دۇيسەنبى, 27 ماۋسىم 2022
1361 10 پىكىر 16 مامىر, 2022 ساعات 18:08

تۇڭعىشباي جامانقۇلوۆ: ارىستانبەكتىڭ ۇستىنەن ارىز جازعان مەن!

قر حالىق ءارتىسى، اكتەر تۇڭعىشباي جامانقۇلوۆ بۇرىنعى مادەنيەت جانە سپورت ءمينيسترى ، قازىرگى قازاقستان ۇلتتىق مۋزەيىنىڭ ديرەكتورى ارىستانبەك مۇحامەديۇلىنىڭ ۇستىنەن ارىز جازعانىن مالىمدەدى. بۇل تۋرالى اكتەر Nege.kz سايتىنا بەرگەن سۇحباتىندا ايتقان.

«ءبىزدىڭ ارامىزداعى قانداي كەلىسپەۋشىلىك ەكەنىن بىلەسىزدەر عوي. ونى بۇكىل قازاقستان بىلەدى. ستۋدەنت قىزداردى قورعاعانىم ءۇشىن مەنىڭ ابىرويىمدى توگىپ، ماعان وتىرىك جالا جاپتى. وتىرىك ايتىپ، مەنى جەرگە قاراتتى. قوي دەگەندە قويمادى عوي!.. ءيا، مەن ارىز جازدىم. ونى جاسىرمايمىن. بۇل ءوزى قاسىنا ادام جينايدى دا، ولاردى كەيىن ساتىپ كەتەدى عوي. سول ساتىپ كەتكەن ادامدارى ماعان قۇجاتتاردى دايىنداپ، اكەلىپ بەردى. ناقتى دالەلدەر بار. ول قۇجاتتاردىڭ ءبارى مەندە تۇر، سونىڭ ءبارىن كەلتىرىپ، ۇستىنەن ارىز جازدىم. وعان قاتىستى قۇجاتتاردى اكەلىپ بەرگەندەر مەنىڭ ناقاقتان-ناقاق كۇيگەنىمدى، قورلانعانىمدى جاقسى بىلەدى. ال مۇنى وزدەرى ايتۋعا قورقادى»، -دەدى ول.

اكتەردىڭ ايتۋىنشا، ارىستانبەك مۇحامەديۇلىنىڭ «جوعارى جاقتاعى ادامداردىڭ ەرەكشە قورعاۋىندا بولعان سوڭ» سوت ادىلەتسىز ۇكىم شىعارعان.

«ويتكەنى، ول بۇعان دەيىن جوعارعى جاقتاعى ادامداردىڭ ەرەكشە قورعاۋىندا بولدى. ول ەشكىم تيىسە المايتىن ادام ەدى. سول كەزدە ايتتىڭ نە، ايتپادىڭ نە، ءبارى بەكەر ەدى. تالاي رەت ايتتىق. سوت ارقىلى دا ءبىزدىڭ جازىعىمىز جوق ەكەنىن دالەلدەگەنبىز. بىراق ول انا كىسىنىڭ قامقورلىعىندا بولعاننان كەيىن ءبارى قورىقتى. ادىلەتسىز ۇكىم شىعاردى، ادىلەتسىز تەرگەۋ جاسادى. ەندى قازىر دۇنيە وزگەردى”،-دەيدى جامانقۇلوۆ.

بۇعان دەيىن بۇرىنعى مادەنيەت ءمينيستىرىنىڭ ءۇيى مەن ۇلتتىق مۋزەيدە ءتىنتۋ جۇرگىزىلىپ جاتقانى بەلگىلى بولعان ەدى. كەيىنىرەك ارىستانبەك مۇحامەديۇلى ءوزىن-ءوزى ءولتىردى دەگەن حابار تارادى. الايدا، ۇلتتىق مۋزەيدىڭ ءباسپاسوز حاتشىسى بۇل اقپاراتتى جوققا شىعاردى. وسىدان كەيىن ارىستانبەك مۇحامەديۇلى الەۋمەتتىك جەلىدەگى پاراقشاسىندا پرەزيدەنت قاسىم-جومارت توقاەۆتىڭ اتىنا ۇندەۋ جاساپ، ۇستىنەن جۇرگىزىلىپ جاتقان سىبايلاس جەمقورلىققا قارسى تەرگەۋدىڭ  جامانقۇلوۆپەن اراداعى ارازدىقپەن بايلانىستى ەكەنىن ايتقان.

ەستەرىڭىزگە سالا كەتەيىك، 2017 جىلدىڭ ماۋسىم ايىندا تۇڭعىشباي جامانقۇلوۆ "فەنيكس" ءفيلمى ءوندىرىسىنىڭ دايىندىق كەزەڭىندە شامامەن 69 ميلليون تەڭگە جىمقىردى دەگەن ايىپپەن 3,5 جىلعا شارتتى تۇردە باس بوستاندىعىنان ايىرىلعان بولاتىن.

 

Abai.kz

10 پىكىر