ەرجان ءبىرجانوۆ قازاقستان رەسپۋبليكاسىنىڭ قارجى ۆيتسە-ءمينيسترى بولىپ تاعايىندالدى. بۇل تۋرالى ۇكىمەتتىڭ ءباسپاسوز قىزمەتى مالىمدەدى.

"قر ۇكىمەتىنىڭ قاۋلىسى بويىنشا، ەرجان ەرىكۇلى ءبىرجانوۆ قازاقستان رەسپۋبليكاسىنىڭ قارجى ۆيتسە-ءمينيسترى قىزمەتىنە تاعايىندالدى", - دەلىنگەن حابارلامادا.

ەرجان ءبىرجانوۆ 1979 جىلى سولتۇستىك قازاقستان وبلىسىندا دۇنيەگە كەلگەن. سولتۇستىك قازاقستان مەملەكەتتىك ۋنيۆەرسيتەتىن، سولتۇستىك قازاقستان زاڭ اكادەمياسىن، م.نارىكباەۆ اتىنداعى قازاق مەملەكەتتىك زاڭ ۋنيۆەرسيتەتىن، بيزنەس جانە حالىقارالىق زەرتتەۋلەر ۋنيۆەرسيتەتىن (شۆەيتساريا) بىتىرگەن. ەڭبەك جولىن 1999 جىلى سقو بويىنشا سالىق كوميتەتىنىڭ جەرگىلىكتى سالىقتار سەكتورىنىڭ اعا سالىق ينسپەكتورى بولىپ باستادى.

1999-2004 جىلدارى سقو بويىنشا سالىق كوميتەتىندە جۇمىس ىستەگەن.

2004-2014 جىلدارى قر قارجى مينيسترلىگىنىڭ قۇرىلىمىندا باسشىلىق لاۋازىمداردى اتقاردى.

2014 جىلعى ناۋرىز-قاراشا ارالىعىندا – قر پرەزيدەنتى اكىمشىلىگى الەۋمەتتىك-ەكونوميكالىق مونيتورينگ ءبولىمىنىڭ ساراپشىسى.

2014-2017 جىلدارى – قر قارجى مينيسترلىگى مەملەكەتتىك كىرىستەر كوميتەتىنىڭ دامۋ جانە جاڭعىرتۋ دەپارتامەنتىنىڭ ديرەكتورى.

2017 جىلى "كازيمپەكس" رەسپۋبليكالىق ورتالىعى" اكتسيونەرلىك قوعامىنىڭ باسقارما توراعاسىنىڭ ورىنباسارى قىزمەتىن اتقارعان.

2017-2021 جىلدارى ۇلتتىق قاۋىپسىزدىك ورگاندارىندا قىزمەت ەتتى.

2021 جىلعى ناۋرىزدان باستاپ قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى بولعان.

Abai.kz