بيىل ءبىرىنشى شىلدەدەن باستاپ جەرگىلىكتى اتقارۋشى ورگان قىزمەتكەرلەرى الاتىن جالاقى مولشەرى 1,9 ەسەگە ءوستى.

پرەمەر-مينيستر اسقار ءماميننىڭ مالىمەتىنشە، ورتالىق مەملەكەتتىك ورگاندار قىزمەتكەرلەرىنىڭ ەڭبەكاقىسى 2022 جىلدان باستاپ 2024 جىلعا دەيىن 30 پايىزعا جوعارىلاپ وتىرادى.

2021 جىلعى كوتەرىلگەن جالاقى كولەمى بويىنشا كەيبىر وبلىس اكىمدەرى ءوز ايلىقتارىن اشىپ ايتتى. ەندەشە قاراپ كورەيىك…

ماحامبەت دوسمۇحامبەتوۆ – اتىراۋ وبلىسىنىڭ اكىمى.

2019 جىلدىڭ 18 جەلتوقسانىنان باستاپ اتىراۋ وبلىسىنىڭ اكىمى قىزمەتىنە كىرىستى. ول 1960 جىلى 25 جەلتوقساندا اتىراۋ وبلىسىندا دۇنيەگە كەلگەن. انە-مىنە 61 جاسقا تولادى.

1983 جىلى ي.م. گۋبكين اتىنداعى ماسكەۋ مۇناي-حيميا جانە گاز ونەركاسىبى ينستيتۋتىن «گەولوگيا جانە مۇناي-گاز كەن ورىندارىن بارلاۋ» ماماندىعى بويىنشا بىتىرگەن.

ماماندىعى: گەولوگ. «نۇر وتان» پارتياسىنىڭ مۇشەسى.

اكىم بولعانعا دەيىن «قازمۇنايگاز» بارلاۋ ءوندىرۋ» اق ءوندىرىس-تەحنيكا ساراپتاماسى دەپارتامەنتىنىڭ ديرەكتورى، گەولوگيا جانە وڭدەۋ دەپارتامەنتىنىڭ ديرەكتورى، «قازمۇنايگاز» ۇك» اق ءىرى وپەراتسيالىق ەمەس اكتيۆتار مەن تەڭىز جوبالارى بويىنشا باس ۆيتسە-پرەزيدەنتى بولىپ، قازاقستان رەسپۋبليكاسى ەنەرگەتيكا ءبىرىنشى ۆيتسە-ءمينيسترى بولىپ قىزمەت ىستەگەن.

ايلىعى – 1 ملن 954 مىڭ تەڭگە.

وڭداسىن ورازالين – اقتوبە وبلىسىنىڭ اكىمى. 1963 جىلى تۋعان. 58 جاستا.

1985 جىلى اقتوبە پەداگوگيكالىق ينستيتۋتىن، 1991 جىلى س.م.كيروۆ اتىنداعى قازاق مەملەكەتتىك ۋنيۆەرسيتەتىن بىتىرگەن.

اقتوبە پەداگوگيكالىق ينستيتۋتىنىڭ وقىتۋشىسى بولىپ ەڭبەك جولىن باستاپ، «وبلترانسگاز» جاق، «اقتوبەگاز» جاق باسقارما توراعاسى، اقتوبە وبلىسىنىڭ مۇعالجار اۋدانىنىڭ اكىمى بولىپ سايلانادى.

2017 جىلعى 22 ناۋرىزىنان باستاپ قر پرەزيدەنتىنىڭ اكىمشىلىگى باسشىسىنىڭ ورىنباسارى قىزمەتىن اتقاردى. «قۇرمەت» وردەنىمەن، «پاراسات» وردەنىمەن جانە 3 مەدالمەن ماراپاتتالعان. اكىم قىزمەتىنە  2019 جىلى سايلاندى. «نۇر وتان» پارتياسىنىڭ مۇشەسى.

ايلىعى – 1 ملن 856 مىڭ تەنگە.

گۇلشارا ابدىقالىقوۆا – قىزىلوردا وبلىسىنىڭ قازىرگى اكىمى. 1965 جىلى 15 مامىردا قىزىلوردا وبلىسى سىرداريا اۋدانى سۇلۋ-توبە اۋىلىندا دۇنيەگە كەلگەن.

1987 جىلى جامبىل جەڭىل جانە تاماق ونەركاسىبى تەحنولوگيالىق ينستيتۋتىن بىتىرگەن.  ەكونوميكا عىلىمدارىنىڭ كانديداتى.

ول بۇعان دەيىن:

قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى، قر ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى حاتشىسى، قر پرەزيدەنتىنىڭ كەڭەسشىسى، پرەمەر-ءمينيستردىڭ ورىنباسارى، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى، پارلامەنت ءماجىلىسىنىڭ دەپۋتاتى قىزمەتتەرىن اتقاردى. 2020 جىلدان باستاپ قىزىلوردا وبلىسىنىڭ اكىمى بولىپ سايلاندى.

ايلىعى – 1 ملن 800 مىڭ تەڭگە.

ابىلقايىر ىسقاقوۆ – پاۆلودار وبلىسىنىڭ اكىمى.

بۇل قىزمەتكە 2020 جىلى تاعايىندالدى. 1974 جىلى پاۆلودار وبلىسىندا تۋعان. 47 جاستا. ەكونوميكا، قارجى سالاسىندا ءبىلىم العان.

2012-2014 جىلدار ارالىعىندا قارجى مينيسترلىگىندە سالىق كوميتەتى توراعاسىنىڭ ورىنباسارى بولعان. قر قورعانىس ءمينيسترىنىڭ ورىنباسارى بولعان. نۇر-سۇلتاندا مەملەكەتتىك كىرىستەر دەپارتامەنتىن باسقارعان.  2019 جىلدىڭ ءساۋىر ايىنان بەرى قارجى مينيسترلىگىندە قارجىلىق باقىلاۋ كوميتەتىنىڭ توراعاسى بولدى.

ايلىعى – 967 670 تەنگە (ۇستەمەسىز ەسەپتەگەندە).

جەڭىس قاسىمبەك - 2019 جىلدان بەرى قاراعاندى وبلىسىنىڭ اكىمى.

ول 1975 جىلى 7 قاڭتاردا جامبىل وبلىسى شۋ قالاسىندا دۇنيەگە كەلگەن. قازاق مەملەكەتتىك ساۋلەت-قۇرىلىس اكادەمياسىنىڭ ساۋلەتتىك ورتا ديزاينى فاكۋلتەتىن جانە ەۋرازيا ۋنيۆەرسيتەتىنىڭ مەملەكەتتىك جانە مۋنيتسيپالدىق باسقارۋ ءىسى فاكۋلتەتىن ەكونوميست ماماندىعى بويىنشا بىتىرگەن.

2000 جىلدىڭ جەلتوقسانىنان قر كولىك جانە كوممۋنيكاتسيا مينيسترلىگىندە سۋ كولىگى دەپارتامەنتىنىڭ ديرەكتورى، «اقتاۋ حالىقارالىق تەڭىز ساۋدا پورتى» رمك ديرەكتورى، قر كولىك جانە كوممۋنيكاتسيالار ۆيتسە-ءمينيسترى، 2014 جىلعى ناۋرىز-ماۋسىم ايلارىندا قر كولىك جانە كوممۋنيكاتسيالار ءمينيسترى قىزمەتتەرىنە تاعايىندالعان. قر ينۆەستيتسيالار جانە دامۋ ءمينيسترى،  قر يندۋستريا جانە ينفراقۇرىلىمدىق دامۋ ءمينيسترى قىزمەتتەرىن اتقارعان. 2019 جىلدىڭ اقپانىندا قازاقستان رەسپۋبليكاسى پرەمەر-ءمينيسترىنىڭ ورىنباسارى قىزمەتىنە تاعايىندالعان.

ايلىعى – 1 ملن 900 مىڭ تەڭگە.

ومىرزاق شوكەەۆ – تۇركىستان وبلىسىنىڭ اكىمى.

2019 جىلدىڭ اقپانىنان بەرى تۇركىستان وبلىسىنىڭ اكىمى بولىپ ءجۇر. جاسى 57-دە.

ومكەڭ دە كوپ قىزمەتتەن وتكەن ادام. پرەزيدەنت اكىمشىلىگىندە، ۇكىمەتتە، وبلىس اكىمدىكتەرىندە ءتۇرلى قىزمەتتەر اتقارعان. 3 مارتە مينيستر، 5 مارتە پرەمەر-ءمينيستردىڭ ورىنباسارى بولعان. قوستاناي وبلىسى، بۇرىنعى وڭتۇستىك قازاقستان وبلىسى، استانا قالاسىندا اكىم بولعان.

ءوزىنىڭ جالاقسى تۋرالى: «مەنىڭ جالاقىما بايلانىستى سۇراقتى ءبارى قويادى. بۇل ۇكىمەت قاۋلىسىمەن رەتتەلەدى. ول جەردە ءوزىنىڭ ەسەپتەلەتىن الگوريتمى بار. اكىمدەردىڭ ايلىعى بايلانىستى بولۋى كەرەك دەپ... سىزدەر جاڭالىق قىلىپ جۇرسىزدەر. مەن مۇنى ءتۇسىنىپ تۇرعان جوقپىن. جالاقىنى جوعارى ورگاندار بەلگىلەيدى. بارلىق اكىمدەر جالاقىسىنىڭ قانشا ەكەنىن اشىق ايتتى», - دەيدى.

ايلىعى - 1 ملن 900 مىڭ تەڭگە.

تاقىرىپقا تۇزدىق رەتىندە ايتا كەتەيىك، 2022 جىلدان باستاپ قازاقستاندا ەڭ تومەنگى ايلىق كولەمى كوبەيەدى. كوبەيەدىنى داۋەيتىپ سويلەگەنىمىزبەن، ونىڭ جالپى سوماسى – 60 مىڭ تەڭگە بولماق. ال قازىر ەلىمىزدەگى ەڭ تومەنگى ايلىق – 42 500 تەڭگەنى قۇرايدى.

پرەزيدەنت توقاەۆتىڭ تاپسىرماسى بويىنشا، 2022 جىلدىڭ 1 قاڭتارىنان باستاپ مىناداي وزگەرىستەر ەنگىزىلگەن.

ەڭ تومەنگى ايلىق – 60 مىڭ تەڭگە (141 دوللار),

ەڭ تومەنگى مەملەكەتتىك بازالىق زەينەتاقى تولەمى – 19 450 تەڭگە (46 دوللار),

ەڭ تومەنگى زەينەتاقى – 46 302 تەڭگە (109 دوللار),

ايلىق ەسەپتىك كورسەتكىش – 3 063 تەڭگە (7,2 دوللار),

ەڭ تومەنگى كۇنكورىس دەڭگەيى – 36 018 تەڭگە (85 دوللار).

ال وبلىستىڭ دەڭگەيدەگى اكىمدەردىڭ ورتاشا جالاقىسى 2 ميلليون تەڭگەنىڭ شاماسىن قۇراپ وتىر. ال ەلىمىزدەگى ورتاشا جالاقى سوماسى 230 مىڭ تەڭگە شاماسىندا ەكەن. ساندار اراسىنداعى الشاقتىقتى وزدەرىڭىز كوردىڭىزدەر. بىزدەگى جالقى سۇراق: ميلليونداپ ايلىق الاتىن اكىمدەر الپىس مىڭدى اس-تۇزىنا تالعاجاۋ ەتكەن قاراشا حالىقتىڭ مۇڭ-مۇقتاجىن ەستي الا ما؟ بۇرىن ەل ىشىندە: «اكىم بول، حالقىڭا جاقىن بول»، دەۋشى ەدى. ەندى: «اكىم بول دا، ميلليونەر بول»، دەگەلى تۇرمىز.

ايجان تەمىرحان

Abai.kz