعان – قۇجاتتارىن 7 قازاندا وتكىزدى;
- مەيرام قاجىكەن – "امانات" كاسىپوداقتار دوستاستىعى – وسك-عا قۇجاتتارىن 4 قازاندا وتكىزگەن – 8 قازاندا ءتىل ەمتيحانىنان ءوتتى.
- قاراقات ابدەن – كاسىبي الەۋمەتتىك جۇمىسشىلار ۇلتتىق اليانسى ۇسىنعان – وسك-عا قۇجاتتارىن 8 قازاندا وتكىزدى.
Abai.kz
