رەسەي اسكەرى ۋكراينادا حيميالىق قارۋ قولدانۋى مۇمكىن ەكەندىگى جايىندا باتىستىق تاراپتان بىرنەشە مارتە اقپاراتتار مەن بولجامدار ايتىلدى. باتىس تاراپى رەسەي حيميالىق قارۋ قولدانسا، وندا قاتاڭ جاۋاپ بەرەتىنىن دە ەسكەرتكەن بولاتىن. اقش باسشىسى بايدەن: «حيميالىق قارۋ سوعىستىڭ سيپاتىن وزگەرتەدى جانە وتە قاتاڭ قارسى رەاكتسيا ءسوزسىز بولادى»، - دەدى. 

الەمدىك قاۋىمداستىق قاقتىعىستاردا حيميالىق قارۋ قولدانعان ساتتە جەدەل ارەكەت ەتەدى. 2013 جىلى سيريادا حيميالىق قارۋ قولدانىلعان جايت تىركەلدى. سالدارىنان 1500 جۋىق ادام قازا تاپتى. الەمدىك قاۋىمداستىق سيريانىڭ حيميالىق قارۋدى جويۋىن تالاپ ەتىپ، قىسىمعا الدى. حيميالىق قارۋ بۇۇ-نىڭ ارنايى شەشىمى بويىنشا جويىلدى. الايدا ساراپشىلار 2017 جىلى سيريا اسكەرى تاعى دا حيميالىق قارۋ قولداندى دەگەن اقپارات بارىن ايتتى جانە باشار اساد بيلىگى حيميالىق قارۋدىڭ تەك قانا 60 پايىزىن جويدى دەگەن جورامالدى ۇسىندى.

11 ساۋىردە ماريۋپول قورعانىسىندا تۇرعان «ازوۆ» پولكى رەسەي اسكەرى درونمەن بەلگىسىز حيميالىق قارۋ قولدانعانىن ايتتى. بىرنەشە ادام ءوزىن جايسىز سەزىنىپ، اۋزىنان كوبىك اققانى جايلى باياندادى. تۇرعىنداردىڭ تىنىس الۋى قيىنداعان. ماماندار بۇل از مولشەردەگى زارين بولۋى مۇمكىن دەيدى.

11 ءساۋىر كۇنى سەپاراتيست ەدۋارد باسۋرين ماريۋپول قورعانىسىنداعى ساربازدارعا قارسى حيميالىق قارۋ قولدانۋعا اشىقتان اشىق شاقىردى. «ءوزىمىز كوپ ساربازىمىزدان ايىرىلىپ قالۋىمىز مۇمكىن، ال قارسىلاس ايتارلىقتاي شىعىنعا ۇشىرامايدى. سوندىقتان قازىرگى تاڭدا ءبىز بۇل زاۋىتتى تولىق شىعۋ جولدارىن جاۋىپ تاستاۋىمىز كەرەك، ول قولىمىزدان كەلەدى. ارتىنشا حيميالىق جاساققا ءوتىنىش ايتساق، ولار كورتىشقانداردى ىنىنەن شىعارۋدىڭ امالىن تابادى دەپ ويلايمىن. بۇل «ازوۆستالعا» قاتىستى وسىلاي ايتساق بولادى»، - دەدى. ماريۋپول قالاسىنداعى «ازوۆستال» زاۋىتىنا 4 مىڭعا جۋىق ۋكراينا اسكەرى مەن ۇلتشىل جاساقتار بەكىنگەن. ولار قالانى قورعاپ، رەسەي اسكەرىنە سوققى جاساپ كەلەدى.

ۋكراينا تاراپى رەسەي حالىقارالىق بارلىق تالاپتى بۇزىپ، تىيىم سالىنعان سوعىس ءتاسىلىن جۇرگىزۋدە دەپ اشىق ايىپتادى. بۇعان دەيىن رەسەيدىڭ فوسفور قارۋىن قولدانعانى ايتىلعان بولاتىن. «بۋچا قىرعىنى» مەن گۋمانيتارلىق دالىزدەردى اتقىلاۋى دا ناقتى دالەل رەتىندە بەكىتىلدى. رەسەي اسكەرى حيميالىق قارۋ قولدانۋ مۇمكىندىگىن باتىس تاراپى ساراپتاۋدا.

Abai.kz