قازاقستان ۇلتتىق قاۋىپسىزدىك كوميتەتىنىڭ بۇرىنعى توراعاسى كارىم ءماسىموۆتىڭ قاماۋ مەرزىمى 6 ماۋسىمعا دەيىن ۇزارتىلدى. بۇل جونىندە ۇقك ءباسپاسوز قىزمەتى حابارلادى.

سايتتىڭ جازۋىنشا، ۇقك توراعاسىنىڭ بۇرىنعى ورىنباسارلارى ءانۋار سادىقۇلوۆ پەن داۋلەت ەرعوجيننىڭ دە قاماۋ مەرزىمى ۇزارعان. سادىقۇلوۆ – 6 ماۋسىم، ەرعوجين – 13 ماۋسىمعا دەيىن قاماۋدا بولادى.

بيىل قاڭتار باسىندا قازاقستاننىڭ شىعىسى مەن وڭتۇستىگىندەگى نارازىلىقتارعا بەيمالىم توپتار ارالاسىپ، ارتى قانتوگىسكە ۇلاستى. سول كەزدە پرەزيدەنت قاسىم-جومارت توقاەۆ نازارباەۆتىڭ كوپ جىلعى سەنىمدى سەرىگى، ۇقك توراعاسى كارىم ءماسىموۆتى ورنىنان الدى، ىلە-شالا ول تۇتقىندالعان.

ونىڭ ۇستىنەن قوزعالعان قىلمىستىق ىسكە "اسا قۇپيا" بەلگىسى قويىلدى. ءماسىموۆ ۇستالعاننان ءبىراز ۋاقىت وتكەن سوڭ وعان "بيلىكتى كۇشپەن باسىپ الۋعا تالپىندى", "قىزمەت بابىن اسىرا پايدالاندى" دەگەن ايىپتار قوسا تاعىلعانى ءمالىم بولدى. ماسىموۆپەن بىرگە ونىڭ ءۇش ورىنباسارى دا ۇستالعان. بۇرىنعى پرەزيدەنت نۇرسۇلتان نازارباەۆتىڭ نەمەرە ءىنىسى، ۇقك توراعاسىنىڭ ءبىرىنشى ورىنباسارى قىزمەتىندە ۇزاق وتىرعان سامات ءابىش تە قىزمەتتەن الىندى.

Abai.kz