سەيسەنبى, 20 قازان 2020
COVID-19 قازاقستاندا. جۇقتىرعاندار — 109623. جازىلعاندار — 105145. قايتىس بولعاندار — 1796
جاڭالىقتار 2806 0 پىكىر 1 قازان, 2012 ساعات 07:45

«قازاقستاننىڭ بارىسى» انىقتالدى. بالۋاندار نە دەيدى؟

 

كءۇنءالەم ەرجانوۆ:

«تورەشىلەردىڭ ارەكەتى زىعىردانىمدى قايناتتى»

 

كءۇنءالەم ەرجانوۆ:

«تورەشىلەردىڭ ارەكەتى زىعىردانىمدى قايناتتى»

- بيىلعى «قازاقستان بارىسىنا» تىڭ دايىندىقپەن كەلىپ ەدىم، الايدا جامان اسەرمەن كەتىپ بارامىن. جارىستى ادەتتە العاش باستاعان سپورتشىعا اۋىر بولادى دەپ جاتادى. بىراق مەن ەشقانداي اۋىرلىقتى دا، قيىندىقتى دا سەزىنگەنىم جوق. كەرىسىنشە، جەڭىس جولىنداعى قادامىمدى سەنىمدى باستادىم. ەرەجە بويىنشا سايىسقا كەلگەن 34 بالۋاننىڭ ارسىنان ەكى بالۋاندى شىعارۋ قاجەت بولاتىن. سول سەبەپتى دودانىڭ تۇندىگىن تۇرگەن جەكپە-جەكتىڭ جەڭىمپازى قايتا بوز كىلەمگە شاقىرىلادى. مەن دە تۇڭعىش جەڭىسىمنەن اراعا ءبىر بەلدەسۋ سالىپ قايتا كوتەرىلدىم. بىراق بۇل دا مەنىڭ نارازىلىعىمدى تۋعىزعا قويعان جوق. دەلەبەمدى قوزدىرا تۇسكەن سەكىلدى قايتا. ادەتتە از تىنىققان سپورتشىلار: «مەن دەمالىپ ۇلگەرمەدىم. قارسىلاسىم كوبىرەك تىنىقتى. مەن شارشاپ شىقتىم» دەگەندى العا تارتىپ جاتادى. ماعان مۇنىڭ كەرى اسەرى ءتيدى دەپ ايتا المايمىن. سەبەبى،مەن «قازاقستان بارىسىنا» كەلەردە ءوز-ءوزىمدى كەز كەلگەن جاعدايعا دا دايىن بولۋىم كەرەك دەپ دايارلاعانمىن. سولاي بولدى دا. تەك تورەشىلەردىڭ ارەكەتى ءبىراز زىعىردانىمدى قايناتتى. پسيحولوگيالىق تۇرعىدان دا، كۇش جاعىنان دا قارسىلاسىمنان باسىم بولىپ كەلە جاتىر ەدىم، الايدا تورەشىلەر بەي-بەرەكەت ەسكەرتۋ جاساي باستادى. قالاي دەگەنمەن، كىلەمدە ارپالىسىپ جاتقان ءبىز عوي، كىلەمگە كوتەرىلگەنشە قارسىلاسىڭنىڭ شاماسىن بىلمەگەنىڭمەن، بەلدەسۋ باستالىسىمەن-اق ونىڭ قاي دارەجەدە ەكەندىگىن سەزەسىڭ. بىراق ماعان قارسى شىققان بالۋان مەنەن السىزدەۋ ەكەن دەپ ءوز-وزىمە بوساڭسۋعا جول بەرگەن ەمەسپىن. «قازاقستان بارىسىنا» كەلگەن ءاربىر بالۋان تەك جەڭەمىن دەپ كەلەتىنىن جاقسى بىلەمىن. ەشقايسىسى دا وسال ەمەس. بۇل دودا ەلىمىزدەگى كىل مىقتىلاردىڭ باسىن قوساتىن دودا عوي. بارلىعىنىڭ دا دايىندىعى جوعارى ەكەندىگى كورىنىپ تۇردى. سوندىقتان جەكپە-جەگىمدە بەلسەندىلىك تانىتتىم، ال مەنى ۇتقان اقمولا وبلىسىنان كەلگەن جامالوۆ نەگىزىنەن قورعانىستا ءجۇردى.

بىلتىر دا وسى الامان جارىسقا قاتىسقانمىن. ول كەزدە قاتەلىككە بوي الدىرعانىمدى مويىندايمىن. قارسىلاسىمدى الىپ ۇرماق بولعان ارەكەتىمنىڭ شىرماۋىنا ءوزىم بايلانىپ قالدىم. ال، بۇل جولى مۇنداي كەمشىلىك مەنىڭ تاراپىمنان كەتكەن جوق. ونى كورەرمەندەر دە كورگەن شىعار، ءتىپتى حابارلاسىپ، «مويىما، جەڭىلگەن جوق ەدىڭ» دەگەندەر كوپ. مەنەن كەيىنگى بەلدەسۋلەردى كورگىم كەلمەي، كەتىپ قالدىم. قانشاما دايىندىق، توگىلگەن تەر، قاجىرلى ەڭبەكتىڭ زايا كەتكەندىگىن ويلاسام، اشۋىم كەلەدى. ءتىپتى، بۇدان بىلاي «قازاقستان بارىسىنا» قاتىسپايمىن دەپ وتىرمىن.

ايبەك قىرىقباي:

«سالماقتىڭ ازدىعى سەزىلەدى ەكەن»

- جەڭىلىس تاپسام دا، ۇنجىرعامدى تۇسىرمەيمىن. بىردەن بەرىلە سالاتىن مەن ەمەس. «اتتەگەن-اي» دەپ، ىشتەي رەنجىگەنىممەن، ءۇمىت وتىن سوندىرمەيمىن. ءالى الدا تالاي جارىستار بار، تالاي بەلەستەر بار باعىندىراتىن. قالاي بولعانىمەن «قازاقستان بارىسىندا» جەڭىمپاز اتانۋ ءاربىر مەنمەن دەگەن بالۋاننىڭ ارمانى. سالماعىمنىڭ ازداۋ ەكەندىگىن بايقادىم. سوندىقتان كەلەسى جىلى ءبىراز سالماق قوسسام با دەپ جوسپارلاپ وتىرمىن. ويتكەنى «كۇش اتاسىن تانىماس» دەپ جاتساق تا، وزىڭنەن ەكى ەسەگە جۋىق ۇلكەن بالۋانمەن بەلدەسۋ وڭايعا سوقپايدى ەكەن. قانشاما ءادىس-تاسىلدەردى قولدانىپ باققانىڭمەن، ونىڭ سالماعى ءرول وينايدى، سوندىقتان الىپ دەنەسىن جايىنان قوزعالتۋىڭ ءۇشىن دە ەڭبەك ەتۋىڭ كەرەك.

العاشىندا پاۆلودارلىق باكىر مۇراتپەن كۇرەستى جاقسى باستاپ ەدىم، قاراعاندىنىڭ بارمەنوۆىمەن بولعان ەكىنشى بەلدەسۋدە دە تەڭ ونەر كورسەتىپ كەلە جاتقان بولاتىنبىز. تەك اسىعىس ارەكەت جاساپ قويدىم، ال مۇنىم وزىمە قامشى بولىپ ءتيدى. بارمەنوۆتىڭ شاماسى ماعان بەلگىلى، سەبەبى ءبىزدىڭ بۇعان دەيىن دزيۋدودان وتكەن ەل بىرىنشىلىكتەرىندە دە، وزگە جارىستاردا دا جولىمىز ءتۇيىسىپ، اسىلحاندى جەڭگەنمىن. بىراق بۇل جولى ۇتىلىپ قالدىم ەكەن دەپ، اسىلحانعا رەنجىپ، قاباق شىتپايمىن، كەز كەلگەن قارسىلاسىم سەكىلدى وعان دا كەلەسى كەزەڭدە ءساتتى ونەر كورسەتۋىن تىلەدىم. امال نەشىك، بۇيىرماعان عوي. ەندى قازاقستان چەمپيوناتىندا جەڭىسكە جەتسەم دەگەن ماقساتىم بار.

وكىنىشكە قاراي، سولتۇستىك قازاقستاننىڭ نامىسىن قورعايمىز دەپ كەلگەن مەنىڭ دە، ەسلياموۆ داۋرەننىڭ دە جولى بولمادى، سونداي-اق دايىندىعىمىزدىڭ تومەندەۋ ەكەندىگىن سەزدىم. سەبەبى بىزدە سپورتقا وزگە وبلىستارعا قاراعاندا ازداۋ كوڭىل بولىنەدى. قارجى جاعىنان دا كوپتەگەن سپورتشىلارىمىز قيىندىق كورىپ جاتادى. جارىستاردان دا تىس قالىپ قويادى قارجىلىق قولداۋدىڭ بولماعاندىعى سەبەپ. تەك سوڭعى ۋاقىتتان باستاپ قانا قالامىزدىڭ اكىمى سپورتتى، قازاق كۇرەسىن قولىنا الا باستادى.

ءوزىم جەڭىلىس قۇشسام دا، جالپى جارىستىڭ دەڭگەيىن كورىپ قاتتى ريزا بولدىم. بىلتىر اتالمىش دودا العاش رەت ۇيىمداستىرىلعاندىقتان بولار، ەلدىڭ ىشىندە مۇنداي قىزىعۋشىلىق تۋدىرا الماپ ەدى، كوپشىلىك «قازاقستان بارىسىنىڭ» وتەتىندىگىن بىلمەگەن دە. ال، بيىل جاعداي مۇلدە بولەك. ىرىكتەۋ دە وزگەرەك. «قازاقستان بارىسىنىڭ» حالىق اراسىندا ءدۇمپۋ تۋعىزارلىقتاي دارەجەگە جەتكەندىگى كوڭىلىڭدى كادىمگىدەي مارقايتىپ تاستايدى ەكەن.

ەرمەك قاليەكوۆ:

«قازاق كۇرەسىنىڭ ەرەجەسىن ناقتىلاي ءتۇسۋ كەرەك»

- مەنىڭ ءبىر بايقاعانىم، قازاق كۇرەسىنىڭ ناسيحاتتالۋىنا وسىنداي جوبا كەرەك ەدى. ارينە، ءبىر عانا «قازاقستان بارىسى» ءوزىمىزدىڭ ءتول سپورتىمىزدىڭ دامۋى ءۇشىن از. مۇنداي ءدۇبىرلى دودالاردى جىلىنا ءبىر رەت ەمەس، بىرنەشە رەت ۇيىمداستىرىپ وتىرۋ قاجەت. سوندا عانا قازاق كۇرەسىنىڭ مارتەبەسى ارتا تۇسەدى. «قازاقستان بارىسىنا» جينالعان قاۋىمنىڭ قۋانىشى، قازاق كۇرەسىنە دەگەن ساعىنىشى ءتىپتى كىلەمدە ارپالىسىپ جاتقان بىزگە دە سەزىلىپ تۇردى. وسى ارقىلى ءبىز ءوزىمىزدىڭ سپورتىمىزدىڭ دارەجەسىن حالىقارالىق دەڭگەيگە دەيىن كوتەرىپ، الەمدى وسىنداي تاماشا كۇرەستىڭ بار ەكەندىگىمەن مويىنداتامىز. مىسالى، مەن بالا كەزىمنەن كۇرەسكە اۋەس بولىپ ءوستىم. ونىڭ ۇستىنە ءبىزدىڭ وڭىردە قازاق كۇرەسىنە دەگەن قىزىعۋشىلىق جوعارى. تويلاردا بولسىن، وزگە جيىنداردا بولسىن، مىندەتتى تۇردە قازاق كۇرەسىنەن جارىستار ۇيىمداستىرىلاتىن. كەيىننەن سول العان بەتىممەن ەل اراسىنداعى، حالىقارالىق سايىستارعا بارىپ ءجۇرىپ، ءبىراز جەتىستىكتەرگە قول جەتكىزدىم. سول كەزدەردەن-اق بۇگىندە «قازاقستان بارىسىنا» قاتىسقان بالۋانداردىڭ باسىم بولىگىمەن تانىسپىن. سوندىقتان دا شىعار، بوز كىلەمدە بالۋاندارمەن قارسىلاس بولساق تا، كىلەمنەن تىس جەردە ءبىر-بىرىمىزگە دەگەن سالەمىمىز ءتۇزۋ.

ال بەلدەسۋگە كەلەر بولساق، سپورت، جارىس بولعان سوڭ بىردە جەڭەسىڭ، بىردە جەڭىلەسىڭ. جەڭىلىسىم ءوزىمنىڭ قاتەلىگىمنەن بولدى. ءبىرىنشى بەلدەسۋدە ۇتىپ شىققان سوڭ، كەلەسى - 1/16-اينالىمدا ايبەك نۇعىماروۆپەن جولىقتىق. كۇش جاعىنان بولماسا دا، ءادىس جاعىنان ايبەك مەنەن مىقتىراق بولدى. باسىندا كىلەمگە شىعار ۋاقىتتا تۇلكىمدى ۇمىتىپ كەتكەنىم ءۇشىن تورەشىلەردىڭ ەسكەرتۋ جاساپ، قارسىلاسىما ءبىر ۇپاي بەرگەنى كوڭىل-كۇيىمدى ءتۇسىرىپ جىبەردى. ويتكەنى قارسىلاسىڭا كىلەمگە كوتەرىلمەي جاتىپ ەسە جىبەرۋ دەگەن سۇمدىق قوي. كەيدە تولقۋ باسادى، كەيدە ەموتسياڭنان باسىم تۇسۋگە شاماڭ جەتپەي قالادى. ءبىر ۇپايدىڭ ءرولى اسا بىلىنبەيدى دەسەك تە، مۇنداي جايت سپورتشىنىڭ كەي جاعدايدا جەڭىسكە دەگەن جىگەرىن قۇم قىلۋى مۇمكىن. بىراق بۇل ءۇشىن ادىلقازى القاسىن جازعىرمايمىن. مەن كىلەمگە ۇتۋ ءۇشىن عانا كوتەرىلگەن بولاتىنمىن، وكىنىشكە قاراي ماقساتىم ورىندالمادى. سەبەبى بالا كۇنىمنەن سپورت الەمىنە تولىعىمەن ەنىپ كەتكەندىكتەن تالاي جاعدايدى باستان وتكىزىپ ۇلگەردىك قوي.

تاعى ءبىر ايتا كەتەرلىگى، بارلىق سپورتتا ناقتى ەرەجەلەر بار، سول سەكىلدى قازاق كۇرەسىنىڭ ەرەجەسىن دە ناقتىلاي ءتۇسۋ كەرەك. بۇعان كەشەگى وتكەن جارىستا كوز جەتكىزدىم. بالۋاندار بوز كىلەمدە كۇرەسىپ جاتىپ تورەشىلەر جاققا الاڭداۋمەن بولدى. سەبەبى ءادىس اياقتالماس بۇرىن، قانداي دا ءبىر ارەكەتتەر قولدانىلماي جاتىپ تابلوداعى كورسەتكىشتەر وزگەرەدى. ءبىر مەن ەمەس، وزگە بالۋانداردىڭ كۇرەسىن دە ءجىتى باقىلاپ وتىردىم. بارلىعى دا سول ادىلقازىلار مەن تورەشىگە جالتاقتاپ شارشادى. سايىستاعى ءاربىر بالۋان قازاقشا كۇرەستە بەلگىلى ءبىر ناتيجەگە قول جەتكىزىپ، ءوز وڭىرىندەگى ۇزدىك دەپ تانىلعاندار. سوندىقتان ولاردىڭ ءبارى ءتول سپورتىمىزدىڭ ەرەجەسىن جاقسى بىلەدى. سوزىمە دالەل رەتىندە ايتايىن، مەن ايبەكپەن بەلدەسىپ جاتقاندا ءبىر يىعىم جەرگە ءتيىپ، ايبەككە جارتىلاي جەڭىس بەرىلدى. ول كەزدە كۇش سىنىنىڭ اياقتالۋىنا ءالى ەكى مينۋتتان اسىق ۋاقىت بار بولاتىن. ءتارتىپ بويىنشا جارتىلاي جەڭىس شالقادان قۇلاعاندا بەرىلدى. نەگە ەكەنىن بىلمەيمىن، ادىلقازى القاسى بەلدەسۋدى اياقتاڭدار دەپ بۇيىردى. نە بولعانىن ءوزىم دە تۇسىنبەي قالدىم. تورەشى شىعىس قازاقستان وبلىسىنىڭ نۇعىماروۆىن جەڭىمپاز دەپ تانىدى. مەنىڭ ايبەككە قارسى ايتار داۋىم جوق. تەك الگى ورىن العان جاعدايدىڭ سەبەبىن ءالى دە تۇسىنگەن جوقپىن.

بۇل كەزدەسۋ نۇعىماروۆپەن وتكىزگەن ءبىرىنشى كەزدەسۋىم. وسى جولى ايبەك جەڭىسكە جەتتى. ول مەنى عانا ەمەس، تاعى دا بىرنەشە بالۋاندى ۇتىپ، جۇلدەلى ۇشتىككە ءىلىندى. ونى زور جەتىستىگىمەن قۇتتىقتايمىن! ايتپاقشى، اقتوبەلىك باقتىباي قيسىقوۆ تا اتىن ەرەكشەلەپ اتايتىن ازامات. ونىڭ شەبەرلىگىن جوعارى باعالايمىن. سالماعى مەنەن از بولسا دا، قيمىلى شيراق، كۇرەستىڭ قىر-سىرىن ابدەن مەڭگەرگەن جىگىت. ادەتتە كەيبىرەۋلەر سالماعى باسىمىراق بالۋاندارمەن شىعاردا ءوز-وزدەرىن جوعالتىپ قويادى. ال باقتىبايدا ونداي جوق. وتكەن جىلى ءۇش بالۋاندى جەڭىپ، بەيبىت ىستىباەۆتان ۇتىلعان ەدى. سوندىقتان باقتىبايدىڭ اقتوبەنىڭ مىقتى بالۋانى ەكەنى انىق.

جالپى، وسى جولعى دودا راسىمەن دە وتە تارتىستى بولدى. اسىرەسە ارمان ابەۋوۆ پەن ايبەك نۇعىماروۆتىڭ، بەيبىت ىستىباەۆ پەن شالقار جولامانوۆ اراسىنداعى بەلدەسۋلەر قىزىقتى ءوتتى. ناعىز قازاق بالۋانىنا لايىق ونەر كورسەتتى بۇل جىگىتتەر. مىنە، وسىنداي بەلدەسۋدە جەڭىسكە جەتسەڭ، كادىمگىدەي لاززاتقا بولىنەسىڭ. اللا بۇيىرتسا، دەنساۋلىعىم سىر بەرمەي، جاراقاتتان ءدىن-امان بولسام، كەلەسى جىلى «قازاقستان بارىسىنا» تەك قاتىسىپ قانا قويماي، مىندەتتى تۇردە ۇزدىك ۇشتىكتىڭ قاتارىنان تابىلۋدى باستى مەجە ەتىپ قويدىم.

ەدىل ۇسەنوۆ:

«ارمان قاتتى شارشاپ قالماسىن دەپ جەڭىلدىم»

- جەرەبە جولداس بولمادى دەگەن وسى. ويتكەنى وزدەرىڭىز بىلەتىندەي، مەن ءبىرىنشى اينالىمنىڭ وزىندە-اق جەرلەسىم ارمان ابەۋوۆپەن كۇش سىناستىم. ەكەۋمىز دە باتىس قازاقستان وبلىسىنىڭ اتىنان كەلگەندىكتەن، ارامىزدا تەك ءبىرىمىزدىڭ عانا جارىستى ارى قاراي جالعاستىرۋعا مۇمكىندىگىمىز بولدى. ارماننىڭ تاجىريبەسى مەن بىلىكتىلىگىن ەسكەرە وتىرىپ، ءبىز سايىستى «ورال بۋراسى» جالعاستىرسىن دەپ شەشتىك. بازبىرەۋلەر ەكەۋمىز ءبىر-بىرىمىزگە قارسى ونەر كورسەتەتىنىمىزدى بىلىسىمەن «جەڭىس ارماننىڭ قولىندا» دەپتى. اقمولا وبلىسىندا دۇنيەگە كەلگەن ارمان وتكەن جىلى «قازاقستان بارىسىندا» ءتورتىنشى ورىنعا ىلىككەن بولاتىن. سونان سوڭ قارجى ماسەلەسىنە تاپ كەلگەن ول باتىستىڭ نامىسىن قورعاۋعا اتسالىستى. شىنى كەرەك، ماعان قاراعاندا ابەۋوۆتىڭ الەۋەتى الدەقايدا جوعارى. ءتىپتى اقتىق سىندا ونەر كورسەتەرلىك شاماسى بار ەدى. دەگەنمەن وعان جەڭىس بۇيىرماي قويدى. راس، ارمان قاتتى شارشاپ قالماسىن كۇرەسكەن جوقپىن. ونىڭ ۇستىنە، بارلىعى دا بىلەتىن بۇل كەزدەسۋدىڭ قالاي اياقتالارىن. سوندىقتان، ۋاقىتتى سوزا بەرمەستەن سايىس باستالعان سوڭ باستاپقى مينۋتتاردا-اق جەڭىلۋدى ءجون سانادىم. ءارى دايىندىعىما دا كوڭىلىم تولعان جوق. ويتكەنى وتباسى، وزگە ماسەلە دەپ ءجۇرىپ ءبىراز ۋاقىت سپورتتان قول ءۇزىپ قالعانىم بار. ال ارمان قازاق كۇرەسىندەگى اتاقتى بالۋانداردىڭ ءبىرى. سول سەبەپتى مەن ونىڭ جەڭىمپاز اتاناتىنىنا 70 پايىز سەندىم. بالكىم ايبەكتى مىقتى قارسىلاس دەپ سانامادى ما، الدە ءوز جەڭىسىنە سەنىمدى بولدى ما، ايتەۋىر ايبەكتەن باسىم تۇسە المادى.

بەيبىت ىستىباەۆ:

«قازاقتان بارىسىندا» ءۇش رەت جەڭىمپاز اتانامىن»

- جەڭىستىڭ ءتاتتى ءدامىن سەزىنە العانىما قۋانىشتىمىن. جەتىستىگىمە قۋانىپ جاتقان جانكۇيەرلەرىم دە كوپ ەكەن، بۇل دا كوڭىلىمدى كوتەرىپ تاستادى. ءوز باسىم بۇل جەڭىسكە 99 پايىز سەنىپ ەدىم. 99 پايىز دەيتىنىم، 1 پايىز قانداي دا ءبىر وقىس جاعداي نەمەسە جاراقات الىپ قالامىن با دەگەن قورقىنىشىم بولدى. اللاعا شۇكىر، ەشبىر كەلەڭسىزدىك ورىن المادى. مەن وتكەن جولى بەرگەن سۇحباتىمدا دا باستى ماقساتىمنىڭ «قازاقستان بارىسى» تۋرنيرىندە جەڭىمپاز اتانۋ ەكەندىگىن ايتقانمىن. مىنە، دىتتەگەن ماقساتىمدى جۇزەگە اسىرعان سوڭ كوڭىلىم ورنىنا ءتۇستى. بىراق مۇنىمەن توقتايتىن مەن جوق. سەبەبى ءالى ەكى رەت وسى جارىستا چەمپيون اتانۋىم كەرەك. جالپى، مەن وتكەن جىلى ەكىنشى ورىندى يەلەنگەنىمدە «قازاقستان بارىسىندا» ءۇش رەت جەڭىمپاز اتانامىن دەپ ماقسات قويعانمىن. سول ويىمدى جۇزەگە اسىرعاننان كەيىن سپورتپەن قوش ايتىسسام دەپ جوسپارلاۋدامىن. ارينە، «ءالى جاسسىڭ، قايدا اسىعاسىڭ» دەيتىندەر كوپ. بىراق ءۇش رەت جەڭىس تۇعىرىن باعىندىرامىن دەگەنشە جاسىم بىرتالايعا كەلىپ قالا ما دەپ ويلايمىن. ونىڭ ۇستىنە، بارلىق نارسەنىڭ ءوز ۋاقىتى بولادى. سپورتقا كەلەتىن دە، سپورتتان كەتەتىن دە كەز كەلەدى. ءيا، وسى جولى 40 جاسقا كەلگەن بالۋاندار كۇرەسىپ ءجۇر. ولار، مۇمكىن، شابىتى ەندى اشىلىپ جاتقاندار شىعار. ال، مەن كۇرەسپەن بالا كەزىمنەن شۇعىلدانىپ كەلەمىن. سپورتشى بولعان سوڭ جەتىستىككە قول جەتكىزۋىڭ كەرەك. ال جەتىستىككە قول جەتكىزۋ ءۇشىن ەرىنبەي ەڭبەك ەتۋ قاجەت. ۇنەمى ديەتادا جۇرەسىڭ. كەيدە دوستارىڭمەن قىدىرعىڭ كەلەدى، كوڭىلىڭ قالاعان تاعامدى جەسەم دەيسىڭ. ءبىز مۇندايدان بويىمىزدى اۋلاق ۇستايمىز. جالىقتىم دەپ ايتا المايمىن. تەك ازداپ شارشادىم. ءارى قانشاما جىل جانىما سەرىك ەتكەن سپورتتان سىيىمنىڭ بارىندا كەتكەنىم دۇرىس بولادى دەپ ويلايمىن.

كەيبىرەۋلەر مەنى العاشقى كەزدەسۋىمدە سىلبىر قيمىلدادى دەپ ويلادى. بالكىم سىرت كوزگە سولاي كورىنگەن شىعار. ارينە، ءبىرىنشى بەلدەسۋ قاشان دا قيىنعا سوعارى انىق. ونىڭ ۇستىنە «جامبىل بارىسىندا» جەڭە الماعانىم تاعى بار. ءارى ءبازبىر اعالارىمىز، اتتارىن اتاماي-اق قويايىن، مەنى چەمپيون بولماق تۇگىلى، جۇلدەگەرلەردىڭ قاتارىنان كورىنبەي قالادى دەپتى. بىلتىر اسىعىستىق جاسايمىن دەپ سوڭى نەگە ۇلاسقادىعىنان حاباردارسىزدار. «اۋزى كۇيگەن ۇرلەپ ىشەدى» دەگەن ناقىل بار عوي حالىقتا. مەن سول اۋزى كۇيگەن اداممىن. بىلتىرعىداي ءبىر قاتەلىمنىڭ كەسىرىنەن جەڭىستى ۋىسىمان شىعارىپ العىم كەلمەدى. ءتىپتى، كۇشىمدى بەي-بەرەكەت سارپ ەتىپ، اقىرىندا ەشتەڭەگە شامام كەلمەي قالعان-دى. سوندىقتان بولار، بۇل جولى فيزيكالىق تۇرعىداعى دايىندىعىمدى جەتىلدىرىپ قانا قويماي، ۇستامدى، سابىرلى بولۋعا تاربيەلەدىم ءوزىمدى. تۇڭعىش «بارىس» بولۋ ارمانىم ەدى، امال نەشىك، بولا المادىم. ەشتەن كەش جاقسى.

وتكەن جىلى كورەرمەنگە شوۋ كورسەتۋدى جوسپارلاساق، بيىل جەڭىسكە قول جەتكىزۋدى كوزدەدىم. بۇلاردىڭ ءبارى سپورتشىعا پسيحولوگيالىق قىسىم تۇسىرەدى. وبلىسىمىزدا جەڭىلىس تاپقانىمدا مويىماۋعا بەل بايلادىم. ويتكەنى الار اسۋ ءالى الدا دەدىم. مىسالى، ويلاپ قاراساڭ، بارلىق سپورتشىلار بىردەي جاتتىعادى، جۇگىرەدى، گىر كوتەرەدى. بىراق جەڭىسكە تەك دەنە ءبىتىمىڭ عانا ەمەس، ىشكى جان دۇنيەڭ دە دايىن بولۋى كەرەك. كەيبىر سپورتشىلار اقشانىڭ بۋى بار، كورەرمەندەردىڭ تاراپىنان قىسىم بار، ساعىن سىندىرىپ الىپ جاتتى. مەن سەكىلدى اسىعىستىق تانىتقاندار دا كەزدەستى. رۋسلان ابدىرازاقوۆ، عاني سەيدىلداەۆ، ەرجان شىنكەەۆ سەكىلدى جىگىتتەردە قانجىعاسىن مايلاپ قايتۋعا مۇمكىندىك بولدى. بەلدەسۋلەرىن كورىپ وتىرىپ، ونەرىنە ءسۇيسىندىم. الايدا سپورتتاعى تاجىريبەم بار عوي، مەن تۇعىرعا ۇتقان ۇشەۋمىز شىعاتىنىمىزدى ءبىلدىم. ايبەك پەن شالقارعا دا الاكولدەگى جيىندا سونى ايتىپ ەدىم. ويتكەنى جاتتىعۋدىڭ وزىندە ولاردىڭ جەڭىسكە دەگەن ىقىلاسى، جىگەرى كوزىنەن كورىنىپ تۇردى. كەشە سول جەڭىس سىيلار باقىتتى ۇشەۋمىز سەزىندىك.

ءبىر جاعىنان جەڭىسىمە قۋانسام، ەكىنشى جاعىنان كورەرمەندەردىڭ قازاق كۇرەسىنە دەگەن شىن ىقىلاسىنا ريزا بولدىم. توعىز مىڭنان استام ادامدى سىيعىزاتىن «سارىارقا» ۆەلوترەگىنە كورەرمەن كوپ جينالدى. قازاق كۇرەسىن تەك تاماشالاۋعا عانا ەمەس، كادىمگى جانكۇيەرلىك تانىتۋعا كەلگەن. سوندىقتان دەلەبەمدى قوزدىرىپ، جەڭىسكە دەگەن قادامىمدى نىقتاي تۇسۋگە سەپتىگىن تيگىزگەن، ءتول سپورت دەسە، ىشكەن اسىن جەرگە قوياتىن حالىققا العىسىم شەكسىز.

 

شالقار جولامانوۆ:  «ەكىنشى ورىن مەن ءۇشىن جەڭىسپەن پارا-پار»

جالپى، ءوز باسىم بيىلعى «قازاقستان بارىسىنا» تەك جەڭۋ ءۇشىن قاتىسقانمىن. ءتىپتى ءار اينالىمداردا ۇتىلىپ قالامىن اۋ دەپ ەش ويلانبادىم دا. تەك جارتىلاي فينال تۇسىندا عانا بار كۇشىمدى سالۋىم كەرەك ەكەنىن ەرەكشە ەستە تۇتتىم. بىراق، بويلارى  2 مەتر، سالماقتارى 130 كەلىدەن اساتىن بالۋانداردان سەسكەنگەنىم راس. ولارمەن تەڭەسۋ ءۇشىن وسى جارىسقا دايىندالۋ بارىسىندا سالماق ارتتىرۋعا  قانشا تىرىسسام دا، نەگە ەكەنىن بىلمەيمىن، سالماعىم تولىسپاي قويدى. بىراق، بىلتىرعىداي ەمەس، بيىلعى ءتۋرنيردىڭ جەرەبەسى ماعان قيىنداۋ ءتۇستى. العاشقى بەلدەسۋدە-اق بىردەن عاني سەيدىلداەۆ سىندى مىقتى بالۋانمەن جولىعىپ قالىپ، ونى ارەڭ دەگەندە الىپ جىقتىم. سونداي-اق، كەلەسى قارسىلاسىم قاراعاندىنىڭ اتىنان سىنعا تۇسكەن الەكساندر كاساچەۆتى دە ۇتۋ قيىنعا سوقتى. جارىسقا قاتىسپاس بۇرىن الەكساندر ەكەۋمىزدىڭ ارامىزدا ءبىراز اڭگىمەلەر گۋىلدەگەن بولاتىن.  جۋىردا  سەمەيدە وتكەن د.تۇرلىحانوۆ اتىنداعى تۋرنيردە ودان ۇتىلىپ قالعانىم بار. شىنى كەرەك، اتالمىش جارىسقا مۇلدە دايىن ەمەس بولىپ بارعانمىن. تەك ۇلكەن كىسىلەردىڭ ۇسىنىسىمەن جاي قاتىسا سالدىم. سول ساتتە ەل ىشىندە «كاساچەۆ مىقتى ەكەن! بىلتىر «قازاقستان بارىسىنان» ءۇشىنشى ورىن يەلەنگەن بالۋاندى الىپ جىعىتى»- دەگەن سىبىس جەلدەي ەسىپ كەتتى. سول سەبەپتى، ودان قالاي دا بولسىن ەسەمدى قايتارۋ بار كۇش-قۋاتىمدى سارپىپ، كۇرەستىم. اقىرى جەڭدىم. ال، كەلەسى قارسىلاسىم رۋسلان ابدىرازاقوۆ  ءوز-وزىنە تىم سەنىمدى بولىپ، سوڭىندا مەنەن قالاي جەڭىلىپ قالعانىن ءوزى سەزبەي قالدى. رۋسلاننان كەيىن وليمپيادا قاتىسۋشىسى ەرجان شىنكەەۆپەن كۇرەسكەنىم وزىمە وتە اۋىر ءتيدى. ونىڭ الدىندا دا «العاشقى اينالىمدا شىنكەەۆ كەزدەسىپ قالسا قالاي بولار ەكەن؟»- دەپ ويلاپ جۇرەتىنمىن. ەرجان - راسىمەن مىقتى بالۋان. ءبىز قازاقستاننىڭ ىشىندە عانا كۇرەسىپ جۇرسەك، ول شەتەلدىك ارەنالارعا شىعىپ جۇرگەن تاجىريبەلى جىگىت. سول سەبەپتى، ونى ايقىن باسىمدىقپەن ۇتقىم كەلىپ، بار كۇشىمدى سوعان سارپىدىم. ال، فينالدا جولىم تۇيىسكەن بەيبىت ىستىباەۆقا ءالىم كەلمەي قالدى. ءبىر جاعىنان بەيبىتتىڭ سالماعى مەنەن اۋىر ءارى بويى دا ۇزىن. جالپى، ەرجاندى جەڭگەن سوڭ، بەيبىتپەن قينىعا تۇسەتىنىن بوز كىلەمگە شىقپاي-اق سەزدىم. سەبەبى، ءۇزىلىس كەزىندە ءوز-وزىمە كەلە الماي وتىردىم. مۇمكىن، جارتىلاي فينالدا ەرجانمەن ەمەس، باسقا بالۋانمەن كەزىككەندە بەيبىتتى ءسوزسىز جەڭەر ەدىم. اقىرى جەڭىلىس تاپقان سوڭ، ىشتەي ىزالانىپ، جان-جاعىمدى قيراتىپ تاستاعىم كەلىپ، بىرازعا دەيىن ءوز-وزىمە رەنجىپ ءجۇردىم. بىراق، رەنجىگەننەن نە پايدا؟ بۇيىرعانى - ەكىنشى ورىن بولدى. جالپى، ەكىنشى ورىنعا ەش وكىنبەيمىن. العاشقى اينالىمدا-اق ۇتىلىپ، تاۋى شاعىلىپ قالعان نەبىر مىقتى بالۋاندار بار. ونىڭ قاسىندا ەكىنشى ورىن دەگەن مەن ءۇشىن جەڭىسپەن پارا-پار.

رۋلسان ابدىرازاقوۆ:

«ۇتىلىپ قالۋىما ۇلاننىڭ دا جەڭىلىسى اسەر ەتتى»

جالپى، «قازاقستان بارىسىنىڭ» وسى جولعى ماۋسىمىنىڭ مىقتىلارى دەپ شىنكەەۆ ەرجان مەن ىستىباەۆ بەيبىتتى تانىپ، كۇنى-ءتۇنى ءدال وسى ەكى بالۋانعا قارسى دايىندالعانمىن. شىنىمدى ايتسام، بۇل جارىسقا بىلتىرعىدان بەتەر مىقتى ازىرلەنىپ  كەلىپ ەدىم، بىراق، اتالمىش سايىستا توپ جارۋ باقىتى ماعان بيىل دا بۇيىرماپتى. بىلتىر دا ءداپ سول 1/8-فينالدا جارىستان شىعىپ قالىپ ەدىم. بيىل دا سول كورىنىس قايتالاندى. العاشقى اينالىمداردا نۇرزات بەكاسىلوۆتى تازا جەڭىسپەن، ال نۇرجان جامالوۆتى جامباس ادىسىمەن ۇتقانىممەن، ازۋلى شالقار جولامانوۆتان ايلامدى اسىرا المادىم. العاشقى مينۋتتا ونى جارتىلاي جەڭىسپەن ۇتىپ تۇرعانمىن. بىراق، بۇل ناتيجەنى قاناعات تۇتپاي،  ونى تاعى دا الىپ جىققىم كەلىپ، ءوزىم ءبىرىنشى شابۋىل جاساعانىم سول-اق ەكەن، ول مەنىڭ وسال تۇسىمدى تاۋىپ الىپ، تازا ۇتىپ كەتتى. ءسويتىپ ويلاماعان جەردەن جەڭىستى قولدان بەرىپ قويدىم. ارينە، بۇلاي جەڭىلگەنىمە قاتتى وكىنەمىن. بىراق، وكىنگەننەن ول سايىس ەندى قايتىپ ۇيىمداستىرىلمايدى. بولار ءىس بولدى. ءبىر شەتىنەن، ۇتىپ تۇرىپ، ۇتىلىپ قالۋىما اعام - ۇلاننىڭ دا جەڭىلىسى اسەر ەتتى دەپ ويلايمىن. سەبەبى، ونىڭ ارمان ابۋەۆپەن كۇرەسكەنىن باسىنان-اياق باقىلاپ، اقىرىندا ونىڭ جەڭىلىس تاپقانىن كوڭىلىمە قاتتى الىپ قالدىم. ءسويتىپ، بوز كىلەمگە شىقپاس بۇرىن، كوڭىلىم ءتۇسىپ قالدى. مۇمكىن، اعامنىڭ كۇرەسۋىن كورمەۋىم كەرەك پە ەدى؟ ونىڭ ارتىنان ىلە-شالا مەن ۇتىلعان سوڭ، اعام جانىما كەلىپ:  «نەگە اسىعاسىڭ؟ ۇتىپ كەلە جاتىپ، بۇلاي كۇرەسكەنىڭ نە؟»-دەپ ءوز رەنىشىن ءبىلدىردى. باپكەرىم دە «رۋسلان-اۋ، مۇنىڭ بارلىعىن ۇيدە جاتتىعۋدا جاساپ ەدىك قوي. مىنا قاتەلىكتى قالايشا جىبەردىڭ؟»-دەپ  رەنىشىن ايتتى. بىراق، بارلىعى اللاھ تاعالانىڭ بۇيرىعىمەن بولاتىن دۇنيە. دەمەك، سول اينالىمدا مەنىڭ ءسۇرىنۋىم كەرەك بولدى. ءسۇرىندىم. بىراق، ورتا جولدا ءسۇرىندىم دەپ قايمىققان مەن جوق. اللاھ قولداسا، وسى جولى جىبەرگەن قاتەلىكتەردەن ساباق الىپ، كەلەسى «قازاقستان بارىسىنا» تاعى دا قاتىسپاقپىن. ەندى كەلەسى جىلى ءتۇبى ۇتامىن دەپ ويلايمىن.

 

رۋسلان سەيىلحانوۆ: «بۇل تۋرنيرگە ەندى قاتىسپايمىن»

جالپى، ءوز باسىم «قازاقستان بارىسىنا» ءبىرىنشى رەت قاتىسىپ تۇرمىن.  سپورتپەن قوش ايتىسقانىما ون جىلدان استام ۋاقىت وتسە دە، ىرىكتەۋ جايلى تەلەديداردان ەستىگەن سوڭ، قىزىعۋشىلىعىم ويانىپ، جاسىم قىرىقتان اسىپ بارا جاتسا دا اتالمىش تۋرنيرگە قاتىسىپ كورگىم كەلدى. ءارى جان-جاقتان دوستارىم دا: «سپورتتا ازدى-كوپتى جيناعان تاجىريبەڭ بار. قاتىسىپ كورسەڭشى»- دەپ ۇسىنىس ايتتى. ءسويتىپ، الدىمەن اۋىل-ايماق، كەيىننەن اۋدان، وبلىستىق ىرىكتەۋلەردەن ءوتىپ، اقىرىندا الماتى وبلىسىنىڭ اتىنان سىنعا تۇسەتىن قوس بالۋاننىڭ ءبىرى اتاندىم. جالپى، بۇل تۋرنيرگە قاتىسا ءجۇرىپ، ءوز باسىم كۇشتى اسەر الدىم. شىنىمەن، وزگەلەر ايتىپ جۇرگەندەي بۇل جارىستىڭ ء جونى بولەك ەكەن. ءوز بولجامىمدا وسى جىلعى «قازاقستان بارىسى» اتاعىن ەرجان شىنكەەۆ يا بولماسا ارمان ابەۋوۆ ۇتادى دەپ ويلاعانمىن. العاشقى اينالىمداردا 32 بالۋاننىڭ ىشىنەن «مىناۋمەن جولىم تۇيىسەدى-اۋ...» -دەپ، بارلىعىن بولجاسام دا، تەك ەرجان شىنكەەۆپەن كەزىكپەسە ەكەنمىن دەپ ويلاپ ەدىم. سەبەبى، ەرجان - وتە قولايسىز قارسىلاس. ول دا مەن سەكىلدى سولاقاي بالۋان.  ونىڭ الدىندا ەرجاندى سىرتىنان باقىلاپ، قاداعالاپ جۇرەتىنمىن. ءسوز جوق، ول - مىقتى بالۋان. ونىڭ سول مىقتىلىعىن مويىنداپ، ونىمەن كۇرەسۋدەن قاشقالاقتاپ ەدىم. بىراق، «كىمنەن قاشساڭ، سوعان تاپ بولاسىڭ»-دەگەندەي، جەرەبەم جولداس بولماي، ءبىرىنشى ايقاستا ءداپ سول ەرجانمەن كەزدەسۋگە تۋرا كەلدى. بايقاعاندارىڭىزداي، ەرجان لوندون وليمپياداسىنان كەيىن ءوز بابىن جوعالتا قويماعانىن ەرەكشە بايقاتتى. ءارى ءوزى مەنەن ون ءتورت جاس كىشى. سالماعى دا ۇلكەن. جارىس بىتكەن سوڭ ءوزى دە قاسىما كەلىپ: «سىزبەن كۇرەسىپ جاتقاندا قايدان ەكەنىن بىلمەيمىن، ەكىنشى تىنىسىم اشىلىپ كەتتى...»-دەپ جاتىر. نەگىزى مەنىڭ دە ەرجان سەكىلدى ءبىر ەمەس، ەكى وليمپياداعا قاتىستى دەگەن اتاعىم بار. دەسەك تە، مەنىڭ ول داۋرەنىمنىڭ ۋاقىتى ءوتىپ كەتكەلى قاي زامان؟.. جىلدار بويى سالماق پەن كۇش-قۋاتتى ۇستاپ تۇرۋ وڭاي شارۋا ەمەس قوي. دەگەنمەن جوعارىدا ايتىپ وتكەنىمدەي، قولايسىز قارسىلاس بولعان سوڭ، وعان بىردەن ەسە جىبەرىپ الدىم. ەگەر العاشقى قارسىلاسىم ول بولماعاندا ءبىراز جەرگە دەيىن بەلدەسەر ەدىم. بىراق، وتكەن ءىس ءوتتى. وتكەنگە وكىنىپ، سان سوققاننان پايدا جوق. جالپى، بۇل تۋرنيرگە قىزىقتىم، قاتىستىم، جەڭىلدىم. ەندى قاتىسپايمىن.

ۇلان رىسقۇل: «بوز كىلەمنەن تۇرعىم دا كەلمەدى»

ارينە، اتاعىمدى قورعاي الماي، جەڭىلىپ قالعانىما  وكىنىپ جۇرەمىن. جەڭىلۋىمە - مامىر ايىندا قۇلسارىدا وتكەن كەڭەس باراقاتوۆ اتىنداعى كۇرەس سايىسىندا العان جاراقاتىم سەبەپ بولدى. سول سايىستا مەن شىنتاعىمدى شىعارىپ العان ەدىم. دەگەنمەن قانشا جەردەن جاراقات الساڭ دا، تىرىسىپ-تىرمىسىپ ۇتۋىم كەرەك ەدى. بىراق، سول كەشتە مەنىڭ باعىم كەلىسپەدى.  اتالمىش ءتۋرنيردىڭ العاشقى جەڭىمپازى بولعان سوڭ،  بالۋانداردىڭ كوبىسىنىڭ ماعان ءتىس قايراپ، مەنى جەڭۋگە كەلگەنى بەلگىلى.  ءوز بولجامىمدا ەجەلگى قارسىلاسىم بەيبىتپەن كۇرەسۋىم قيىنعا سوعار دەپ ويلاپ كەلىپ ەدىم. بىراق، بەيبىتكە جەتپەي جارىستى ەرتە اياقتاۋىما تۋرا كەلدى. جالپى، «سپورت  دەگەن ءبىر سيقىر دەپ بەكەر» ايتپايدى عوي.  ءارى «باق شابا ما، باق شابا ما؟» دەگەندەي، بىلتىر مەنىڭ بابىم شاپسا، بيىل بەيبىتتىڭ باعى جانىپ تۇر ەكەن. راسىمەن دە، بەيبىت بيىلعى «قازاقستان بارىسى» اتاعىنا لايىقتى بالۋان.  ءوز-ءوزىمدى اقتاپ تۇرعانىم جوق، بىراق بالۋانداردىڭ ءبىر جىلداي دايىندالسا، مەن جارىسقا ءۇش اي ۋاقىت قالعاندا عانا جاتتىعۋ جيىندارىنا قاتىسا باستادىم. ءبىراز ۋاقىت كەرەكتى ەم-دوم الىپ، ءسال ايىققان سوڭ، الگى جاراقاتىم وسى تۋرنيردە كەدەرگىسىن كەلتىرە قويماس دەپ ويلاپ ەدىم. بىراق، قاتەلەسىپپىن. العاشقى اينالىمدا-اق جاراقاتىم سىر بەردى. سول سەبەپتەن بوز كىلەمدە ايشىقتى كۇرەس ونەرىن كورسەتە الماي، ءارى ءادىس قولدانۋعا شامام جەتىڭكىرەمەي  ءبىرىنشى قارسىلاسىم - ماڭعىستاۋلىق ابىزوۆ باقداۋلەتتى تەك ۇپاي سانىمەن ۇتىپ كەتتىم. بىراق، كەلەسى كەزدەسۋدە ءوزىم قاتەلىك جىبەرىپ الدىم. تورەشى ماعان ەسكەرتۋ بەرىپ، ال قارسىلاسىما ءبىر ۇپاي بەرگەن سوڭ، ءوزىمنىڭ ۇتىلىپ جاتقانىمدى ءبىلىپ، تەزىرەك ۇپاي جيناعىم كەلدى دە، بىردەن شابۋىلداۋعا كوشتىم. اقىرىندا قارسىلاسىم ارمان ابەۋوۆ ويلاستىرعان ءادىسىمدى ءبىلىپ قويىپ، مەنى الىپ جىقتى. ءاپ ساتتە-اق ءوزىمنىڭ قالاي جەڭىلىپ قالعانىمدى سەزبەي قالدىم. بوز كىلەمدە «شىنىمەن مەن جەڭىلىپ قالدىم با؟» - دەپ ءوز-وزىمە سەنبەي، اينالامدا نە بولىپ جاتقانىن تۇسىنە الماي، ءسال جاتىپ الدىم. ءتىپتى، بوز كىلەمنەن تۇرعىم دا كەلمەدى. بىراق، قازاق كۇرەسىنىڭ ەرەجەسى بويىنشا قارسىلاسىڭدى ارقاسىنان قاعىپ، قولىن الىپ شىعارىپ سالۋعا مىندەتتىمىن. بىراق، قازىر جەڭىلىپ قالدىم ەكەن دەپ ورتا جولدان قايتىپ كەتەتىن بالۋان مەن ەمەس.  وسى جولعى ماۋسىمدا جولىم بولماعانمەن، قۇداي قالاسا، كەلەسى جىلعى «قازاقستان بارىسىندا» التىن بەلبەۋدى ۇتىپ الامىن دەگەن سەنىمدەمىن!

ارمان ابەۋوۆ: «كەلەسى جىلعى جەڭىمپاز مەن بولامىن!»

جالپى وسى جولعى ءتۋرنيردىڭ باستى قارسىلاستارى رەتىندە بەيبىت ىستىباەۆ، شالقار جولامانوۆ، ۇلان رىسقۇل، ەرجان شىنكەەۆ پەن ايبەك نۇعىماروۆتارعا قارسى ازىرلەنىپ كەلگەنمىن.  ويلاعانىمداي-اق، ۇلان رىسقۇلعا قارسى ويلاستىرعان تاكتيكام جۇزەگە استى. قىزىق بولعاندا، جەرەبەنىڭ تارتىلۋى بويىنشا ەڭ العاش بولىپ ءوزىمنىڭ جەرلەسىم ءارى دوسىم ەدىل ۇسەنوۆپەن كۇرەستىم. نەگىزى، قانداي بالۋان بولسا دا بوز كىلەمگە العاش شىعار ساتتە قاتتى قوبالجيدى ەمەس پە؟ ەدىلدى تازا جەڭىسپەن ۇتقان سوڭ، الگى قوبالجۋىم باسىلىپ، ستاديونداعى ايقاي-شۋعا بويىم ۇيرەنىپ كەتتى. وسى جەڭىسىمنىڭ ماعان كۇش-قۋات سىيلاعانى سونشالىق، كەلەسى اينالىمداردا وڭايشىلىقپەن ۇتىپ كەتەتىندەي سەزىمدە ءجۇردىم. ال، ەدىلدەن كەيىنگى قارسىلاسىم، بىلتىرعى «قازاقستان بارىسىنىڭ » جەڭىمپازى ۇلان رىسقۇلدى ۇتقانىمدا قۇلشىنىسىم ارتىپ، ءتىپتى كۇشەيە ءتۇستىم. شىنىمدى ايتسام، سول ساتتە ءوزىمنىڭ ۇشتىككە ىلىنەتىنىمە سەنىمدى بولدىم. نەگىزى، ۇلان - باۋىرىمداي بولىپ كەتكەن بالۋان. ءبىر-ءبىرىمىزدى بۇرىننان جاقسى تانيمىز. جاقسى دوسپىز. ومىردە دوس بولعانمەن، بوز كىلەمدە قارسىلاسپىز. سول كەشتە بوز كىلەمگە شىعار الدىندا ۇلاندى  دوسىم ءارى بىلتىرعى جەڭىمپاز ەكەنىن ۇمىتىپ، ونى ءتۇبى ۇتامىن دەگەن ويمەن شىقتىم. بار ويىم - قالاي دا بولسا ۇلاندى ۇتۋ بولدى. اقىرى دەگەنىمە جەتىپ، ونى ۇتتىم. ال، 1/8 فينالدا ايبەك نۇعىماروۆپەن بولعان كەزدەسۋدى ءتىپتى ەسىمە دە العىم كەلمەيدى. ءوز باسىم ايبەكتەن جەڭىلدىم دەپ ايتا المايمىن. اڭگىمەنىڭ اشىعىن ايتسام، تورەشىلەرگە وكپەلىمىن. ايبەكپەن كۇرەسكەندە قانشا رەت ءتۇرلى ءادىس پەن نەبىر-نەبىر شابۋىلدار جاسادىم، ال ولار ونىڭ بىردە-بىرەۋىن ەسەپكە المادى. سول سەبەپتى ەموتسياعا بەرىلىپ، كۇرەس سوڭىنان ونىڭ قولىن العىم كەلمەدى. بىراق، زالدىڭ ءىشى گۋىلدەپ كەتكەن سوڭ، بوز كىلەمنىڭ سىرتىنا بارىپ، قايتىپ كەلىپ، قولىن الدىم. نەگىزى، ايبەكتى وسىدان ءبىر اي بۇرىن قازاق كۇرەسىنەن بولعان قازاقستان چەمپيوناتىندا تازا ۇتىپ كەتكەن بولاتىنمىن. سول سەبەپتى، ونىڭ كۇرەسۋ ءستيلىن جاتىق بىلگەن سوڭ، ءدال وسى تۋرنيردە ودان جەڭىلىپ قالامىن دەگەن وي بولماپتى. بىراق، اللانىڭ بۇيرۋىمەن ودان جەڭىلۋىم كەرەك بولدى. جەڭىلدىم. بىراق، بىلتىرعى «قازاقستان بارىسىندا» 4-ورىنعا تابان تىرەگەن سوڭ، بيىل ءوزىمدى جەڭىس تۇعىرىنان كورىنەرمىن دەپ توپشىلاعان ەدىم. دەگەنمەن بيىل بولماسا دا، كەلەسى جىلى وسى ءتۋرنيردى ۇتۋعا بارىمدى سالامىن. بىلتىر ۇلان، بيىل بەيبىت  «قازاقستان بارىسى» اتانسا، اللا قالاسا، كەلەسى جىلعى جەڭىمپاز مەن بولامىن!

«Abai.kz»

0 پىكىر