جەكسەنبى, 26 ماۋسىم 2022
بيلىك 1171 2 پىكىر 11 مامىر, 2022 ساعات 14:58

توقاەۆ رەسەيدى اينالىپ وتەتىن كولىك باعىتى جايلى ايتتى

انكارادا مەملەكەتتىك ساپارمەن جۇرگەن قازاقستان باسشىسى قاسىم-جومارت توقاەۆ تۇركيا پرەزيدەنتى رەجەپ تايىپ ەردوعانمەن "ستراتەگيالىق ارىپتەستىكتى كەڭەيتۋ" جونىندەگى كەلىسىمگە قول قويعانىن مالىمدەدى.

ەكىجاقتى كەلىسسوزدەن كەيىن توقاەۆ پەن ەردوعان ىنتىماقتاستىقتى بەكىتۋ جونىندەگى 14 بىردەي كەلىسىمگە قول قويعان.

ەردوعان توقاەۆپەن كەزدەسۋ كەزىندە رەسەيدىڭ ۋكرايناعا اشقان سوعىسى ءسوز بولعانىن جەتكىزدى. "ۋكراينانىڭ تاۋەلسىزدىگى مەن اۋماقتىق تۇتاستىعىن ساقتاي وتىرىپ جاعدايدى بەيبىت رەتتەۋ جونىندەگى كوزقاراسىمىز سايكەس كەلدى", - دەپ تۇركيا پرەزيدەنتىنىڭ سوزدەرىنە سىلتەمە كەلتىرەدى Daily Sabah باسىلىمى.

رەسەيدىڭ اسكەري اگرەسسياسىن ايىپتاماعان قازاقستان ۋكراينانىڭ اۋماقتىق تۇتاستىعىن سىيلايتىنىن، دونباسستاعى جىكشىلدەردى مويىندامايتىنىن جەتكىزگەن. نۇر-سۇلتان ۋكرايناعا بىرنەشە رەت گۋمانيتارلىق كومەك جىبەردى. قازاقستاننىڭ جوعارى لاۋازىمدى شەنەۋنىكتەرى رەسەيگە باتىس ەنگىزگەن سانكتسيالاردان اينالىپ وتۋگە كومەكتەسپەيتىنىن مالىمدەگەن.

بىرقاتار ساراپشىلار سوڭعى كەزدە ورتالىق ازيادا بەلسەندى بولىپ جاتقان تۇركيا قازىرگى جاعدايدى پايدالانىپ، تۇركىتىلدەس ەلدەرگە ىقپالىن جۇرگىزۋگە تالپىنىپ جاتىر دەيدى.

تاراپتار ساۋدا اينالىمىن ەكى ەسەگە كوبەيتۋگە نيەتتى ەكەنىن مالىمدەدى. بىلتىر تۇركيا قازاقستاننىڭ سىرتقى ساۋدا ارىپتەسىنىڭ العاشقى بەستىگىنە ەنگەن. توقاەۆ بۇل ساپارىندا ءبىر ملرد دوللار ساۋدا كەلىسىمىنە قول قويىلاتىنىن جەتكىزگەن.

ء"بىز تۇرىك حالقى قازاقستانعا ۇنەمى كەڭپەيىلدى ءارى اشىق ەكەنىن جاقسى بىلەمىز. ءبىز مۇنى ۇنەمى سەزىنەمىز. بۇل ساپار ساياسي، ساۋدا-ەكونوميكالىق، مادەني-گۋمانيتارلىق، اسكەري-تەحنيكالىق، ينۆەستيتسيالىق ىنتىماقتاستىقتى ودان ءارى دامىتۋعا مۇمكىندىك بەرەدى. اسىرەسە ەكى ەل ءۇشىن ترانسكاسپي حالىقارالىق كولىك باعىتتارىن قولدانۋ ماڭىزدى", - دەدى توقاەۆ كەلىسسوزدەن كەيىن.

ول بۇل ءدالىز ارقىلى رەسەيدى اينالىپ ءوتىپ، قىتايدان بىردەن ەۋروپاعا بارۋعا بولاتىنىن ايتتى. اتالعان كولىك ءدالىزى قازاقستاننىڭ كاسپي تەڭىزى ارقىلى ازەربايجان، گرۋزيا، تۇركيا، ءارى قاراي ەۋروپاعا جول اشادى.

قىتاي ءساۋىر ايىندا قازاقستان ارقىلى رەسەيدەن اينالىپ ءوتىپ، ەۋروپاعا باراتىن تەمىرجول باعىتىن اشقان.

ەردوعان سوزىندە قازاقستان تۇركى حالقىنىڭ تاريحي وتانى ەكەنىن، ال تۇركيا قازاقستاندىقتاردىڭ ەكىنشى ءۇيى ەكەنىن ايتقان.

ء"بىز قازاق باۋىرلارىمىزدىڭ تۇراقتىلىعى مەن قاۋىپسىزدىگى ءۇشىن جاۋاپكەرشىلىك الامىز", - دەدى تۇرىك پرەزيدەنتى.

توقاەۆ ساپارى ەكى ەلدىڭ ديپلوماتيالىق قارىم-قاتىناسىنىڭ 30 جىلدىعىنا ارنالعان. قازاقستان تاۋەلسىزدىگىن ەڭ ءبىرىنشى مويىنداعان ەل تۇركيا بولدى ءارى انكارا 1992 جىلى ءبىرىنشى بولىپ ديپلوماتيالىق ميسسياسىن اشتى.

Abai.kz

2 پىكىر