قازاقستان مەن مالايزيا اراسىندا تىكەلەي اۋە رەيستەرى اشىلماق. بۇل تۋرالى قر يندۋستريا جانە ينفراقۇرىلىمدىق دامۋ مينيسترلىگى حابارلادى.

حالىقارالىق ازاماتتىق اۆياتسيا ۇيىمى (يكاو) اسسامبلەياسىنىڭ 41-ءشى سەسسياسى اياسىندا قر يدم ازاماتتىق اۆياتسيا كوميتەتىنىڭ توراعاسى تالعات لاستاەۆ باستاعان قازاقستاندىق دەلەگاتسيا مالايزيانىڭ اۆياتسيالىق بيلىك وكىلدەرىمەن كەلىسسوزدەر جۇرگىزدى.

باسقوسۋعا مالايزيا تاراپىنان اتالعان مەملەكەتتىڭ اۋە بيلىگىنىڭ ديرەكتورى داتۋك چەستەر ۆۋ كولىك مينيسترلىگى وكىلدەرى، وڭتۇستىك-شىعىس ازياداعى ەڭ ءىرى لوۋكوستەر "Air Asia" جانە "Malaysia Airlines" باسشىلىعى قاتىستى.

كەزدەسۋ بارىسىندا تاراپتار قازاقستان مەن مالايزيا اراسىنداعى تىكەلەي اۋە قاتىناسىن جاڭارتۋ ماسەلەلەرىن تالقىلادى.

بۇعان دەيىن، 2019 جىلى Covid-19 پاندەمياسىنىڭ الدىندا ازاماتتىق اۆياتسيا كوميتەتى "Air Asia" اۋەكومپانياسىنىڭ قازاقستانعا رەيستەرىن اشۋ بويىنشا جۇمىس جۇرگىزگەن بولاتىن. الايدا ول كارانتيندىك شەكتەۋلەرگە بايلانىستى توقتاتىلدى.

قازاقستاندىق تاراپ مەملەكەت باسشىسىنىڭ تاپسىرماسى بويىنشا قازاقستاندا ەنگىزىلگەن "اشىق اسپان" رەجيمىن پايدالانۋدى ۇسىندى.

ءىرى تومەن بيۋدجەتتىك "Air Asia" اۋەكومپانياسى باسشىلىعىنىڭ اقپاراتى بويىنشا 2023 جىلى كۋالا-لۋمپۋردان قازاقستانعا ودان ءارى قاراي ءۇشىنشى ەلگە ۇشاتىن رەيستەردى ىسكە قوسۋ جوسپارلانۋدا (اۋا ەركىندىگىنىڭ 5-ءشى دارەجەسى).

تىكەلەي رەيستى ىسكە قوسۋدىڭ تەحنيكالىق ماسەلەلەرىن پىسىقتاۋ ءۇشىن بيىلعى قازان ايىندا "Air Asia" اۋەكومپانياسىنىڭ اتقارۋشى ديرەكتورى بەندجامين يسمايل قازاقستانعا ارنايى ساپارمەن كەلمەك.

Abai.kz