الماتىدا 7 مىڭنان استام ستۋدەنت تۇراتىن ورىنمەن قامتاماسىز ەتىلدى. بۇل تۋرالى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ مالىمدەدى.

«ءبىز قالا اكىمدىگىمەن بىرلەسە ستۋدەنتتەر ءۇشىن حوستەل، قوناقۇيلەردىڭ يەلەرىمەن كەلىسىم جاساستىق. سونىڭ ناتيجەسىندە قازىر 7 مىڭنان استام ستۋدەنتكە ورىن تابىلىپ، سوندا ورنالاسىپ جاتىر. مىسالى، اباي اتىنداعى قازۇپۋ بۇگىندە 4 حوستەلمەن كەزدەسىپ، مىڭنان استام ستۋدەنتتىڭ تۇرۋىنا مۇمكىندىك جاسادى»، - دەدى قۋانىش ەرعاليەۆ.

ول سونداي-اق مەملەكەتتىك-جەكەشەلىك ارىپتەستىك اياسىندا سوڭعى ءۇش جىلدا جاتاقحانالاردىڭ قارقىندى تۇردە سالىنىپ جاتقانىن اتاپ ءوتتى.

«وتكەن جىلى قازاقستاندا شامامەن 49 جاتاقحانا سالىندى. بيىل 40-قا جۋىق جاتاقحانا سالىنادى دەپ جوسپارلاندى. بۇل، ستۋدەنتتەر ءۇشىن قوسىمشا 10 مىڭنان استام توسەك-ورىن بولادى دەگەن ءسوز. پرەزيدەنت ءوز جولداۋىندا دا وسى ماسەلەنى كوتەرىپ، بىزگە ءتيىستى تاپسىرما بەردى. قازىر ول بويىنشا ينۆەستورلاردى تارتىپ جۇمىس جاساپ جاتىرمىز. قىسقاشا ايتقاندا، قازىرگى تاڭدا قازاقستاندا جاتاقحانالاردا ورىن تاپشىلىعى ماسەلەسىن شەشۋ جۇمىستارى ءجۇرىپ جاتىر»، - دەدى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ.

ەسكە سالايىق، عىلىم جانە جوعارى ءبىلىم مينيسترلىگى الماتىدا ستۋدەنتتەر دالادا قونىپ ءجۇر دەگەن اقپاراتتىڭ شىندىققا جاناسپايتىنىن مالىمدەگەن بولاتىن.

Abai.kz