قازاقستان سەناتى تمد ەلدەرىنە مۇشە مەملەكەتتەرى ۇكىمەتتەرى اراسىنداعى سالىقتىق ساياسات بويىنشا كەلىسىمنەن شىقتى. اتالمىش كەلىسىم تمد قۇرىلعان ساتتە، ياعني 1992 جىلى جاسالعان بولاتىن. كەلىسىم كسرو ىدىرىاپ، ورنىنا جاڭادان پايدا بولعان ەلدەر اراسىنداعى سالىقتىق ماسەلەنى رەتتەستىرۋ مەن جۇيەلەندىرۋ ءۇشىن جاسالعان ەدى.

سالىق ساياساتىنىڭ كەلىسىلگەن قاعيداتتارى تۋرالى تمد كەلىسىمى نەگىزگى سالىقتاردىڭ بىرىڭعاي ءتىزىمىن قولدانۋ تۋرالى كەلىسىمدى قامتىدى. سونىمەن قاتار، قوسارلانعان سالىق سالۋدىڭ الدىن الۋعا ءۇشىن ىسكە اسىرىلدى. الايدا 2022 جىلى اتالمىش كەلىسىم قازاقستان ءۇشىن ءوز ومىرشەڭدىگىن جويدى دەسەك تە بولادى.

تمد ۇيىمى قاعاز جۇزىندە بەلسەندى بولسا دا، شىن مانىندە وزەكتى ماسەلەلەردى شەشۋ قابىلەتىنە يە ەمەس. گرۋزيا مەن ۋكراينا تمد ۇيىمىنان شىقتى دەسەك تە بولادى. ۇيىمنىڭ ىشىندە باسى پىسپەيتىن ەلدەر جەتەرلىك، مىسالى ارمەنيا مەن ازەربايجاننىڭ اراسىندا سوعىس بار، ال تمد باقىلاۋشىسى بولىپ سانالاتىن مولدوۆا رەسەيدەن پريدنەستروۆەدەگى اسكەرىن اكەتۋدى تالاپ ەتۋدە. ساياساتتاعى قايشىلىقتارى كوپ بۇل ەلدەر سالىق ماسەلەسىن رەتتەي الۋى دا ەكىتالاي.

رەسەيلىك ساراپشىلار "قازاقستاننىڭ بۇل كەلىسىمنەن شىعىپ كەتۋىن سيگنال دەپ قابىلداۋ كەرەك" دەگەن ويدا. بۇعان دەيىن قازاقستان اسكەري شەرۋ وتكىزۋدەن باس تارتسا، ارتىنشا ەەو ەلدەرى بويىنشا استىق ەكسپورتىن شەكتەۋ كەلىسىمىنە قارسى شىققان بولاتىن. رەسەيگە سالىنعان سانكتسيالاردىڭ بۇزىلۋىنا جول بەرمەيتىنىن ايتقان ءبىزدىڭ ەلىمىز ماسكەۋدىڭ تيتىعىنا تيۋدە. 2022 جىلى قازاقستاننىڭ تمددا توراعالىق ەتىپ جاتقانىن ەسكە الساق، راسىمەن دە اتالمىش قادامنىڭ وزىندىك ساياسي سالماعى بارىن تۇسىنۋگە بولادى.

Abai.kz