قوعام جانە مەملەكەت قايراتكەرى زامانبەك نۇرقادىلوۆتىڭ ۇلى قايرات نۇرقادىلوۆ جۋىردا ءوز سۇحباتىندا ەكس-پرەزيدەنت نازارباەۆتىڭ 60 جاسىنا بارلىق وبلىس اكىمدەرى 1 ملن دوللاردان جيناپ بەرگەنىن، ءوز اكەسىنىڭ اقشاسى بولماي، كارتينا سىيلاعانىن ايتقان ەدى.

سونىمەن، نۇرسۇلتان نازارباەۆ 1940 جىلدىڭ 6 شىلدەسىندە تۋعان. ول 60 جاسقا 2000 جىلى تولعان. وسىدان 22 جىل بۇرىن وبلىس باسقارعان ازاماتتار كىمدەر؟ قاراڭىز:

اقمولا وبلىسىنىڭ اكىمى – سەرگەي كۋلاگين. قازىر 69 جاستا. زەينەت دەمالىسىندا. ول اقمولا وبلىسىن 1998-2004 جىلدار ارالىعىندا باسقارعان. ۇكىمەتتە بولعان، قر اۋىل شارۋاشىلىق مينيسترلىگىن تىزگىندەگەن. 2017 جىلى قىزمەتىنەن الىنعان.

اقتوبە وبلىسىنىڭ اكىمى – اسلان مۋسين. قازىر 68 جاستا. بۇل كىسى دە قازىر زەينەتتە. اقتوبە وبلىسى اكىمدىگىن 1995-2002 جىلدار ارالىعىندا باسقارعان. سوڭعى رەت حورۆاتيادا ەلشى بولىپ ءجۇرىپ 2017 جىلى زەينەت جاسىنا تولۋىنا بايلانىستى قىزمەتىنەن الىنعان.

اتىراۋ وبلىسىنىڭ اكىمى – يمانعالي تاسماعامبەتوۆ. قازىر 65-تە. بۇل كىسى دە زەينەتكە شىعىپ، مەملەكەتتىك قىزمەتپەن قوش ايتىسقان. اتىراۋ وبلىسىن 1999-2000 جىلدارى ارالىعىندا باسقارعان. 2000 جىلدىڭ جەلتوقسانىندا ۇكىمەتكە اۋىسقان. 2017-2019 جىلدار ارالىعىندا رەسەيدە ەلشى بولىپ ءجۇرىپ، زەينەتكە كەتتى.

شىعىس قازاقستان وبلىسىنىڭ اكىمى  – ۆيتالي مەتتە. بۇل كىسى 2003 جىلى قايتىس بولعان. شىعىس قازاقستاندى 1997-2003 جىلدار ارالىعىندا باسقارعان.

باتىس قازاقستان وبلىسىنىڭ اكىمى – قابيبوللا جاقىپوۆ. قازىر 72 جاستا. ەڭبەك دەمالىسىندا. وبلىستى 1993-2000 جىلدار ارالىعىندا باسقارعان.

جامبىل وبلىسىنىڭ اكىمى – سەرىك ۇمبەتوۆ. 71-دەگى سەرىك ۇمبەتوۆ قازىر زەينەتتكە شىققان. جامبىل وبلىسىن 1994-2004 جىلدار ارالىعىندا باسقارعان.

قاراعاندى وبلىسىنىڭ اكىمى – كامالتين مۇحامەدجانوۆ. بۇل كىسى دە قازىر زەينەت دەمالىسىندا. جاسى 73-تە ەكەن. وبلىستى 1999-2006 جىلدار ارالىعىندا باسقارعان.

قوستاناي وبلىسىنىڭ اكىمى – ومىرزاق شوكەەۆ. شوكەەۆ قازىر 57-دە. تۇركىستان وبلىسىن باسقارىپ وتىر. قوستاناي وبلىسىن 1998-2004 جىلدار ارالىعىندا باسقارعان.

قىزىلوردا وبلىسىنىڭ اكىمى – سەرىكباي نۇرعيساەۆ. قازىر 65-تە. زەينەت دەمالىسىنا شىققان. وبلىستى 1999-2004 جىلدار ارالىعىندا تىزگىندەگەن.

ماڭعىستاۋ وبلىسىنىڭ اكىمى  – لاززات قيىنوۆ. قازىر 72 جاستا. زەينەتكەر. ماڭعىستاۋ وبلىسىن 1999-2002 ارالىعىندا باسقارعان. بىرقاتار مەملەكەتتىك قىزمەتتە ىستەگەن. 2017 جىلعا دەيىن سەناتتا دەپۋتات بولعان.

پاۆلودار وبلىسىنىڭ اكىمى  – عالىمجان جاقيانوۆ. قازىر 58-دە. ساياسي ديسسيدەنت اتانىپ، شەتەلگە باس ساۋعالاپ كەتكەن. ول وبلىستى 1997-2001 جىلدار ارالىعىندا باسقارعان. قازاقستان بيلىگى جاقيانوۆتى 2002 جىلى 7 جىلعا سوتتاعان. ال 2006 جىلى ۋاقىتىنان بۇرىن بوساپ شىققان. حالىقارالىق ۇيىمدار ونى ساياسي تۇتقىن دەپ تانىعان.

سولتۇستىك قازاقستان وبلىسىنىڭ اكىمى – قاجىمۇرات ناعمانوۆ. قازىر 73 جاستا ەكەن. ول وبلىستى 1999-2002 جىلدار ارالىعىندا باسقارعان.

بۇرىنعى وڭتۇستىك قازاقستان وبلىسىنىڭ اكىمى  – بەردىبەك ساپارباەۆ. جاسى 69-دا. قازىر جامبىل وبلىسىنىڭ اكىمى. بۇرىنعى وقو-نى 1999-2002 جىلدار ارالىعىندا باسقارعان.

استانا قالاسىنىڭ اكىمى (قازىرگى نۇر-سۇلتان) – ادىلبەك جاقسىبەكوۆ. قازىر 67-دە. زەينەتكە شىققان. 1997-2003 جىلدار ارالىعىندا باس قالانى باسقارعان.

الماتى قالاسىنىڭ اكىمى – ۆيكتور حراپۋنوۆ. حراپۋنوۆ قازىر 73-تە. 1997-2007 جىلدار ارالىعىندا الماتى قالاسىن باسقارعان. 2007 جىلى قىزمەتىنەن ۇلكەن داۋمەن كەتىپ، شەتەلگە قونىس تەپكەن.

ول كەزدە الماتى وبلىسىن زامانبەك نۇرقادىلوۆ باسقارعان (1997-2001 جىلدار ارالىعى).

Abai.kz